Burada sabahın qurucuları yetişir

Söhbət Bərdə Dövlət Peşə Təhsili Mərkəzindən gedir

Təhsilin inkişafı Ümummilli Lider Heydər Əliyevin ən böyük önəm verdiyi məsələlərdən biri idi. Ulu Öndərin Azərbaycana rəhbərlik etdiyi dövrlərdə təhsilin təkmilləşməsinə, inkişafına dair strategiyalar hazırlanmış və onlar uğurla həyata keçirilmişdir. Bu zəngin irsin layiqli davamçısı Prezident İlham Əliyev də təhsilə, o cümlədən peşə təhsilinə xüsusi diqqətlə yanaşır.

44 günlük Vətən müharibəsində qazandığımız Zəfərdən sonra Qarabağa və Şərqi Zəngəzura Böyük qayıdışın başlanması, bu yerlərdə həyatın dirçəldilməsi, "ağıllı kənd və şəhərlər"in salınması bir sıra peşələrin hazırlanması məsələsini gündəmə gətirdi və sözsüz ki, bu sahədə əsas iş peşə məktəblərinin öhdəsinə düşdü.

Ölkəmizdə fəaliyyət göstərən belə təhsil və peşə ocaqlarından biri də Bərdə Dövlət Peşə Təhsil Mərkəzidir. Qeyd etmək lazımdır ki, 2020-2021-ci tədris ilindən başlayaraq vətəndaşlara elektron portal üzərindən sərbəst, ödənişsiz qeydiyyatdan keçərək PTM-lərə qəbul olmaq şansının verilməsi bu mərkəzin fəaliyyətinə də müsbət təsir göstərib. Mərkəz 1952-ci ildə Bərdə MTS-nin nəzdində mexanizasiya məktəbi adı altında fəaliyyətə başlayıb. 1966-cı ildən isə lisey statusu altında fəaliyyətini davam etdirib.

2016-cı ildə peşə təhsili və təliminin inkişafına dair strateji Yol Xəritəsi təsdiq ediləndən, Peşə Təhsili üzrə Dövlət Agentliyi yaradılandan və nəhayət, 2018-ci ildə peşə təhsili haqqında qanun qəbul olunduqdan sonra - 2016-2022-ci illərdə Bərdə Dövlət Peşə Təhsil Mərkəzində (DPTM) modernləşmə layihəsi həyata keçirildi. Layihənin başa çatmasından sonra - 2021-ci ildə Prezident İlham Əliyevin mərkəzin açılışında iştirak etməsi məktəbdə tədrisin səviyyəsinin daha da yüksəlməsinə əhəmiyyətli təsir göstərdi. Təsir həmçinin müəllimlərin, idarəetmə və təlim fəaliyyəti ilə məşğul olan işçilərin əməkhaqlarının artımında hiss olundu.

Modernləşdirmə layihəsindən sonra mərkəzin maddi-texniki bazası genişlənmiş və infrastrukturu yenilənmişdir. 1200 tələbə üçün tədris binası, 18 təlim emalatxanası, 3 fənn laboratoriyası, 57 sinif otağı, 2300 kitab olan kitabxana, hər biri 100 nəfərlik qız və oğlanlar üçün 2 yataqxana, 2 hektarlıq istixanası, 50 hektar təlim-təsərrüfat torpağı, qapalı idman zalı, açıq idman meydançaları, 400 nəfərlik akt zalı, 150 nəfərlik yeməkxanası, STEAM və Karyera İnkişaf mərkəzləri olan DPTM-də iqtisadiyyatın 8 peşə sahəsi üzrə tədris aparılır. Bunlar iqtisadiyyat və xidmət, kənd təsərrüfatı, energetika və informasiya texnologiyaları, metallurgiya, maşınqayırma və metal emalı, nəqliyyat vasitələri, inşaat və ilkin tələbat və ərzaq mallarının texnologiyası, kimyəvi və biokimyəvi texnologiyasıdır. Mərkəzdə 54 qrupda 40 ixtisas üzrə 1228 tələbə təhsil alır. 2024-2025-ci tədris ilində mərkəzin tələbə qəbulu planına "Dronların texniki xidməti və təmiri üzrə mütəxəssis", "Suvarma maşınları və nasos qurğuları maşinisti", "İnteryer dizayneri" kimi yeni ixtisaslar da əlavə olunmuşdur. Mərkəzdə Yüksək Texniki Peşə, Texniki Peşə və İlk Peşə təhsili pillələri üzrə tədris aparılır.

