2025-ci
ilin dövlət büdcəsi qarşıya qoyulan
bütün prioritet vəzifələrin tam yerinə yetirilməsinə
imkan verəcək
2025-ci ildə
icmal büdcənin gəlirləri 44 milyard 371,4 milyon manat səviyyəsində
proqnozlaşdırılır. Bu, 2024-cü ilin göstəricisinə
nisbətən 856,4 milyon manat və ya 2 faiz artım deməkdir.
İcmal büdcə xərcləri isə növbəti ildə
45 milyard 867 milyon manat proqnozlaşdırılır ki, bu da
cari illə müqayisədə 240,2 milyon manat çoxdur.
İlham ƏLİYEV:
"Düşünülmüş islahatlar siyasəti öz
bəhrəsini verməkdədir"
Azərbaycan
Respublikasının 2025-ci ilin dövlət və icmal büdcələrinin
ilkin göstəricilərinə dair açıqlama bir
neçə gün əvvəl ictimaiyyətə təqdim
olunub. Sentyabrın 24-də isə Nazirlər Kabinetində
Baş nazir Əli Əsədovun sədrliyi ilə
keçirilmiş hökumətin iclasında 2025-ci il üzrə
dövlət büdcəsinin və icmal büdcənin layihələri
və sonrakı üç il üçün icmal büdcənin
göstəriciləri, 2025-ci il və sonrakı üç il
üzrə iqtisadi və sosial inkişaf konsepsiyası və
proqnoz göstəriciləri müzakirə olunub.
İclasda
qeyd olunub ki, qlobal miqyasda artan geosiyasi gərginliklərə,
beynəlxalq əmtəə bazarlarında volatil qiymətlərə
və dünya ölkələrində borc və büdcə
kəsirinin artmasına baxmayaraq, ölkəmizdə
makroiqtisadi və maliyyə sabitliyi təmin olunmuşdur.
Sentyabrın
26-da iqtisadi məsələlərə həsr olunmuş
müşavirədə də Prezident İlham Əliyev
2024-cü ildə iqtisadi sferada əldə olunan nəticələri
yüksək qiymətləndirmişdir. Dövlət
başçısının qeyd etdiyi kimi, iqtisadiyyatın
şaxələndirilməsi istiqamətində
atılmış addımlar müsbət nəticələrini
verməkdədir: "İqtisadi artım 4,3 faiz təşkil
edib. Bugünkü dünyada gedən prosesləri təhlil edərkən
və ümumiyyətlə, geosiyasi vəziyyətə nəzər
saldıqda deyə bilərəm ki, bu, çox müsbət
göstəricidir. İqtisadi inkişaf templəri inkişaf
etmiş bir çox ölkələrdə olan iqtisadi
inkişaf templərini üstələyir. Xüsusi əhəmiyyət
daşıyan məqam ondan ibarətdir ki, qeyri-neft sektorumuz 7
faiz artmışdır. Bu da onu göstərir ki, ölkə
iqtisadiyyatının şaxələndirilməsi istiqamətində
atılmış addımlar və
düşünülmüş islahatlar siyasəti öz bəhrəsini
verməkdədir".
8 ayda
qeyri-neft sektorunda 7 faiz, qeyri-neft sənayesində isə 7,8
artım qeydə alınmışdır. Bütövlükdə,
müsbət makroiqtisadi şərait növbəti ilin
dövlət büdcəsini də pozitiv məzmunda tərtib
etməyə imkan vermişdir.
Xərclərin
17 faizi müdafiə və təhlükəsizlik məqsədlərinə
yönəldiləcək
Növbəti
il və ortamüddətli dövr üçün budcə
siyasəti prioritet çağırışlar nəzərə
alınmaqla müəyyən edilmişdir. Bu
çağırışlar "2022-2026-cı illərdə
sosial-iqtisadi inkişaf Strategiya"sında nəzərdə
tutulan tədbirlərin həyata keçirilməsi, Qarabağ
və Şərqi Zəngəzurun bərpası, yenidənqurulması,
ölkə iqtisadiyyatına reinteqrasiyası və ərazilərə
Böyük qayıdışın təmin edilməsi,
ölkənin hərbi-müdafiə qabiliyyətinin və təhlükəsizliyinin
gücləndirilməsi, əhalinin sosial müdafiəsinin
gücləndirilməsi və rifah halının
yaxşılaşdırılması, dayanıqlı iqtisadi
artımın dəstəklənməsi, makroiqtisadi sabitliyin və
büdcə dayanıqlılığının təmin
olunması, Naxçıvan Muxtar Respublikasının
sosial-iqtisadi inkişafına dair 2023-2027-ci illər
üçün Dövlət Proqramı"nın
icrasının diqqət mərkəzində
saxlanılmasıdır.
