Gələn il əməkhaqqı və sosial ödənişlərdə gözlənilən artımlardan 2 milyondan artıq vətəndaş bəhrələnəcək

Azərbaycan dövlətinin apardığı sosial-iqtisadi siyasətdə vətəndaşların rifahının yaxşılaşdırılmasının əsas hədəf olması yeni fakt deyil. İndiyədək bu istiqamətdə görülən tədbirlərin, qəbul və icra edilən sənədlərin ölkəmizdə vətəndaşın sosial güvənliyinin təminatına olan münasibətin həssaslığını sübut edir.

Bu baxımdan sentyabrın 26-da keçirilən iqtisadi müşavirədə dövlət başçısının gələn il də əhalinin sosial müdafiəsinin yaxşılaşdırılacağını bəyan etməsi gözlənilən idi: "Mən artıq bəyan etdim ki, gələn il minimum əməkhaqqı və minimum pensiya artırılacaq, baxmayaraq ki, inflyasiya çox aşağı səviyyədədir, baxmayaraq ki, ölkə qarşısında duran vəzifələr böyük maliyyə vəsaiti tələb edir, ilk növbədə hərbi, hərbi sənaye kompleksinin inkişafı, Qarabağın və Şərqi Zəngəzurun bərpası ilə bağlı. Bütün bunlara baxmayaraq, biz həssas təbəqə sayılan vətəndaşlarımızın da rifah halının yaxşılaşdırılması üçün əlimizdən gələni edirik".

Sentyabrın 24-də isə Nazirlər Kabinetində növbəti ilin dövlət büdcəsinin və icmal büdcəsinin layihələri müzakirə olunmuşdir. Həmin tədbirdə 2025-ci ilin dövlət büdcəsi və icmal büdcəsinin layihələri ilə yanaşı, sonrakı üç il üçün icmal büdcənin göstəriciləri, gələn il və sonrakı üç il üzrə iqtisadi, sosial inkişaf konsepsiyası, həmçinin proqnoz göstəriciləri ətraflı təhlil edilmişdir.

Baş nazir Əli Əsədov da müzakirə zamanı sosial sahəyə xüsusi diqqət çəkmişdir. Bildirmişdir ki, 2025-ci ildə də büdcənin əsas xərc istiqamətlərindən biri əhalinin sosial müdafiəsi və sosial təminatı olacaq. Şəhid ailələrinə, qazilərə diqqət və qayğı dövlət siyasətinin prioritetləri sırasında qalmağa davam edəcək. Bütövlükdə bütün istiqamətlər üzrə sosialyönlü xərclər dövlət büdcəsi xərclərinin 43 faizini təşkil edəcək. Gələn il əməkhaqqı və sosial ödənişlərdə gözlənilən artımlardan 2 milyondan artıq vətəndaş bəhrələnəcək. Müasir innovativ təhsilin inkişafı və əhalinin keyfiyyətli tibbi xidmətlərə çıxışının yaxşılaşdırılması üçün növbəti ilin dövlət büdcəsindən daha böyük vəsait ayrılacaq.

Prezident İlham Əliyev 7-ci çağırış Azərbaycan Respublikası Milli Məclisinin ilk iclasındakı nitqində dövlətin sosial sahədə gördüyü bu işlərə qiymət verərək demişdir: "Əlbəttə, bizim gələcək planlarımızı həll etmək, o cümlədən vətəndaşların sosial rifahını yaxşılaşdırmaq üçün iqtisadiyyat daim inkişaf etməlidir. Çünki biz 2018-ci ildən bu yana dörd sosial islahatlar paketi həyata keçirmişik. Bu sosial islahatlar paketinin məbləği 7 milyard manatdır və bu, 4 milyon insanı əhatə edir. Son beş il ərzində Azərbaycanda minimum əməkhaqqı 2,7 dəfə, minimum pensiya 2,5 dəfə artmışdır. Onu da bildirməliyəm, artıq göstəriş verildi ki, gələn ildən minimum əməkhaqqı və minimum pensiya yenə də artırılacaqdır".

Artım isə elə bu il də kifayət qədər yüksəkdir. Dövlət Statistika Komitəsinin məlumatına görə, cari ilin yanvar-iyul aylarında ölkə iqtisadiyyatında muzdla çalışan işçilərin orta nominal əməkhaqqı ötən ilin müvafiq dövrünə nisbətən 8,3 faiz artaraq 1002,4 manat olmuşdur. Əməkhaqqı neft-qaz sektorunda 3782,9, qeyri-neft-qaz sektorunda 950,6 manata çatmışdır. Həmin dövr dövlət müəssisələrində çalışan işçilərin əməkhaqqı 958,7, özəl müəssisələrdə isə 1048,5 manat olmuşdur. Ümumilikdə vətəndaşların nominal gəlirlərinə gəldikdə, cari ilin yanvar-avqust aylarında bu göstərici keçən ilin eyni dövrü ilə müqayisədə 6,1 faiz artaraq 53 milyard 947,2 milyon manat olmuşdur.

Rüstəm KAMAL,

Azərbaycan.-2024.- 29 sentyabr (№213).- S.13.