Antiislamçı, türk düşməni, uğursuz aktyor

Fransanın yeni hökumət başçısı "zəngin" bioqrafiyaya malikdir

Fransa prezidenti Emmanuel Makronun 34 yaşlı Qabriel Attalı baş nazir təyin etməsinin əsas səbəbi 2027-ci ildə keçiriləcək növbəti prezident seçkilərində onun keçmiş hökumət başçısı Eduar Filiplə rəqabət aparmağa hazırlanmasıdır. Baxmayaraq ki, onun qeyri-ənənəvi oriyentasiyası - cinsi azlıqların nümayəndəsi olması qələbəsinə mane ola bilər…

Bunu Fransanın Siyasi Araşdırmalar Mərkəzinin eksperti Alen Polikar bildirib. Qeyd edilib ki, Makronun strategiyası münasibətləri kəskin şəkildə pozulmuş Filipin qarşısına sədd çəkməkdir. Attal prezident seçkilərində qalib gəlmək üçün ən yaxşı namizəd hesab olunur. Makron hər şeyə rəğmən kölgədə qalan dostunu seçib, çünki Attalın siyasi arenada peyda olmasına şərait yaradan məhz özüdür. O, Makrona bağlıdır və yəqin ki, Fransa lideri Attalın sona qədər ona sadiq qalacağına və növbəti prezident seçkilərində etibarlı namizəd ola biləcəyinə inanır.

Fransada cinsi azlıqların nümayəndəsi olduğunu gizlətməyən ilk siyasətçi

Ekspertin fikrincə, bütün sorğularda fransızların Makronun ikinci prezidentlik müddəti bitdikdən sonra prezidentliyə ən çox ehtimal olunan namizəd adlandırdıqları Eduar Filip üçün Qabriel Attal ciddi "maneə" olacaq. O hesab edir ki, Makron digər mümkün namizədlər - daxili işlər naziri Cerald Darmanen və maliyyə naziri Bruno Le Merin fonunda "silahdaş yox, ortaq şərik" seçib. Belə ki, onlar hazırkı prezidentin kölgəsində yer almaqla kifayətlənməyəcəklər.

Eyni zamanda ona həvalə edilmiş vəzifələrin öhdəsindən uğurla gələn Attalın seçimində işgüzar imici də rol oynayıb. Attalın rəhbərlik etdiyi hökumətlə Makron həm də iyunda keçiriləcək Avropa Parlamenti seçkilərində itkiləri azaltmağa ümid edir.

Attal həm də parlament çoxluğu olmadığı halda qanun layihələrini qəbul edərkən Makronun arxalandığı respublikaçıların rəğbətini qazanıb.

Eyni zamanda, ekspertin fikrincə, Attalın gəncliyi onun həm üstünlüyü, həm də mənfi tərəfi ola bilər. O həm də varlı bir ailədə böyüyüb və Parisin ən nüfuzlu özəl məktəbində oxuyub. Bu isə onun xalqdan "uzaq düşməsi" hesab olunur və buna görə Makron özü də tez-tez qınaq obyektinə çevrilir.

Attal həm də ölkənin başında olan və qeyri-ənənəvi oriyentasiyasını gizlətməyən ilk siyasətçidir. Bu, Yelisey Sarayına gedən yolda maneə ola bilər. Belə ki, artıq ölkədə madam Attal olmayacaq, Fransada isə həmişə birinci xanım olub. Fransızların bunu qəbul edib-etməyəcəkləri sual altındadır. Onu da qeyd edək ki, Fransada baş nazirin prezident seçkilərində qalib gəlməsi ilə bağlı presedent olmayıb.

Attalın "əri" Stefan Sejurne qatı azərbaycanofobdur

Qabriel Attal 1989-cu il martın 16-da Klamarda anadan olub, Parisdə böyüyüb. 2010-cu ildə Pantheon-Assas Universitetinin Hüquq fakültəsini, 2013-cü ildə Siyasi Araşdırmalar İnstitutunu bitirib və burada ictimaiyyətlə əlaqələr üzrə magistr dərəcəsi alıb. 2006-cı ildə Sosialist Partiyasına qoşularaq siyasi karyerasına başlayıb. 2012-ci ildə Fransa Milli Assambleyasında təcrübə keçdikdən sonra o, sosial məsələlər və səhiyyə nazirinin müşaviri olub.

2016-cı ildə Emmanuel Makronun "İrəli!" hərəkatına qoşulmaq üçün Sosialist Partiyasını tərk edib. 2017-ci ildə Fransa Milli Assambleyasının üzvü olub.

2018-ci ilin oktyabrında Qabriel Attal təhsil nazirinin dövlət katibi vəzifəsinə təyin edilib və bu onu Beşinci Respublika hökumətinin ən gənc üzvü edib. 2020-ci ilin iyul ayında o, hökumətin sözçüsü və Fransanın baş naziri Jan Kasteksin dövlət katibi təyin edilib. 2022-ci ilin may ayında Attal Elizabet Born hökumətində İqtisadiyyat və Maliyyə naziri yanında İctimai Hesablamalar üzrə nümayəndə - nazir təyin olunub. 2023-cü ilin iyulunda yeni kadr dəyişikliyi nəticəsində Qabriel Attal milli təhsil və gənclərlə iş üzrə nazir vəzifəsini alıb və Makron hökumətində ən gənc nazir olub.

Ötən ilin avqustunda ermənipərəst siyasətçi ölkənin təhsil müəssisələrində ənənəvi müsəlman qadın geyimləri olan abayaya qadağa qoyub. 2023-cü ilin sentyabrında Fransa Dövlət Şurası bu qərarı təsdiqləyib. Onun erməni diasporu ilə sıx əlaqələri olduğu bildirilir.

Qabriel Attal həm də özünü kinoda sınayıb və iki filmdə çəkilib. Yeni baş nazirin "həyat yoldaşı" Stefan Sejurne Avropa Parlamentinin üzvü və Azərbaycana qarşı fəal siyasət aparan qatı azərbaycanofobdur. Azərbaycan işğal olunmuş ərazilərini erməni separatçılarından azad etdikdən sonra onun təşəbbüsü ilə Avropa Parlamenti bir neçə dəfə anti-Azərbaycan qətnamələri qəbul edib.

Rizvan CƏFƏROV,

Azərbaycan.-2024.- 11 yanvar, № 4.- S.10.