Qərbin təzyiqləri Gürcüstanı yolundan döndərə bilməyəcək

"Oktyabrın 21-də Tbilisidə Azərbaycan Milli Qeyri-Hökumət Təşkilatları Forumunun təşəbbüsü ilə Gürcüstan və Azərbaycan QHT-ləri arasında ictimai iştirakçılıq mövzusunda informasiya mübadiləsi xarakterli konfrans keçirilib. Həmin tədbirdə Gürcüstan və Azərbaycan qeyri-hökumət təşkilatları, vətəndaş cəmiyyəti ekspertləri iştirak ediblər".

Bu barədə "Azərbaycan" qəzetinə danışan Azərbaycan Milli QHT Forumunun İdarə Heyətinin sədri Ramil İskəndərli bildirib ki, həmin görüşdə müzakirə olunan əsas məsələlər Azərbaycan və Gürcüstanın regionda müstəqil siyasət həyata keçirməsi, region üzrə gündəliyin müəyyən olunmasında söz sahibi olması və bunların bir sıra ölkələri qıcıqlandırması ilə əlaqədar olaraq yayılan müəyyən dezinformasiyalarla bağlı olub. Siyasi institutlarda son dövrlər Gürcüstana müəyyən təsir göstərmək məqsədilə bağlı qətnamələr qəbul edilir, bəyanatlar verilir, bu ölkə sanksiyalarla hədələnir. "Gürcüstanın "xarici agentlər"lə bağlı qanunu, həmçinin LGBT ilə bağlı təbliğatın qadağan olunması bəhanə kimi istifadə edilərək bu ölkəyə qarşı təzyiqlər artırılır. Seçkilərlə əlaqədar da təzyiqlər güclənib. Azərbaycan qeyri-hökumət təşkilatları Gürcüstanda sabit vəziyyətin olmasında maraqlıdır. Qeyri-hökumət təşkilatları kimi milli-mənəvi dəyərlərin qorunmasına çalışırıq, eyni zamanda Gürcüstanın müstəqilliyi uğrunda fəaliyyət göstərən, dövlətçilik və suverenliyi müdafiə edən təşkilatlarla əməkdaşlıq edirik. Gürcüstan qeyri-hökumət təşkilatlarını COP29 QHT koalisiyasının fəaliyyətinə cəlb etmək təklifini də vermişik. Artıq bir neçə gürcü qeyri-hökumət təşkilatı Milli QHT Forumunun təşəbbüsü ilə yaradılan bu koalisiyaya qoşulublar və bizimlə bu istiqamətdə fəal əməkdaşlıq edəcəklər", - deyə idarə heyətinin sədri deyib.

R.İskəndərli hesab edir ki, Gürcüstanda seçkilərdən sonra da QHT-lər, müstəqillik, suverenlik uğrunda çalışan təsisatlar öz fəaliyyətlərini normal davam etdirəcəklər. Qərbin və digər ölkələrin təzyiqləri bu sahədə hər hansı dəyişikliyə səbəb olmayacaq.

Azərbaycan Milli QHT Forumunun İdarə Heyətinin sədri onu da qeyd edib ki, ölkəmiz regionda müstəqil siyasət yürüdərək söz sahibi olduğuna görə Qərb, ABŞ, Fransa tərəfindən təzyiqlərə məruz qalır. Dövlətimizin müstəqil siyasəti onları müəyyən dərəcədə qıcıqlandırır: "Onlar öz maraqlarına uyğun siyasətin həyata keçirilməsini istəyirlər. Amma bu, əlbəttə ki, bizim regionda mümkün deyil. Bunu görmədikdə isə təzyiqləri, qarayaxma kampaniyalarını intensivləşdirirlər. Bizim əməkdaşlıq etdiyimiz qeyri-hökumət təşkilatları isə regionda sülhün tərəfdarıdırlar".

Əsmər QARDAŞXANOVA,

Azərbaycan.-2024.- 26 oktyabr (№ 236).- S.7.