Azərbaycan ilə MDB dövlətləri arasında uğurlu əməkdaşlığın təsdiqi

Laçın şəhərinin 2025-ci ildə MDB-nin mədəniyyət paytaxtı elan edilməsi mühüm nailiyyətdir

Bu gün Azərbaycanın xarici siyasətində MDB dövlətləri ilə əməkdaşlığın genişlənməsi açıq şəkildə müşahidə olunur. MDB çərçivəsində bütün istiqamətlərdə yüksələn xətt üzrə inkişaf edən əlaqələrimiz humanitar sahədə də əhəmiyyətli irəliləyişlərə səbəb olmuşdur. 

Xüsusilə mədəniyyət, idman, təhsil, elm və sosial sahələrdə əməkdaşlığımızın genişlənməsi bu əlaqələrin daha dərin və qarşılıqlı faydalı şəkildə inkişaf etdiyini göstərir. Bu dinamika Azərbaycanla MDB-nin iştirakçısı olan dövlətlər arasında əməkdaşlığın çoxşaxəli xarakterini daha da möhkəmləndirir.

Hər il MDB-yə üzv dövlətlərin şəhərlərindən biri MDB-nin mədəniyyət paytaxtı fəxri statusuna layiq görülür. Bu fəxri ad "Birliyin Mədəniyyət Paytaxtları" dövlətlərarası proqramı çərçivəsində şəhərlərin zəngin tarixi və mədəni irsinə diqqət çəkmək, onların potensialını nümayiş etdirmək məqsədi daşıyır. Azərbaycanın Qəbələ şəhəri 2013-cü ildə, Gəncə şəhəri isə 2017-ci ildə MDB-nin mədəniyyət paytaxtı elan olunmuşdu.

Azərbaycan Respublikasının Prezidenti cənab İlham Əliyevin iştirak etdiyi MDB Dövlət Başçıları Şurasının 8 oktyabr 2024-cü ildə keçirilən iclasında Laçın şəhərinin 2025-ci ildə MDB-nin mədəniyyət paytaxtı elan edilməsi Azərbaycan üçün tarixi qərar oldu və Azərbaycanın artan beynəlxalq nüfuzunun birbaşa göstəricisi olmaqla yanaşı, onun mədəniyyətinə və irsinə göstərilən hörmətin parlaq bir ifadəsi və ölkəmizə olan etimadın təzahürüdür. Bu seçim, şəhəri beynəlxalq aləmdə daha yaxından tanıtmaq, onun bərpası və dirçəlişinə töhfə vermək üçün əvəzolunmaz bir fürsətdir.

Şərqi Zəngəzur bölgəsinin qədim Azərbaycan şəhərlərindən biri olan Laçın tarixən milli mədəniyyətimizin qiymətli daşıyıcısı olmuşdur. Şəhər təkcə milli irsimizin qoruyucusu kimi çıxış etmir, eyni zamanda zəngin folkloru, musiqisi və sənətkarlıq ənənələri ilə də geniş tanınır. Laçının bu unikal xüsusiyyətləri Azərbaycan mədəniyyətinin əsrlər boyu yaşamasına və inkişaf etməsinə böyük töhfə vermişdir. 

Laçın 30 ilə yaxın Ermənistanın işğalı altında qalmış və bu müddət ərzində demək olar ki, tamamilə dağıdılmışdır. Müzəffər Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi ilə 44 günlük Vətən müharibəsində Azərbaycan Ordusu şanlı qələbə qazanaraq, Laçın şəhərini azad etmişdir. Bu gün Laçın bərpa olunaraq yeni həyatla canlanmağa başlayıb. Laçının MDB-nin mədəniyyət paytaxtı elan edilməsi şəhərin mədəni dirçəlişini sürətləndirmək üçün mühüm bir addım olacaq. Bu status Laçının qədim və zəngin irsini bərpa etməklə yanaşı, onun əsrarəngiz təbiətini və unikal mədəni sərvətlərini beynəlxalq arenada daha geniş tanıtmaq üçün yeni imkanlar açacaq. Beləliklə də, şəhər regional və beynəlxalq miqyasda mədəni əlaqələrin mərkəzinə çevrilərək, öz potensialını daha da inkişaf etdirəcək.

Onu da qeyd etmək yerinə düşər ki, 2025-ci ildə III MDB Oyunlarına evsahibliyi hüququnun Azərbaycana verilməsi və Gəncə şəhərinin idman paytaxtı olaraq seçilməsi ölkəmizə olan etimadın daha bir göstəricisidir. Həmçinin MDB dövlət başçılarının Zirvə görüşündə COP29-un Azərbaycanda keçirilməsinə dəstək verilməsi ölkəmizin belə nüfuzlu beynəlxalq tədbirlərə evsahibliyi etmək gücünü bir daha təsdiqləyir.

Azərbaycanda keçiriləcək mədəni və idman tədbirləri MDB ölkələri arasında mədəni və humanitar əməkdaşlığı gücləndirərək, regional və beynəlxalq əməkdaşlığa əhəmiyyətli töhfə verəcək, həmçinin Azərbaycan mədəniyyətinin MDB məkanında yaxından tanıdılması və mədəni inteqrasiyanın gücləndirilməsi proseslərinin bir simvoluna çevriləcəkdir.

Ramin RZAYEV,

MDB PA DİMBİ Baki filialının müdiri

Azərbaycan.-2024.- 22 oktyabr (№ 232).- S.5.