Adilə
ƏLİYEVA: "Bu qlobal
beynəlxalq konfransda
3 min könüllü
fəaliyyət göstərəcək"
Qarşıdan Azərbaycanın
evsahibliyi edəcəyi
BMT-nin İqlim Dəyişmələri üzrə
Çərçivə Konvensiyasının
Tərəflər Konfransının
29-cu sessiyası gəlir.
İllərdir Azərbaycanda
formalaşan "Könüllülük
məktəbi"nin iştirakçıları
bu beynəlxalq tədbir zamanı da qonaqlara müxtəlif
sahələrdə yardımçı
olacaqlar.
Bu məqsədlə
bir neçə ay əvvəl məxsusi olaraq COP29 Könüllülük Proqramı
elan olunaraq müraciət edənlər
arasında seçim aparılıb. COP29 könüllüləri,
onların fəaliyyət
istiqamətləri barədə
suallarımızı COP29 Azərbaycan
Əməliyyat Şirkətinin
İşçi Qüvvəsi
Departamentinin Könüllülərlə
iş sektorunun rəhbəri Adilə Əliyevaya ünvanladıq.
- Azərbaycanda keçiriləcək
BMT-nin İqlim Dəyişmələri üzrə
Çərçivə Konvensiyasının
Tərəflər Konfransının
29-cu sessiyasında iştirak
üçün neçə
könüllü qeydiyyatdan
keçib və onlardan neçəsinin müraciəti müsbət
qiymətləndirilib?
- COP29 Könüllülük Proqramının qeydiyyat prosesinə 29 may tarixində start verilmişdi. Qürur hissi ilə qeyd etmək istərdim ki, 24 saat ərzində Azərbaycanda rekord qeydiyyat göstəricisinə
nail olduq. Belə ki, bir
gündə 9000 nəfər
könüllülük üçün
qeydiyyatdan keçdi. Ümumiyyətlə isə
16 mindən çox şəxs COP29 könüllüsü
olmaq üçün
qeydiyyatdan keçmişdi.
Sözsüz ki, müraciətlərin sayının
çox olması və konfransa olan maraq bizi
çox sevindirir, lakin tədbirə ümumilikdə 3 min könüllünün cəlb
ediləcəyi nəzərə
alınaraq biz seçim prosesinə diqqətlə yanaşdıq.
Seçim bir neçə mərhələdən
ibarət oldu. İlk mərhələdə
qeydiyyat müraciətləri
yoxlanıldı və
nəticədə 10 min
nəfər müsahibə
mərhələsinə dəvət
olundu. Müsahibə mərhələsindən uğurla
keçən könüllülərin
68 faizi qadın, 32 faizi kişi olmaqla, təxminən 7 min nəfər ümumi təlimlər mərhələsinə keçmək
imkanı əldə etdi. Təlimlər prosesi seçim mərhələsinin əsas
elementlərindən hesab
olunur. Bu mərhələ prosesin uğurla aparılması üçün çox vacibdir. Nəhayət, ümumi və rol təlimlərimizin yekununda ümumilikdə
3000 nəfər COP29 könüllüsü
olaraq seçildi.
- COP29 könüllüsü
olmaq üçün
qeydiyyatdan keçənlər
əsasən hansı
yaş aralığında
idilər?
- Tədbirə marağın
böyük olması
müraciətçilərin sayına təsirsiz ötüşməyib. Xüsusilə
vurğulamaq istərdim
ki, əvvəlki tədbirlərlə müqayisədə
yuxarı yaşlı
insanların da könüllülüyə marağının
artması bizi sevindirir. Belə ki, könüllülər
arasında ən gəncinin 16, ən yaşlısının isə
72 yaşında olması
bu prosesin müxtəlif yaş kateqoriyasında olan şəxslər üçün cəlbedici
olduğunu göstərir. COP29 könüllülər
proqramının müraciətçiləri
arasında üstünlüyü
18-25 yaş aralığında
olanlar təşkil edir.
Bu yaş qrupu ümumi müraciət edənlərin
84 faizini təşkil
edir. Müraciətçilərin
11 faizi 16-18 yaş arası, 5 faizi 25 yaşdan yuxarı şəxslərdir.
- Könüllülər seçilərkən daha çox hansı meyarlara diqqət edilib?
- Ən məsuliyyətli
və vacib mərhələ olan seçim prosesində müraciətçilərin çox
olması seçim meyarlarına qarşı bizi daha həssas
olmağa təşviq
edib. Seçim prosesində müraciətçilərin
əvvəlki könüllülük
fəaliyyəti, özünü
ifadəetmə bacarığı,
komanda işi, tolerantlıq, dil bilikləri, problem həll etmə qabiliyyəti, stresin idarə olunması və liderlik xüsusiyyətləri kimi
meyarlar əsas götürülməklə yanaşı,
yalnız bizim komandamız tərəfindən
tətbiq olunan könüllülərin psixotiplərinin
müəyyənləşdirilməsi prosesi həyata keçirilib.
Sözsüz ki,
tətbiq etdiyimiz alətlər COP29 tədbirinə
ən yaxşı könüllülərin seçimi
prosesini asanlaşdırmaqla
bərabər, onların
uyğun olduqları fəaliyyət sahələrini
də öncədən
müəyyən etmək
üçün vacib
idi.
- COP29 könüllüləri hansı istiqamətlərdə
və hansı müddətdə fəaliyyət
göstərəcəklər?
- Könüllülər tədbirin əsas işçi qüvvəsidir.
