Şuşada doğulan körpənin səsi Zəfərimizin sədasıdır

44 günlük Vətən müharibəsi böyük Zəfərlə yekunlaşdıqdan az müddət sonra Qarabağda və Şərqi Zəngəzurda geniş bərpa işlərinə başlandı.

Qısa vaxt ərzində evlər tikildi, kəndlər salındı. Keçmiş məcburi köçkünlər ən böyük istəklərinə qovuşdular, obalarına dönməyə başladılar. Köçkünlər geri qayıdandan sonra doğma yurdlarında həyat tədricən əvvəlki axarına düşdü. Bu yerlər sevinc içində qollarını geniş açıb çoxdan bəri görmədiyi, səsləri, nəfəsləri üçün darıxdığı sakinlərini qoynuna aldı. Torpağın da, insanların da uzun zaman yaşadıqları həsrətə son qoyuldu.

Günlər keçdikcə axarına düşən həyat insanların üzünə gülməyə başladı. İllər uzunu ata-baba yurdunun həsrətini çəkən insanlar geri dönəndən sonra əvvəlki günlərin sevincini, adət-ənənələrini də özləri ilə gətirdilər. Artıq keçmiş köçkünlərin geriyə qayıtdığı ellərdən, obalardan göylərə toy səsi, çal-çağır, şənlik sədaları ucalmağa başladı. Sevinc-sevincə, fərəh-fərəhə qarışdı. Toy mağarlarından ətrafa yayılan şən musiqi səsi yaxınlıqdakı dağlara da, dərələrə də, geniş düzlərə də əks-səda verib təbiəti dirçəltdi. Şadlıqdan, şənlikdən hər kəsin üzündən sevinc süzüldü. Geriyə dönən köçkünlərin sayı çoxaldıqca el şənliklərinin də səsi, sorağı daha da artdı, daha da gurlaşdı. Yavaş-yavaş Yer üzü də, göy üzü də simasını dəyişdi.

Doğma ocaqlarına dönən köçkünlərdən hər gün şad xəbərlər eşidirik. Təsərrüfat yaradan kim, bağ-bağat salan kim, yeni iş yeri açan kim... Bölgələrdən gələn bu xəbərlər ovqatımıza ovqat qatır, çöhrəmizə təbəssüm çiləyir, ürəyimizi açır. Bu günlərdə Şuşadan dünyaya yayılan daha xoş bir xəbər isə yəqin ki, hamını sevindirdi, qəlbləri fərəhləndirdi. Eşitdiyimiz bu xəbərə necə sevinməyək, necə duyğulanmayaq...

...Müharibə başa çatandan, keçmiş köçkünlər doğma ocaqlarına dönəndən sonra ilk dəfə olaraq musiqi beşiyimiz olan Şuşada bir qız uşağı dünyaya göz açmışdı. Aman Allah, nə gözəl xəbər idi bu! Nə şirin xəbər idi bu! Bütün ağrı-acıları ürəklərdən, qəlblərdən silən bir müjdə idi bu! Artıq Şuşada körpələr dünyaya gəlir, körpə qığıltısı, uşaq səsi eşidilir. Dağlara, meşələrə, geniş çöllərə bu şirin səs yayılır.

Əvvəlki illər ölkəmizin bu əsrarəngiz guşəsində erməni işğalçıları at oynadırdılar. Şuşadan top-tüfəng səsləri eşidilirdi. İnsanlara qorxu gətirən atəş səsləri kəsilmək bilmirdi. Bu atəş səsləri yeri də, göyü də silkələyirdi. Barıt qoxusu dağların da, dərələrin də rəngini dəyişirdi, Şuşanın tər-təmiz havası korlanırdı. Çox şükürlər olsun ki, artıq dörd ildir Şuşadan atəş səsləri eşidilmir. İndi Qarabağın tacı olan bu diyardan körpə qığıltısı, uşaq səsi gəlir. Dünyaya yayılan uşaq səsindən, körpə qığıltısından yerin də, göyün də üzü gülür, qaşqabağı açılır. Yavaş-yavaş dağların, dərələrin də qəddi düzəlir, daha ovuc-ovuc ovulub balacalaşmır, kiçilmir. Əvvəlki illərdə olduğu kimi, səmalara boylanır, dumandan başına papaq qoyur, buludlarda üzünü yuyur.

Şuşadan gələn körpə qığıltısı qulaqlarımızda dünyanın ən gözəl, ən məlahətli, ən kövrək, ən yanıqlı mahnısı kimi səslənir. Bu səs sanki bir an içində Yer üzünə yayılır. Bütün səslərdən, bütün çıxışlardan gur səslənir.

Şuşadan gələn körpə qığıltısından vəcdə gələn quşlar da onun səsinə səs verib Qarabağda sülh nəğməsi oxuyur. Ürəkləri, qəlbləri sehrləyən bu nəğməni qanadlarının üstünə alıb dünyanın hər yerinə daşıyıb yayırlar.

Şuşadan gələn körpə qığıltısı hamını sabahkı gözəl həyata ruhlandırır, gələcək xoş günlərə gedib çatmaq üçün qol-qanad və güc verir. Qaranlıqlardan keçən yollarımıza işıq salır.

Şuşadan gələn körpə qığıltısı sanki Yer üzündə gurlayan bütün silahları bir anlıq da olsa susdurur. Atəş səslərini öz qığıltısının içində boğur. Barıt qoxuyan səngərlərə nur çiləyir.

Şuşadan gələn uşaq qığıltısından sonra bu gözəl, bənzərsiz diyardan dünyaya hamımız üçün doğma və əziz olan ana laylası da yayılacaq. Ana laylası ilə körpə qığıltısı bir-birinə qarışıb gözəl harmoniya yaradacaq. Yeri, göyü özünə heyran edəcək, insanları sehrinə salacaq...

Məcburi köçkünlükdən sonra Şuşada ilk doğulan qız uşağına Mehriban adı veriblər. Adı ilə böyüsün. Mehriban adı bir çox gözəl mənanı ifadə edir. Hər şeydən əvvəl Mehriban mehribanlıq, həmrəylik, birlik, barışıq, sülh, qardaşlıq, dostluq, sirdaşlıq və əmin-amanlıq deməkdir. Deməli, bundan sonra dünyamızda əmin-amanlıq olacaq, müharibə ocaqlarına sakitlik çökəcək, sülh yaranacaq. Gurlayan silahların səsi Şuşadan gələn uşaq qığıltısının içində eşidilməz olacaq.

Şuşadan gələn körpə qığıltısı həm də dünyada başımızı ucadan uca edən Zəfərimizin, Qələbəmizin səsidir. Bu səsin sədası heç vaxt kəsilməyəcək. Bu səs gurladıqca gurlayıb dünyaya səs salacaq. Dostlarımızı sevindirəcək, düşmənlərimizi xar edəcək.

Şuşadan gələn körpə qığıltısı yalnız və yalnız başlanğıcdır, ilkdir. Hələ qarşıda neçə belə sevinc dolu sabahlarımız var, günlərimiz var. Bundan sonra işğaldan azad olunmuş bölgələrdə neçə-neçə oğlumuz, qızımız doğulacaq. Hələ Qarabağdan, başqa bölgələrdən gələn körpə qığıltılarının sədasını, səsini çox eşidəcəyik, çox sevinəcəyik. Deməli, körpə qığıltıları çoxaldıqca Zəfərimizin, Qələbəmizin səsi daha da gurlaşacaq.

Vahid MƏHƏRRƏMOV,

Azərbaycan.-2024.- 23 oktyabr (№ 233).- S.11.