Milli Qəhrəmanın doğum günü qeyd edilib

Samux rayonunda Milli Qəhrəman İsgəndərov Elton Xaləddin oğlunun doğum günü qeyd olunmuşdur.

Tədbirdə rayon rəhbərləri, şəhid ailələri, qazilər, hüquq-mühafizə orqanlarının, idarə, müəssisə və təşkilatların, ictimaiyyətin nümayəndələri iştirak ediblər.

Milli Qəhrəmanın məzarı ziyarət olunduqdan sonra tədbirdə çıxış edən rayon icra hakimiyyətinin başçısı Firdovsi Əliyev diqqətə çatdırıb ki, Elton 2009-cu il iyunun 18-də Cəlilabad rayonu istiqamətində sərhəd pozucuları ilə döyüşdə qəhrəmancasına şəhid olub: "O, bu hərəkəti ilə Azərbaycan oğullarının vətən uğrunda lazım gələrsə canlarından keçə biləcəyini sübut edərək gənc nəsillərə nümunə göstərmişdir. Prezident İlham Əliyev cəsur əsgərin göstərdiyi bu şücaəti yüksək qiymətləndirərək ona ölümündən sonra Milli Qəhrəman adı vermişdir".

Tədbirdə iştirak edən şəhidin atası Xaləddin İsgəndərov oğlunun göstərmiş olduğu qəhrəmanlıqlarla fəxr etdiyini və Azərbaycanda Elton kimi vətənpərvər oğlanların on minlərlə, yüz minlərlə olduğunu deyib, göstərilən diqqət və qayğıya görə dövlət başçısına ailəsi adından minnətdarlığını bildirib.

Azərbaycan.-2024.- 23 oktyabr (№ 233).- S.14.