Layihənin icrasından sonra mərkəz bir çox nailiyyətə imza atmışdır. Onların arasında yerli və beynəlxalq əməkdaşlıqları vurğulamaq lazımdır. Bərdə DPTM Mingəçevir Dövlət Universiteti, Dövlət Məşğulluq Agentliyi, KOBİA, eləcə də Türkiyənin Bursa Həmidiyyə Texniki Anadolu Liseyi, Estoniyanın Jarvarmaa liseyi, Birləşmiş Millətlərin İnkişaf proqramı, Asiya Bankı, Erasmus+, AgriKontakte Almaniya Təcrübə Proqramı ilə sıx əməkdaşlıq edir. Yeri gəlmişkən, qeyd edək ki, 2022-2023-cü tədris ilində mərkəzin 3 tələbəsi Almaniyanın müxtəlif bölgələrində kənd təsərrüfatı üzrə təcrübə layihəsi çərçivəsində təcrübə keçmişdir. Bundan əlavə, mərkəzin tələbələri və mühəndis-pedaqoji heyəti Türkiyə və Estoniyada təcrübədə olmuşlar. DPTM-in STEAM mərkəzinin tələbələri isə yerli və beynalxalq yarışlarda uğurlu nəticələr qazanmışlar. Mərkəz eyni zamanda həm regionda, həm də ətraf bölgələrdə müxtəlif festivallara qatılır və bir çox mötəbər tədbirə bacarıqla evsahibliyi edir.

Bərdə DPTM-in direktoru Samir Nəcəfov söhbət zamanı mərkəzin hədəflərindən söz açdı:

- Bu peşə və təhsil ocağının yarandığı vaxtdan missiyası regionun əmək bazarının tələblərinə cavab verən kadrların hazırlanması olub. Mərkəzin gələcəyə baxış prespektivləri, çatmaq istədiyi əsas hədəf işəgötürənlərlə sıx əməkdaşlıq quraraq qarşılıqlı dəstək formasında kadr hazırlığı aparan peşə tədris müəssisəsinə çevrilməkdir. Eyni zamanda məqsəd kənd təsərrüfatı ixtisasları üzrə kompetensiya mərkəzi statusu qazanmaqdır. Peşə öyrədən qısamüddətli təlim kurslarının təşkil edilməsini də diqqət mərkəzində saxlayırıq. Dövlətin yaratdığı əlverişli, açdığı geniş imkanlardan maksimum istifadə edərək qarşıya qoyulan vəzifələri layiqincə yerinə yetirməyə çalışırıq. Qazanılan uğurlar bizi qətiyyən arxayınlaşdırmır, əksinə, dövlət və xalq qarşısında məsuliyyətimizi daha da artırır.

Bərdə Dövlət Peşə Təhsili Mərkəzi müasir görkəmi, səliqə-sahmanı ilə diqqət çəkir. Nizam-intizam hər addımda duyulur. Ən əsası odur ki, burada ölkə iqtisadiyyatının müxtəlif sahələri üçün peşəkar kadrlar hazırlanır. Heç şübhəsiz ki, mərkəzdə zəruri ixtisaslara yiyələnən gənclər sabah Qarabağın və Şərqi Zəngəzurun işğaldan azad olunmuş kəndlərinin, şəhərlərinin yenidən qurulmasında iştirak edəcəklər. Şəhidlərimizin qanı ilə suvarılan, azadlığa qovuşan vətən torpağı məhz qurucu yeni nəslin hünəri ilə cənnətə çevriləcək.

Lazım QULİYEV,

Azərbaycan .-2024.- 25 oktyabr (№ 235).- S.11.