Cəlilabadda "Yaşıl dünya naminə həmrəylik ili" çərçivəsində müşavirə keçirilib

Cəlilabadda "Yaşıl dünya naminə həmrəylik ili" ilə bağlı rayonda görülən işlər və qarşıda duran vəzifələrlə bağlı müşavirə keçirilib. Tədbirdə rayonun icra strukturlarının, idarə və təşkilatların rəhbərləri, RİH-in şəhər və kənd inzibati ərazi dairəsi üzrə nümayəndələri və bələdiyyə sədrləri iştirak ediblər.

RİH başçısı Rafiq Cəlilov çıxışında Prezident İlham Əliyevin 25 dekabr 2023-cü il tarixli sərəncamı ilə Azərbaycanda 2024-cü ilin "Yaşıl dünya naminə həmrəylik ili" elan edilməsinin cəmiyyətin qarşısında mühüm vəzifələr qoyduğunu vurğulayaraq ətraf mühitin qorunması və mühafizəsi sahəsində hər bir vətəndaşın üzərinə böyük məsuliyyət düşdüyünü qeyd etmişdir. R.Cəlilov eyni zamanda gələn ay Bakıda keçiriləcək COP29-la bağlı oktyabrın 1-dən ölkəmizdə "İqlim aylığı" elan olunduğunu, bu müddət ərzində atmosfer havasına tullantı atan müəssisələrdə qaz-toztutucu qurğuların işlək vəziyyətə gətirilməsi, əhali arasında maarifləndirmə işlərinin aparılması, ərazilərdə tullantıların, quru otların və xəzəllərin yandırılmaması, mövcud olan bərk məişət tullantıları poliqonlarında yanma, tüstüləmə hallarına yol verilməməsi üçün aidiyyəti qurumlara müvafiq göstərişlər vermişdir.

"Yaşıl dünya naminə həmrəylik ili" ilə bağlı rayonda keçirilən tədbirlərdən, iməcilik və ağacəkmə aksiyalarından bəhs edən RİH-in başçısı cari il oktyabr ayının 18-dən 28-dək Ələt-Astara yolunun Cəlilabad rayonunun ərazisindən keçən 19 kilometrlik hissəsində həmişəyaşıl ağacların əkiləcəyini elan etmiş və müşavirə iştirakçılarını həmin aksiyada fəal iştirak etməyə çağırmışdır.

Tədbirdə iştirak edən idarə və təşkilat rəhbərləri ətraf mühitin qorunması və yaşıllaşdırma aksiyalarının davamlı olmasının ölkəmiz üçün mühüm əhəmiyyət kəsb etdiyini bildirmişlər.

Azərbaycan.-2024.- 19 oktyabr (№ 230).- S.10.