Gələn
il dövlət büdcəsinin gəlirləri 36 milyard 616
milyon manat proqnozlaşdırılır. Bu da 2024-cü ilin təsdiq
olunmuş göstəricisi ilə müqayisədə 228
milyon manat, 2023-cü ilin icra göstəriciləri ilə
müqayisədə isə
1 milyard 379,6
milyon manat çoxdur. Növbəti ilin dövlət büdcəsinin
xərcləri 39 milyard 667,6 milyon manat nəzərdə
tutulur.
Prezident
İlham Əliyev bir neçə gün əvvəl yeddinci
çağırış Azərbaycan Respublikası Milli Məclisinin
ilk iclasında çıxışında bildirdi ki, dövlətimizin
qarşısında dayanan başlıca vəzifə hərbi
gücümüzün artırılmasıdır. "Birinci
nömrəli vəzifə hərbi gücümüzün
artırılmasıdır. Baxmayaraq ki, İkinci Qarabağ
müharibəsi və antiterror əməliyyatı arxada
qaldı, həm dünyada gedən proseslər, yeni
münaqişə, müharibə ocaqlarının
yaradılması və ətrafımızda gərginliyin
artması, eyni zamanda Ermənistanda revanşizm meyilləri bizi
bu sahəyə daim diqqət göstərməyə vadar edir.
Hərbi gücümüz olmasa, biz heç bir müstəvidə
- nə iqtisadi, nə siyasi müstəvidə uğur qazana
bilmərik", - deyə dövlətimizin
başçısı bildirdi.
Buna görə
ordumuzun döyüş imkanlarının daha da gücləndirilməsi,
milli təhlükəsizlik potensialının
artırılması, müdafiə sənayesi kompleksinin
müasir çağırışlara uyğun olaraq
inkişaf etdirilməsi hər zaman olduğu kimi, gələn
il də diqqət mərkəzində olacaq. Gələn ilin
dövlət büdcəsində müdafiə və milli təhlükəsizlik
xərcləri ümumi büdcə xərclərinin 17 faizini
təşkil edəcək.
Azad
edilmiş ərazilərin bərpası üçün 4
milyard manat ayrılması nəzərdə tutulur
Vətən müharibəsindən sonra Azərbaycanın prioritet hədəflərindən biri də işğaldan azad edilmiş torpaqların bərpasıdır. Prezident İlham Əliyev yeddinci çağırış Azərbaycan Respublikası Milli Məclisinin ilk iclasında çıxışında bildirdi ki, müharibədən sonra bu ilin sonuna qədər xərclənməyə nəzərdə tutulan vəsait 19 milyard manatdır. Ötən 4 ilə yaxın müddətdə Qarabağ və Şərqi Zəngəzurda saysız-hesabsız infrastruktur layihələri həyata keçirilib. 3 min kilometr avtomobil yolu inşa edilib, 2 aeroport istifadəyə verilib, 270 meqavat gücündə su-elektrik stansiyaları yaradılıb. İndiyədək 8 min nəfərdən artıq məcburi köçkün Qarabağ və Şərqi Zəngəzura qayıdıb.
İşğaldan
azad edilmiş ərazilərin bərpası 2024-cü ildə
də yüksək templə davam etdiriləcək. Bunu gələn
ilin dövlət büdcəsi layihəsində bu məqsəd
üçün nəzərdə tutulmuş xərcin
miqyası da təsdiq edir. Belə ki, "Böyük
Qayıdışa dair I Dövlət Proqramı"nın
icrası, işğaldan azad olunmuş ərazilərə
dönüşün təmin edilməsi üçün
şəhər və kəndlərin yenidən qurulması və
bərpası, həmin ərazilərdə müasir
infrastrukturların yaradılması məqsədilə 2025-ci
ilin dövlət büdcəsindən 4 milyard manat vəsait
ayrılması nəzərdə tutulur.
Bütövlükdə,
gəlir və xərclər göstərir ki, 2025-ci ilin
dövlət büdcəsi qarşıya qoyulan bütün
prioritet vəzifələrin tam yerinə yetirilməsinə
imkan verəcək.
Rəşad
CƏFƏRLİ,
Azərbaycan.-2024.-
29 sentyabr (№213).- S.4.