Yeni dövrün inkişaf konsepsiyası açıqlandı

Dövlət başçısının Milli Məclisdəki çıxışı deputatların beşillik fəaliyyəti üçün yol xəritəsi olacaqdır

"VII çağırış Azərbaycan Respublikası Milli Məclisinin ilk iclasında Prezident İlham Əliyevin tarixi çıxışı bütövlükdə regionun inkişaf konsepsiyasını əhatələməklə deputatlar üçün yaxın 5 il üzrə fəaliyyətin yol xəritəsi hesab olunmalıdır. Möhtərəm cənab Prezident özünün parlamentdəki tarixi çıxışında ölkə üçün prioritet sayılan, eyni zamanda regionun geosiyasi simasını müəyyən edəcək qətiyyətli mövqe ifadə etməklə həm də Azərbaycan Respublikasının Milli Məclisinin bu istiqamətdə üzərinə düşən vəzifələrin sərhədlərini müəyyənləşdirdi".

"Azərbaycan" qəzetinə açıqlamasında Milli Məclisin deputatı Bəhruz Məhərrəmov deyib ki, dövlət başçısı ölkə Konstitusiyasında ifadə olunduğu kimi, Azərbaycan bütün dünya xalqları ilə sülh və əmin-amanlıq şəraitində yaşamaq niyyətini bəyan etməklə bərabər, həm də ölkəmizə qarşı təcavüzkar niyyətlər güdən çoxsaylı qüvvələrin davranışlarına müvafiq olaraq hərbi potensialının gücləndirilməsini ən vacib istiqamət kimi bəyan edib: "Ötən dövr ərzində Azərbaycanda ordu quruculuğu və müdafiə sənayesinin inkişaf etdirilməsi istiqamətində inqilabi addımlar atılıb. Vətən müharibəsində və antiterror tədbirlərində əldə edilən nəticələr, o cümlədən getdikcə dərinləşən ziddiyyətlər fonunda geosiyasi zəmində Azərbaycanın hərbi-siyasi güc kimi artan nüfuzu fonunda bunu çox aydın formada görmək mümkündür. Prezident İlham Əliyevin nitqindən göründüyü kimi, qarşıdakı dövrdə də Azərbaycan üçün hərbi qüdrətinin artırılması prioritet olaraq qalacaq və hakimiyyətin vacib qolu qanunverici orqan kimi Milli Məclisin də üzərinə bununla bağlı səlahiyyətləri çərçivəsində ciddi işlər düşür".

Deputat deyib ki, dövlət başçısının ifadə etdiyi kimi, xüsusən büdcə müzakirələri zamanı parlamentin hökumətin hərbi büdcənin artırılması ilə bağlı mütəmadi verdiyi qərarlara davamlı dəstəyi çox vacibdir. Sirr deyil ki, ötən dövr ərzində Azərbaycanın hərbi büdcəsi daim artan tempdə inkişaf edib, hər ötən il bu dəyişiklik statistikada və real göstəricilərdə inikasını tapıb. Milli Məclis hökumətin bu təşəbbüsünə daim birmənalı şəkildə dəstək verib, üstəlik, deputatlar bu artımların əhatə dairəsinin daha da genişləndirilməsi təklifləri ilə çıxış ediblər. Ayrı-ayrı dövlətlərdə büdcə müzakirələrinin siyasi böhrana çevrildiyi bir zamanda Azərbaycanda hakimiyyətin qolları arasında digər məsələlərdə olduğu kimi, bu istiqamətdə də vahid mövqedən çıxış edilməsi milli həmrəyliyin nümunəsi olmaqla bərabər ordu quruculuğu və müdafiə sənayəsinin inkişafına öz töhfəsini verib. Möhtərəm Prezidentin VII çağırış parlamentin ilk iclasında verdiyi bəyanatlar da məhz bu reallığın davamının təmin edilməsinin vacibliyini ehtiva edir.

B.Məhərrəmovun sözlərinə görə, müdafiə sənayəsinin inkişafı istiqamətində həyata keçirilən tədbirlər fonunda bu sferada özəl sektorun rolunun artırılması istiqamətində tədbirlərə də qanunvericilik bazası çərçivəsində dəstək verilməsi vacibdir. Prezidentin cari situasiyadan məmnunluğu da onu göstərir ki, Azərbaycanda bu istiqamətdə də hakimiyyət qolları arasında çox ciddi uzlaşma var və ölkəmiz hərbi-siyasi güc mərkəzi kimi özünün təsdiqi istiqamətində Prezident İlham Əliyevin rəhbərliyi altında uğurlu birgəfəaliyyət nümunəsi formalaşdırıb.

Deputat vurğulayıb ki, dövlət başçısının çıxışının çox vacib istiqamətlərindən biri də milli təhlükəsizlik elementləri ilə bağlı olub. Xüsusən Azərbaycanın sərhəd təhlükəsizliyinin etibarlı təmini istiqamətində dövlətin müəyyən etdiyi konsepsiyasının özünü doğrultması fonunda ölkə rəhbərinin ali tribunadan verdiyi bəyanatlar, əslində, bu istiqamətdə gələcək fəaliyyətin konturlarının müəyyən olunması baxımından çox vacib əhəmiyyətə malikdir. Quru sərhədlərin bağlı qalması ilə əlaqədar bir sıra qüvvələrin manipulyasiyaları fonunda möhtərəm Prezidentin cari vəziyyəti cəmiyyətin diqqətinə çatdırması, xüsusən bu situasiya ilə Azərbaycanın əldə etdiyi dividendlər milli təhlükəsizliyin daha etibarlı formada təmini istiqamətində nəticələrin cəmiyyətə kommunikasiya olunması xüsusi qeyd edilməlidir.

B.Məhərrəmov deyib ki, Azərbaycanın xarici siyasət kursu, həmçinin milli mənəvi dəyərlərin qorunması, ideoloji sahədə fəaliyyətin gücləndirilməsi ilə bağlı Prezidentin çıxışında toxunduğu məqamlar, həmçinin bu istiqamətdə qanunverici orqanın fəaliyyətinin hərəkətverici qüvvəsi kimi çıxış edəcək: "Bu mənada əminliklə demək olar ki, VII çağırış Milli Məclisin ilk iclasında dövlət başçısının irəli sürdüyü tezislər, əslində, Azərbaycanın yeni dönəmdə inkişaf konsepsiyasının əsası, bütövlükdə regionun dayanıqlı təhlükəsizlik mühitinə qovuşması istiqamətinə aydın yol xəritəsi hesab olunmalıdır.

Əsmər QARDAŞXANOVA,

Azərbaycan.- 2024.- 25 sentyabr (№ 209).- S.7.