"İlham Əliyev ölkəmizin qalib rəhbəri kimi alternativsiz liderdir"

Prezident seçkiləri hər bir ölkənin ictimai-siyasi həyatında son dərəcə əlamətdar hadisədir. Tarixi seçim qarşısında qalan, taleyüklü bir məsələnin iştirakçısı olan vətəndaş istər-istəməz dönüb keçilən yola baxır, qazanılan uğurları, buraxılan səhvləri, qaçırılan fürsətləri götür-qoy edir, qəbul edəcəyi qərarı, atacağı addımı müəyyən edir.

Yaşadığımız ömrün son 20 ili İlham Əliyevin Azərbaycana rəhbərlik etdiyi dövrə təsadüf edir. Bu 20 ildə biz azad bir xalq, müstəqil bir dövlət olaraq nələrə nail olduq, nə qazandıq, nə itirdik. Bu ritorik sualı bütün detalları ilə incələsək, heç şübhəsiz, qalın bir kitab alınar, gerçək bir uğur salnaməsi yaranar. Qısa və konkret cavabı isə belədir: bu gün Azərbaycan dünya miqyasında söz sahibidir, aparıcı dövlətlər, güc mərkəzləri ölkəmizlə hesablaşmaq zorundadırlar. Bu gün regionda, bütov Qafqazda Azərbaycanın iştirak etmədiyi, qol qoymadığı heç bir qlobal layihə reallaşmır.

Son ilin uğur salnaməsində qürurverici hadisələrin sayı-hesabı yoxdur. Tarixə qızıl hərflərlə yazılan xilaskarlıq missiyası - Azərbaycanın ərazi bütövlüyünün təminatı qəhrəman əsgərlərimizin hünəri, Silahlı Qüvvələrin müzəffər Ali Baş Komandanı İlham Əliyevin iradəsi, "dəmir yumruğ"u ilə gerçəkləşdi. İndi Qarabağ dağlarının qartalların qanad çaldığı zirvələrində qürur simvolumuz olan üçrəngli müqəddəs bayrağımız dalğalanır. Erməni faşistlərinin odlara qalayıb viran qoyduqları Qarabağın, Şərqi Zəngəzurun xarabalıqları üzərində yüksək zövqlə "ağıllı şəhərlər, kəndlər" salınır, yollar çəkilir, sosial infrastruktur yaradılır.

Son 20 ildə haradan hara gəldik. 2003-cü ildə prezidentliyə namizəd kimi Bərdədəki Türk "Qızıl Ay" çadır şəhərciyində öz seçiciləri ilə görüşdə İlham Əliyev əminliklə demişdi ki, Azərbaycanda bir çadır şəhərciyi də qalmayacaq, siz doğma yurdlarınıza dönüb orada yaşayacaqsınız. 20 il əvvəl verilən bu vədin reallaşdığı göz önündədir. İndi Qarabağ incisi Şuşa yenidən beynəlxalq tədbirlərin, festivalların keçirildiyi ünvana çevrilir. Laçın sürətlə dirçəlir, Kəlbəcərə keçilməz dağlardan yol çəkilir, Ağdam, Füzuli, Cəbrayıl, Zəngilan, Qubadlı büsbütün yenidən qurulur. Beləcə, Qarabağın, Şərqi Zəngəzurun böyük inşaat meydanına çevrilməsi hər könüldə təbii məmmunluq hissi doğurur.

Bu gün ölkəmizin bütün bölgələrində yüksək əhvali-ruhiyyə, xoş ovqat yaşanır. Tərtərlilərin məmnunluğuna, fərəh hissi keçirmələrinə bu gün daha çox haqları var desək, yəqin yanlış olmaz. 44 günlük savaşda tərtərlilər sözün həqiqi mənasında güllə, mərmi, raket yağışına məruz qaldılar. Amma bir nəfər də doğma evini tərk etmədi. 44 gün ərzində düşmən rayon mərkəzinə, digər yaşayış məntəqələrinə 16,2 mindən çox mərmi, qadağan edilmiş "Smerç" raketləri atdı, evləri, məntəqələri, xəstəxanaları, uşaq bağçalarını dağıtdı. O ağır günlər Prezident İlham Əliyevi, Birinci vitse-prezident Mehriban xanım Əliyevanı yanlarında görən, dövlət başçısının hərarətli əlini kürəklərində hiss edən tərtərlilər əsl qəhrəmanlıq nümunəsi göstərdilər, çətinliklərə mətanətlə sinə gərdilər. Övladları qəhrəmanlıqla şəhid olan analar göz yaşlarını silib, "Təki vətən yaşasın" deyib döyüşən orduya arxa-dayaq oldular.

Tərtərdə hamının adını böyük hörmət və ehtiramla çəkdiyi bir ana yaşayır. Şəhid Nicat İskəndərovun anası Maya xanım. Övlad itkisi saçlarına dən salsa da, nurlu çöhrəsində qırışlar açsa da, həmişə başını dik tutur, azad Qarabağın qeyrətli anası kimi...

Ölkəmizin növbədənkənar prezident seçkilərinə getdiyi bu tarixi günlərdə Maya xanım düşüncələrini bizimlə bölüşdü:

- İlham Əliyev Qarabağı azad edən, xalqımızı xəcalətdən qurtaran rəhbərdir. Mən oğul itirmişəm. Bu, ana üçün böyük dərddir. Amma təsəllimiz də böyükdür. 30 il erməni tapdağında olan Qarabağ indi bizimdir. Elə həmişəlik də bizim olacaq. Birinci vitse-prezident Mehriban xanım Əliyeva çətin günlərimdə mənimlə görüşüb təsəlli verib. Çox razıyam. İndi seçkilərə elə də çox vaxt qalmayıb. Xalqımızın tək bir seçimi var, o da İlham Əliyevdir. Çünki İlham Əliyev ölkəmizin qalib rəhbəri kimi alternativsiz liderdir.

Lazım QULİYEV,

Azərbaycan.-2023.- 20 dekabr, № 278.- S.4.