"İstənilən cavabı verməyə hazırıq"

İlham Əliyev Ermənistana və havadarlarına xəbərdarlıq etdi

Prezident İlham Əliyevin VII çağırış Milli Məclisin ilk iclasındakı çıxışı xalqa verilən uğur hesabatı olmaqla yanaşı, həm də Azərbaycanın gələcək prioritetlərini özündə ehtiva edən yol xəritəsi idi. Dövlət başçısının görülən işlər və ölkə qarşısında duran vəzifələr haqqında proqram xarakterli çıxışı həm də tarixin ən qüdrətli Azərbaycanının əyani təsviri idi.

Hərbi gücümüzün artırılması prioritetdir

Dövlət başçısı mühüm məsələlərə toxundu, gələcək vəzifələr və hədəflərdən söz açdı, mühüm mesajlar verdi. Prezidentin ilk olaraq hərbi gücün artırılması ilə bağlı söz açması isə təsadüfi deyildi. Çünki Vətən müharibəsində, antiterror tədbirlərində də məhz hərbi gücümüz vasitəsilə işğalçını cəzalandırmışıq, torpaqlarımızı işğaldan və separatizmdən xilas etmişik.

Müharibə bitsə də, Ermənistanda revanşizm meyilləri bitməyib. Rəsmi İrəvan sülhlə bağlı ara-sıra açıqlamalar versə də, sülh prosesində səmimi olmadığı gün kimi ortadadır. Əgər səmimi olsaydı, fəaliyyətini dayandırmış Minsk qrupunun hüquqi ləğvi üçün təşəbbüslər göstərərdi. Lakin görünən odur ki, Ermənistan gələcəkdə revanşizm niyyətlərini gerçəkləşdirmək üçün zəmin yaratmağa çalışır. Prezident İlham Əliyevin qeyd etdiyi kimi, bizim bütün təkidlərimizə rəğmən, Minsk qrupunu yenə də formal olaraq saxlamaq ancaq bir məqsədi güdə bilər ki, yenidən ölkəmizə qarşı ərazi iddiaları baş qaldırsın.

Ermənistanın sürətlə silahlanması da revanşizm niyyətlərindən irəli gəlir. Son zamanlar Fransadan və Hindistandan silah və hərbi texnikanın alınması da bu məkrə xidmət edir. Təbii ki, belə bir şəraitdə Azərbaycan dövləti hərbi gücünün daha da artırılmasını prioritet vəzifə kimi müəyyən edir. Prezident İlham Əliyevin qeyd etdiyi kimi, birnömrəli vəzifə hərbi gücümüzün artırılmasıdır: "Baxmayaraq ki, İkinci Qarabağ müharibəsi və antiterror əməliyyatı arxada qaldı, həm dünyada gedən proseslər, yeni münaqişə, müharibə ocaqlarının yaradılması və ətrafımızda gərginliyin artması, eyni zamanda Ermənistanda revanşizm meyilləri bizi bu sahəyə daim diqqət göstərməyə vadar edir".

Silahlı Qüvvələrimiz 4 il əvvəlkindən qat-qat güclüdür

Ümumiyyətlə, tarixi təcrübəmiz göstərir ki, Azərbaycan hələ Vətən müharibəsinə qədər hərbi gücünü artırmaqla öz milli hədəflərinə doğru olduqca müdrik və düzgün addımlar atıb. Çünki bu gün beynəlxalq hüquq demək olar ki, işləkliyini itirib. Prezident İlham Əliyevin çox düzgün və haqlı olaraq qeyd etdiyi kimi, "Kim güclüdür, o da haqlıdır" prinsipi üstünlük təşkil edir və artıq bəzi böyük dövlətlər bunu heç gizlətmirlər.

Vətən müharibəsinə qədər Azərbaycan beynəlxalq hüququn prinsiplərinə söykənərək torpaqlarını işğaldan azad etməyə çalışsa da, Ermənistanın arxasında duran siyasi mərkəzlər buna imkan vermədilər, beynəlxalq hüququ görməzdən gəldilər. Halbuki Qarabağ beynəlxalq səviyyədə Azərbaycan ərazisi kimi tanınırdı, üstəlik, BMT Təhlükəsizlik Şurası Azərbaycan ərazilərinin qeyd-şərtsiz azad edilməsi ilə bağlı 4 qətnamə qəbul etmişdi. Lakin həmin qətnamələrin qəbuluna səs vermiş siyasi mərkəzlərin özləri belə onun icrasına laqeyd münasibət bəsləməklə beynəlxalq hüququ tapdaladılar, problemin güc yolu ilə həllinin qeyri-mümkün olduğunu deməklə, işğala rəvac verdilər.

Belə bir şəraitdə Azərbaycan dövləti torpaqlarını güc yolu ilə azad etməsinin mümkünlüyünü gizlətmədi və hərbi gücünü artırdı, ordusunun döyüş imkanlarını ən müasir standartlar səviyyəsinə yüksəltdi. Vətən müharibəsi və antiterror tədbirlərində qazanılan zəfərlər Azərbaycanın öz hədəflərinə inamla çata bilən dövlət olduğunu dünyaya nümayiş etdirdi.

Vətən müharibəsindən sonra Azərbaycan öz hərbi gücünü artırıb və Silahlı Qüvvələrimiz 4 il əvvəlkindən qat-qat güclüdür. "İkinci Qarabağ müharibəsindən keçən dövr ərzində öz hərbi gücümüzü böyük dərəcədə artırmışıq, yeni silahlı birləşmələr yaradıldı, Xüsusi Təyinatlı Qüvvələrin say tərkibi bir neçə dəfə artırıldı. Yeni Xüsusi Təyinatlı Qüvvələr, Komando qüvvələri yaradıldı və onların da say tərkibi ildən-ilə artır və artacaq. Digər xüsusi təyinatlı silahlı birləşmələr yaradılmışdır və gecə-gündüz təlim işləri aparılır. Ordumuzun döyüş qabiliyyəti artır, texnika ilə təchizat lazımi səviyyədə təmin edilir və təmin ediləcəkdir", - deyə dövlətimizin başçısı bildirmişdir.

Prezident İlham Əliyev həm də silahlanan Ermənistana və onun arxasında duran dövlətlərə xəbərdarlığını etdi: "İstənilən cavabı verməyə hazırıq, buna qadirik və hər zaman buna hazır olmalıyıq".

Bəli, Azərbaycan müstəqil və qətiyyətli siyasəti olan dövlətdir. Vətən müharibəsi, torpaqlarımızda erməni separatçılığına son qoyulması da bunu təsdiq edir. Həm Ermənistan, həm də onun havadarları bilməlidirlər ki, Azərbaycanla təzyiq və ultimatum dilində danışmaq mümkün deyil.

Rəşad CƏFƏRLİ,

Azərbaycan.-2024.- 25 sentyabr (№ 209).- S.7.