Masallıda Milli Qəhrəmanın ad günü qeyd edilib

Masallının Sərçuvar kəndində Azərbaycanın ilk Milli qəhrəmanlarından olan Səfəralı Qurban oğlu Məmmədovun anadan olmasının 61-ci ildönümü qeyd edilmişdir.

1963-cü ildə doğulan Səfəralı Məmmədov 1983-cü ildə hərbi xidmətini başa vurduqdan sonra Rusiyanın Krasnovodsk şəhərində daxili işlər sistemində çalışmışdır. Təhsilini Bakı Xüsusi Orta Milis Məktəbində davam etdirən S.Məmmədov 1990-cı ildə həmin məktəbi bitirərək leytenant rütbəsi almışdır. S. Məmmədova Bakı Hava Limanında iş təklif edilsə də o, Qarabağ müharibəsində iştirak etməyə üstünlük vermişdir. Ağdam rayonunda taqım komandiri kimi döyüşlərdə iştirak edən S.Məmmədovun son döyüşü 1992-ci il fevralın 16-da olmuşdur. Azğınlaşmış erməni işğalçılarının Xocavənd rayonunun Qaradağlı kəndinə hücum zamanı insanları vəhşicəsinə qətlə yetirdikləri bir zamanda S. Məmmədovun başçılıq etdiyi dəstə düşmən yaraqlılarını məhv edərək irəliləməyə başlamışdır. Lakin onun idarə etdiyi maşın qumbaraatanla vurulmuş və igid döyüşçü həlak olmuşdur.

Azərbaycan Respublikası Prezidentinin 6 iyun 1992-ci il tarixli sərəncamı ilə Məmmədov Səfəralı Məmmədova "Azərbaycanın Milli Qəhrəmanı" (ölümündən sonra) adı verilmişdir.

Milli Qəhrəman doğulduğu Sərçuvar kəndində dəfn olunmuşdur. Masallı şəhərində küçələrdən birinə və təhsil aldığı məktəbə qəhrəmanın adı verilmiş, məktəbin həyətində büstü qoyulmuşdur.

Azərbaycan .-2024.- 19 oktyabr (№ 230).- S.10.