Onlar qonaqların hava limanında avtobuslara mindirilməsi və hotellərə yerləşdirilməsindən, qonaqlara məkan daxilində dəstəyin
göstərilməsi prosesinə
qədər, demək
olar ki, əməliyyatların bütün
istiqamətlərində iştirak
edəcəklər. Bundan
əlavə, könüllülər
təkcə qonaqlarımıza
deyil, əməkdaşlarımıza
dəstəyin göstərilməsi,
media əməliyyatları
və dəstək komandasının üzvləri
olaraq BMT əməkdaşları
ilə çiyin-çiyinə
çalışaraq tədbirin
ən yaxşı formada təşkilində
yaxından iştirak edəcəklər.
COP29 konfransına qədər
olan müddətdə
keçirilən müxtəlif
tədbirlərin təşkilində
də könüllülərimiz
fəal iştirak edərək, təşkilatçılıq
prosesində komandamıza
yaxından dəstək
olublar. Oktyabrın
19-dan etibarən işə
başlayan akkreditasiya
və uniforma könüllüləri COP29 işçi
heyətinin akkreditasiya
və uniforma paylanması prosesində iştirak edirlər. Yaxın günlərdə
digər könüllü
komandalarımız da
konfransla bağlı müxtəlif istiqamətlər
üzrə işə
cəlb olunacaqlar.
- COP29 Könüllülük Proqramına xarici ölkələrdən müraciətlər
olubmu? Olubsa, əsasən, hansı ölkələrdir? Ümumilikdə,
neçə əcnəbi
Bakıda könüllü
kimi fəaliyyət göstərəcək?
- COP29 konfransı ölkəmizlə
yanaşı, dünya
gənclərinə də
maraqlıdır. Könüllülük
Proqramına start verdiyimiz andan etibarən xaricdən könüllü olmaq istəyən gənclərdən
də böyük sayda müraciətlər almağa başladıq. Xarici könüllülər
üçün də
müraciət imkanı
yaratmışdıq və
onlarla ayrılıqda
müsahibə və təlimlər təşkil
etdik. Ümumilikdə
80-dən çox əcnəbi
vətəndaş COP29-un könüllüsü
olaraq təşkilati işlərə qoşulacaq.
Xarici könüllülərimiz,
əsasən, Amerika Birləşmiş Ştatları,
Türkiyə, Almaniya,
Kolumbiya, Belarus, Cənubi
Koreya, Çin, Gürcüstan, Hindistan, Türkmənistan, Pakistan,
Nigeriya, Qırğızıstan
və digər ölkələrin vətəndaşlarıdırlar.
- Könüllüləri hər zaman düşündürən bir
sual var: Bu fəaliyyət onlara gələcəkdə
nə qazandıracaq? Könüllülüyün gələcək
iş fəaliyyəti
üçün hansı
müsbət tərəfləri
var?
- Könüllülük gələcək iş həyatı üçün
əvəzolunmaz təcrübədir.
Bu fəaliyyət könüllülərə peşəkar
bacarıqlarını inkişaf
etdirmək, komanda işi və liderlik qabiliyyətlərini
artırmaq, yeni insanlarla tanış olub şəbəkələşmək
imkanı yaradır. Eyni zamanda, beynəlxalq
tədbirlərdə iştirak
etməklə fərqli
mədəniyyətlər və
perspektivlərlə tanış
olmaq onların şəxsi və peşəkar inkişafına
müsbət təsir
göstərir.
Bu gün könüllülərin seçim
prosesini həyata keçirən işçi
qüvvəsi komandasında
əməkdaşlarımızın böyük əksəriyyəti
daha əvvəl keçirilmiş tədbirlərdə
könüllü olmuş
gənclərdir. Könüllülük
gənclərimiz üçün
möhtəşəm inkişaf
platformasıdır və
bu proqrama qoşulmaqla gənclərimiz
istər nəzəri,
istərsə də praktik olaraq vacib biliklər əldə edir, peşəkarlardan ibarət
komandaların tərkibində
işləmək imkanı
qazanırlar. Sözsüz
ki, əldə edilmiş biliklər gənclərimizin gələcək
inkişafında vacib
rol oynayacaq.
- COP29 Azərbaycanda formalaşmış könüllülük
fəaliyyətinə hansı
yeniliklər gətirib
və ya gətirəcək?
- Komandamız gənclərin
inkişafı və onların yetişdirilməsi
prosesinə xüsusi diqqət yetirir. İndiyə qədər keçirilmiş COP konfransları
tarixində ilk dəfə olaraq Azərbaycanda COP29 Akademiyası
təşkil edilib.
COP29 Akademiyasında mentorluq,
peşəkar inkişaf
və iş imkanları təklif edən genişmiqyaslı
layihə olmaqla, iştirakçıların iqlim
dəyişmələri, dayanıqlılıq
sahəsində yeni biliklər əldə etməsi istiqamətində
öyrənmə mədəniyyətinin
təşviqi prosesi həyata keçirilib. Akademiyada iştirak üçün çoxsaylı
müraciətlərin dəyərləndirilməsi
nəticəsində 29 nəfər
seçilərək COP29 Akademiyasının
iştirakçısı olmaq
imkanı əldə edib. İştirakçılar
2 ay müddəttində
fərdi və peşəkar inkişaf təlimlərində iştirak
etməklə yanaşı,
COP29 Azərbaycan Əməliyyat
Şirkətinin fərqli
şöbələrinin iş
prosesləri ilə də yaxından tanış olublar. Proqramın sonunda şöbələr tərəfindən
seçilmiş gənclər
həmin şöbələrin
tərkibində uğurlu
təcrübə keçib,
iş imkanı əldə ediblər. Hazırda 29 nəfər
COP29 Akademiyası məzunu
COP29 Azərbaycan Əməliyyat
Şirkətinin əməkdaşı
kimi fəaliyyət göstərir.
Müsahibəni apardı:
Əsmər QARDAŞXANOVA,
Azərbaycan.-2024.-
24 oktyabr (№ 234).- S.8.