ATƏT nümayəndələri Bərdədə seçkilərə hazırlığın gedişi ilə tanış olublar

Son 30 ildə ilk dəfədir ki, respublikamızda prezident seçkiləri ölkəmizin ərazi bütövlüyü şəraitində keçirilir. 44 günlük müharibənin və bir günlük uğurlu antiterror əməliyyatının parlaq qələbə, tarixi zəfər soraqlı nəticəsinin doğurduğu yüksək əhvali-ruhiyyə, yaratdığı xoş ovqat hələ də vətənsevdalı könüllərin təsəllisidir.

İşğaldan azad edilmiş ərazilərdə aparılan möhtəşəm quruculuq işləri Ermənistan silahlı qüvvələrinin analoqu olmayan vandallıqla dağıtdıqları, viran qoyduqları kəndlərin, şəhərlərin xarabalıqları üzərində ucaldılan müasir tipli "ağıllı" yeni yaşayış məntəqələri, uğurla reallaşan nəhəng infrastruktur layihələri xalqımızın qələbəyə köklənmiş əhvali-ruhiyyəsinə yeni çalarlar qatır.

Xalqımız qarşıdakı 7 fevral növbədənkənar prezident seçkilərinə qalib, qurucu, sülhpərvər əhvali-ruhiyyə ilə gedir. Bu seçki həm də ən yaxın keçmişin hesabatı olacaq, qarşıdakı hədəflərimizi müəyyən edəcəkdir. Biz dünyanı heyrətə salan yeni müharibə qaydaları ilə 30 il işğalda inləyən Qarabağı azad etdik. İndi isə Qarabağı və Şərqi Zəngəzuru yenidən qururuq. Gündəmdə isə 7 fevral növbədənkənar prezident seçkilərini yüksək səviyyədə, azad, demokratik və şəffaf keçirilməsini təmin etmək kimi son dərəcə məsul və şərəfli vəzifə durur.

Ölkəmizin bütün bölgələrində seçkilərə hazırlıq Azərbaycan Respublikasının Seçki Məcəlləsinin tələblərinə uyğun qaydada davam etdirilir. Dairə və məntəqə seçki komissiyaları növbədənkənar prezident seçkilərinin hazırlanıb keçirilməsi üzrə əsas hərəkət və tədbirlərin təqvim planına uyğun fəaliyyət göstərirlər.

99 saylı Bərdə şəhər Seçki Dairəsində də işlər ahəngdar gedir. Dairə seçki komissiyasının sədri Dilsuz Nəcəfov söhbət zamanı bildirdi ki, dairə 58 məntəqəni əhatə edir. Məntəqələrin texniki təminatı yüksək səviyyədədir. Seçki məntəqələrinin 17-si şəhərdə, 41-i isə kəndlərdə yerləşir. 11 məntəqədə VEB kamera quraşdırılıb. Bütün məntəqələr zəruri inventarlarla təmin edilib və telefonlaşdırılıb.

Dilsuz Nəcəfov Dairə Seçki Komissiyasının tərkibindən danışarkən onu da bildirdi ki,

9 nəfərdən ibarət komissiyada 3 nəfər Yeni Azərbaycan, 3 nəfər parlamentdə azlıqda olan Böyük Qurtuluş, Bütöv Azərbaycan Xalq Cəbhəsi və Real partiyalarını təmsil edir. Öyrəndik ki, son məlumata görə, dairə üzrə seçicilərin sayı 51.669 nəfərdir. Seçici siyahıları diqqətlə araşdırılır. Ərazidə yeni qeydə alınan, yaxud köçüb başqa yerlərə gedən vətəndaşların adları dəqiqləşdirilir. Bu isə o deməkdir ki, seçici sayı dəyişə bilər.

99 saylı Bərdə şəhər Seçki Dairəsində hazırlıq işlərinin gedişi ilə tanış olarkən burada ATƏT-in ölkəmizdəki uzunmüddətli missiyasının nümayəndələri ilə görüşdük. ATƏT-i təmsil edən beynəlxalq müşahidəçilər - Varela Serra Ella, Speldel Juergen seçki hazırlığı mühiti ilə tanış olmaq üçün rayonlara səfər etmişdilər. Avropalı qonaqlar dairə seçki komissiyasının üzvləri ilə görüşdə məntəqələrdəki mövcud vəziyyətlə tanışlığın təəssüratlarını bölüşdülər, faydalı təkliflər verdilər. Onlar seçkilərə hazırlıq prosesinin yüksək səviyyədə getdiyini bildirdilər, demokratik tələblərə əməl olunduğunu vurğuladılar.

Lazım QULİYEV,

Azərbaycan.-2024.- 12 yanvar, № 5.- S.6.