Paşinyan növbəti dəfə yalan və avantürist fikirləri ilə gündəm oldu

Ermənistanda mövcud hakimiyyətdən narazılıq daha da dərinləşib. Belə bir fikir səsləndirilir ki, konstitusiyada Paşinyanın göstəriş və sərəncamları ilə pozmadığı bir müddəa belə qalmayıb. Baş nazirin ölkəsindəki məhkəmələri mühasirəyə alan, hökmləri zorla dəyişdirən, kobud qanun pozuntuları ilə kadr siyasəti aparan, bir çox inqilabdan əvvəl oliqarxlarla oğurluq əlaqələri quran və onları "vicdanlı iş adamları" adlandıran yeganə liderdir.

Hətta o, vəzifəsindən istifadə edərək ailənin qohumları vasitəsilə korrupsiya işləri həyata keçirməyə, milyardlarla dollarlıq vergidən yayınmağa çalışır.

Bildirilir ki, sosial müdafiə naziri ilə sıx əməkdaşlıq edərək ən ehtiyaclı vətəndaşların müavinətlərindən sui-istifadə edib, vicdanlı vergi ödəyicilərindən oğurlanan pullarla deputat və nazirlərə astronomik maaş və mükafatlar paylayıb, minlərlə iş yeri bağlanıb, yoxsulluğu təhlükəli həddə çatdırıb, ölkənin və vətəndaşlarının təhlükəsizliyini yeni çağırışlarla üzbəüz qoyub.

Bütün bunların fonunda Nikol Paşinyan növbəti dəfə tənqidlərə tuş gəlib. O, sələflərinin yolu ilə gedərək yalan və avantürist fikirləri ilə gündəm olub. Belə ki, baş nazirin Ermənistan İstintaq Komitəsinin yaradılmasının 10 illiyi ilə bağlı tədbirdə çıxışı ölkənin siyasi dairələrində, vətəndaş cəmiyyətində ciddi tənqidlərə yol açıb. Paşinyan iddia edib ki, "bu qurum Ermənistanda ədalətin qurulmasına böyük töhfə verib". "Mən "ədalətin qurulması" ifadəsini iki əsas səbəbdən qeyd etmək istərdim. Birincisi, bunu siyasi komandanın əsas tələblərindən biri hesab edirəm. İkincisi, qeyd etmək istərdim ki, Ermənistan vətəndaşlarında ədalət hissi mövcuddur", - baş nazir vurğulayıb.

Hakimiyyətin saxta ittihamlarla həbs etməyə çalışdığı hüquq müdafiəçisi Avetik İşxanyan Nikolun çıxışını faktlarla alt-üst edib. O bildirib: "Baş nazirin sözlərini şərh etmək çətindir, çünki onun heç bir prinsipləri yoxdur. Birincisi, ədalət hissinə malik olmaq nə deməkdir? Ədalət - subyektiv hissdir və hər bir insan üçün fərqli əhəmiyyət kəsb edir. Cinayətkar və qurban üçün müxtəlifdir. Müasir dünyada ədalət haqqında danışmaq mümkündür. Hər bir istənilən ölkədə ədalət hakimiyyət qanadlarının bölgüsü, müstəqil məhkəmə-ədalət sisteminin olması deməkdir. Sual olunur, Ermənistanda hakimiyyətin bölgüsü mexanizmi və müstəqil məhkəmə sistemi mövcuddurmu? Təbii ki, yox!"

Bu arada hakim "Vətəndaş müqaviləsi"nin siyasi elitası tərəfindən hazırlanan plana əsasən, məhkəmə hakimiyyətinin müstəqilliyinə müdaxilə ilə bağlı yeni üsullar üzə çıxıb. Məsələn, məhkəmə hakimiyyətinin təminatlarını qorumaqla məşğul olan Ermənistan Hakimlər İttifaqının fəaliyyətini qanunvericiliklə məhdudlaşdırmağa cəhdlər edilir. Əsas məqsəd isə ittifaqın ləğvi, hakim və məhkəmə sistemini gözdən salmaq, bütün kreslolara hakim partiyanın diktəsi əsasında qərarlar qəbul edən hakimləri oturtmaqdır.

Əslində, uzun müddətdir baş nazirin göstərişi ilə müəyyən postlara hakimlər təyin edilir, qərarların qəbuluna ciddi müdaxilə faktları ortaya çıxır. Məsələn, 12 iyun hadisələri ilə bağlı bir sıra QHT və müxalifət nümayəndəsi polisin aksiya iştirakçılarına qarşı zorakılıq etməsi ilə bağlı yüzlərlə fakt və dəlil ortaya qoysa da, hansısa "sehrli əl"in köməyi ilə bu faktlar gözardı edilir, heç bir hüquq-mühafizə orqanı əməkdaşı məsuliyyətə cəlb edilmir.

Elçin CƏFƏROV,

Azərbaycan.-2024.- 16 oktyabr (№227).- S.8.