İqtisadi inkişaf uğurlarımızın əsasıdır

Azərbaycan dünyaya yüksəliş modelini təqdim edib

"Azərbaycan xalqı düşmən üzərində qazandığı tarixi qələbəsi, suverenliyin tam təmin edilməsi, beynəlxalq aləmdə əldə edilən uğurları, eləcə də ölkənin iqtisadi inkişafı, həyat şəraitinin yaxşılaşdırılması, ictimai-siyasi sabitliyi, insanların birlik və həmrəyliyi ilə fəxr edə bilər. Azərbaycan iqtisadiyyatının davamlı və dayanıqlı olması inkişafımıza yeni yollar açır".

"Azərbaycan" qəzetinə açıqlamasında Milli Məclisin Aqrar siyasət komitəsinin sədri Tahir Rzayev bildirib ki, bu ilin əvvəlindən qazanılan nəticələr, iqtisadi artımın 4,3 faiz təşkil etməsi, qeyri-neft sektorunda 7 faizlik artımın əldə edilməsi, xarici borcun ümumi daxili borca nisbətdə 7,5 faiz olması, inflyasiyanın aşağı düşməsi, iqtisadi sahədə yeni layihələrin hazırlanması və həyata keçirilməsinə qərar verilməsi bunu deməyə əsas verir.

Prezident İlham Əliyevin iqtisadi məsələlərə həsr olunmuş müşavirədə söylədiyi kimi, ölkə iqtisadiyyatının şaxələnməsi istiqamətində atılmış addımlar və düşünülmüş islahatlar siyasəti öz bəhrələrini verməkdədir. Azərbaycan dünyaya özünün iqtisadi inkişaf modelini təqdim edib, həm də bu modelin təkmilləşdirilməsi təşəbbüsündədir. Bir çox ölkələr tərəfindən qəbul edilən və təsdiqlənən bu model dövlətimizin və xalqımızın milli maraqlarına, mövqeyinə xidmət etməklə bərabər, həm də dünya iqtisadiyyatına töhfə verməyə, iqtisadi sahədə əməkdaşlığın möhkəmləndirilməsinə hesablanıb. "44 günlük Vətən müharibəsindən və 23 saatlıq antiterror tədbirlərindən sonra Azərbaycana maraq daha da artıb. Neft-qaz sektorunda yeni layihələrin hazırlanması, bu sahədə əməkdaşlığın genişləndirilməsi, yeni yataqların hasilat həcminin yüksəlməsi, qeyri-neft sektoruna xarici sərmayələrin cəlb edilməsi üçün təşviq layihələrinin həyata keçirilməsi ölkəmizin iqtisadi inkişafını sürətləndirməkdədir. Dövlətimizin başçısı müşavirədə bildirib ki, Azərbaycanda hökm sürən sabitlik və proqnozlaşdırılan vəziyyət, eyni zamanda dövlətin güclənməsi, ərazi bütövlüyümüzün, suverenliyimizin tam bərpa edilməsi xarici investorların bizə olan münasibətini təbii olaraq daha da yaxşılaşdırıb. İnvestisiyaların adambaşına düşən həcminə görə Azərbaycan qabaqcıl ölkələr sırasındadır", - deyə o əlavə edib.

T.Rzayev qeyd edib ki, iqtisadi müstəqilliyini təmin edən dövlətimiz müstəqil xarici siyasət aparmaq imkanlarına da yiyələnib. Məhz bunun nəticəsidir ki, bu gün Qarabağın və Şərqi Zəngəzurun bərpa edilməsi, qurulması, abadlaşdırılması insanların sosial rifah halının yaxşılaşdırılması, mühüm layihələrin həyata keçirilməsi istiqamətində əsaslı tədbirlərin görülməsi mümkün olub. Prezident İlham Əliyev VII çağırış Milli Məclisin ilk iclasında bu məsələlərin, görülən möhtəşəm işlərin vacibliyini qeyd etdiyi kimi, müşavirədəki çıxışında da ölkəmizin hərbi potensialının gücləndirilməsinə, təhlükəsizliyin təmin edilməsinə, dövlət sərhədlərinin qorunmasına, hərbi sənaye kompleksinin inkişafına, Qarabağ və Şərqi Zəngəzurun bərpa edilməsinə böyük önəm verdiyini bildirərək, sosialyönümlü məsələlərlə, sosial infrastrukturla bağlı olan layihələrin Dövlət İnvestisiya Proqramında öz əksini tapacağını qeyd edib.

T.Rzayev vurğulayıb ki, əldə olunan uğurlar nəticəsində Azərbaycanın iqtisadi inkişaf modeli dünyada özünü təsdiqləyib: "İlin əvvəlindən iqtisadi inkişafın gözlənilən səviyyədə olması, proqnozların reallaşması, dayanıqlı inkişaf modelinin təkmilləşdirilməsi sahəsində səmərəli tədbirlərin həyata keçirilməsi, sağlam müzakirələr aparılması, lazımi qərarlar qəbul edilməsi iqtisadi inkişafı sürətləndirib və bundan sonra da irəliləməsinə zəmin yaradıb. Bu inkişaf aqrar sektorda da özünü göstərməkdədir. 2023-cü ilin müvafiq dövrü ilə müqayisədə bu il 4,3 faiz çox, 81,0 milyard manatlıq ümumi daxili məhsul istehsal edilməsi, eləcə də kənd təsərrüfatının ümumi məhsulunun 0,8 faiz, o cümlədən heyvandarlıq məhsulları istehsalının 1,3 faiz, bitkiçilik məhsulları istehsalının 0,3 faiz artımı ilin uğurlu nəticəsi sayılmalıdır, hələ ilin yekununda bu rəqəmlərin artımı gözlənilir".

O qeyd edib ki, Prezident İlham Əliyevin iqtisadi məsələlərə həsr olunmuş müşavirədə söylədiyi fikirlər, qarşıya qoyduğu vəzifələr ilk növbədə xalqımızın milli maraqlarına xidmət edir, inkişafımızı əsaslandırır. Bu, xoşbəxt həyatımızın təmin olunmasına istiqamətlənməklə, əmin-amanlığa, əməkdaşlığa, birliyə yollar açır. Bu yollar dövlət rəhbərinin düşünülmüş siyasətindən, insanlığa qayğısından, müstəqilliyimizin və suverenliyimizin qorunması sahəsində apardığı mübarizədən, sülhə, demokratiyaya, insan haqlarına, haqq-ədalətə, hörmət və ehtiramdan keçir.

Bu yol qürurvericidir, uğurludur və onu davam etdirmək gələcəyimizə yeni töhfələr verəcək, uğurlar qazandıracaq.

Əsmər QARDAŞXANOVA,

Azərbaycan.-2024.- 29 sentyabr (№213).- S.4.