Fransanın iddiaları qərəzli və əsassızdır

Ötən il dekabrın 4-də Fransa vətəndaşı Martin Rian casusluqda şübhəli bilinərək tutuldu. Daha sonra onun barəsində məhkəmə qərarı ilə 4 ay müddətinə həbs qətimkan tədbiri seçildi. Azərbaycan tərəfi həmin Fransa vətəndaşı barəsində tədbirlər görərkən milli qanunvericiliyə və beynəlxalq öhdəliklərə tam olaraq əməl etdi. Lakin Fransanın Avropa və Xarici İşlər Nazirliyi iddia etdi ki, guya, Fransa vətəndaşı ölkəmizdə əsassız olaraq tutulub. Bu, tamamilə absurd olmaqla yanaşı, Parisin Azərbaycanın daxili işlərinə və qanuni təhqiqat prosesinə növbəti müdaxilə cəhdidir.

Bu mövzu ilə bağlı "Azərbaycan" qəzetinə danışan Milli Məclisin Aqrar siyasət komitəsinin sədri Tahir Rzayev bildirib ki, Fransanın anti-Azərbaycan mövqeyi heç bir beynəlxalq normaya uyğun gəlmir: "Bu ədalətsiz mövqe bilavasitə müstəqil dövlətin daxil işlərinə qarışmaqdır. Görünür, bu, uzun illər dünyada müstəmləkəçilik siyasəti yürüdən bir ölkə olaraq Fransanın dövlət siyasətinin əsasına çevrilib. Heç kimə sirr deyil ki, 50-dən çox ölkədə Fransanın müxtəlif hərbi bazaları, obyektləri, hərbçiləri yerləşib. Paris elə bunların hesabına iqtisadiyyatını qurub".

Komitə sədri söyləyib ki, Fransa vətəndaşının əsassız olaraq tutulduğu barədə Fransanın Avropa və Xarici İşlər Nazirliyinin iddiaları da ölkəmiz barədə mütəmadi olaraq qaldırdıqları iddialar kimi əsassızdır. Fransa tərəfi Azərbaycanın daxili işlərinə və təhqiqat tədbirlərinə müdaxiləni dayandırmalıdır.

Tahir Rzayev həmçinin bildirib ki, Azərbaycan-Fransa münasibətlərinin inkişafı istiqamətində həm Ulu Öndər Heydər Əliyevin dövründə, həm də Prezident İlham Əliyevin hakimiyyətdə olduğu illərdə işlər görülüb: "Lakin təəssüflər olsun ki, Fransa dövləti bunu heç zaman qiymətləndirməyib. Bu gün Fransa Ermənistandan çox ermənilik edir. Bunun əsas səbəbi isə Ermənistana dəstək vermək, bu xalqın xoşbəxtliyinə, uğurlu gələcəyinə nail olmaq deyil. Sadəcə olaraq, Fransa Ermənistanda mövqelərini möhkəmləndirməklə Cənubi Qafqazda özünə yer tutmaq istəyir. Fransa Afrikada, eləcə də digər ölkələrdə müstəmləkəçilik meyilləri xeyli zəiflədiyinə görə yeni siyasi şans qazanmaq istəyir. Ona görə də dünyada böyük dövlətlərdən biri kimi varlığını təsdiq etmək üçün Cənubi Qafqazda möhkəmlənmək niyyətinə düşüb".

Komitə sədri qeyd edib ki, Paris bu məqsədlərinə Ermənistan vasitəsilə çatacağını düşünsə də, yanılır: "Bütün bunlar əfsanədir, reallaşmayacaq xəyallardır. Çünki Azərbaycan müstəqil və qətiyyətli siyasət yürüdən, iqtisadiyyatını möhkəmləndirən, beynəlxalq aləmdə böyük nüfuza malik olan bir dövlətdir. Azərbaycan bir çox beynəlxalq normaların həyata keçirilməsində təşəbbüskardır. Elə ona görə də dünyanın əksər ölkələri Azərbaycanın yürütdüyü siyasətə müsbət dəyər verir və onu yüksək qiymətləndirirlər".

Tahir Rzayevin sözlərinə görə, Fransa prezidenti Makronun, eləcə də Fransa parlamentarilərinin, siyasi dairələrinin Azərbaycan əleyhinə apardıqları təbliğat heç bir nəticə verməyəcək. Azərbaycan haqq və ədalət yolundadır, dövlət siyasətini uğurla həyata keçirir. Fransa isə tutduğu yoldan dönməli, xalqının mənafeyini dərindən düşünməlidir. Çirkin təbliğat vasitələrindən, xeyirsiz məqsədlərdən əl çəkməlidir.

Nəzrin QAFARZADƏ,

Azərbaycan.-2024.- 11 yanvar, № 4.- S.1-10.