Seçkilər İlham Əliyevə yüksək etimadın növbəti təntənəsi olacaq

"Prezident İlham Əliyevin rəhbərliyi ilə 2020-ci ildə torpaqlarımızı işğaldan azad etdik və qalib xalqa çevrildik. Bununla da Azərbaycan yeni mərhələyə qədəm qoydu. Bu gün isə daha iri addımlarla yeni zəfərlərə doğru irəliləyirik. Biz bu mərhələdə dövlətçiliyimizi, müstəqilliyimizi daha da gücləndirməli və təhlükəsizliyimizi qorumalıyıq. Bu mənada fevralın 7-nə təyin olunmuş növbədənkənar prezident seçkiləri xüsusi əhəmiyyətə malikdir".

Bu fikirləri "Azərbaycan" qəzetinə açıqlamasında Milli Məclisin deputatı Ceyhun Məmmədov deyib. Deputat bildirib ki, xalqımızın doğru seçimi bizi gələcəkdə təhdid edə biləcək məsələlərdən qoruyacaq. Xalqımız yenə də ən düzgün seçimini edəcək.

Ceyhun Məmmədov qeyd edib ki, bu, Zəfər seçkisidir, çünki ilk dəfədir ki, prezident seçkiləri ərazi bütövlüyü və suverenliyi tam bərpa edilmiş Azərbaycan torpaqlarında, bütün şəhər və rayonlarımızda keçiriləcək: "Bizə bu qələbəni yaşadanın isə Prezident İlham Əliyev olduğunu unuda bilmərik. Ulu Öndərin layiqli varisi İlham Əliyev son 20 ildə Azərbaycanın inkişafında müstəsna xidməti olan liderdir. Məhz onun rəhbərliyi ilə Azərbaycan öz torpaqlarını işğaldan azad etdi. Bu gün azad və müstəqil bir dövlət kimi fəaliyyətimizi davam etdirdiyimizə, dünyada gündən-günə daha çox nüfuz sahibi olduğumuza görə İlham Əliyevə borcluyuq. Qarşıda isə hədəflərimiz və planlarımız var. Bu məqsədlərimizə nail olmaq üçün prezident seçkilərinin keçirilməsinə ehtiyac vardı".

Deputatın sözlərinə görə, 2024-cü ilin regionda kifayət qədər mürəkkəb olacağı ehtimal edilir: "Ona görə də bizim də dövlət olaraq daha ayıq-sayıq olmağımıza, düşünülmüş və ölçülüb-biçilmiş bir siyasət həyata keçirməyimizə ciddi ehtiyac var. Azərbaycan xalqı hər zaman öz Prezidentinin ətrafında sıx birləşib, vətəndaş mövqeyini ortaya qoyub. Biz əminik ki, budəfəki seçkilərdə də xalqımızın nümayəndələri öz vətəndaş borclarını ləyaqətlə yerinə yetirəcəklər".

Ceyhun Məmmədov əlavə edib ki, vətəndaşlarımız düzgün seçim edərək bizi daha böyük uğurlara, qələbələrə aparacaqlar. Ona görə də siyasi aktivlik nümayiş etdirilməli, prezident seçkilərində fəallıq göstərməliyik. Azərbaycan xalqı dövlətimizin parlaq gələcəyinə, inkişafına, ölkəmizdəki əmin-amanlığa, bir sözlə, yeni zəfərlərə səs verəcək.

Deputatın sözlərinə görə, fevralın 7-də keçirilən növbədənkənar prezident seçkiləri xalqın İlham Əliyevə ehtiram və etimadının növbəti sübutu olacaq. Bu, təsadüfi deyil, çünki artıq 20 ildən çoxdur Azərbaycanın bütün uğurları məhz Prezident İlham Əliyevin adı ilə birbaşa bağlıdır. Ali Baş Komandan, Prezident İlham Əliyev Azərbaycanda iqtisadi dayanıqlılığı təmin edən, vətəndaşların sosial rifah halını hər ötən il daha da yaxşılaşdıran, regionun ən güclü ordusunu quran və ən əsası Qarabağ və Şərqi Zəngəzuru işğaldan azad edən dahi şəxsiyyətdir.

Azərbaycan.-2024.- 12 yanvar, № 5.- S.4.