Onun ən böyük arzusu torpaqlarımızın azadlığı idi

O, Əliyevlər ailəsinin yeganə oğlu idi... Yayda toyunu eləmək, evə gəlin gətirmək istəyirdilər... Şamaxı Rabitə Kollecində təhsil alan İradə adlı bir qızla bir-birinə könül vermişdilər. Lakin həyat axarındakı qəfil dəyişiklik hər şeyi alt-üst etdi - bir ömür yarıda qırıldı, digərini sonsuz dərd, nisgil ağuşuna aldı... Ürəyindəki Vətən eşqi digər sevgilərə üstün gəldi.

44 günlük qalibiyyət dolu Vətən savaşımızın qəhrəman şəhidi Əliyev Rauf İlyas oğlu 1993-cü il fevralın 11-də Şamaxı şəhərində doğulub. 1999-cu ilin sentyabrından şəhid Elşən Hüseynov adına Şamaxı şəhər 2 saylı tam orta məktəbdə oxuyub. 2004-2008-ci illərdə Şamaxı İmadəddin Nəsimi adına 1 saylı musiqi məktəbində tar ixtisası üzrə təhsil alıb, sonra Sumqayıt şəhər Soltan Hacıbəyov adına Musiqi Kollecinə qəbul olunub. 2012-ci ildə kolleci bitirərək oktyabrın 10-da həqiqi hərbi xidmətə çağırılıb. Əmək fəaliyyətinə 2015-ci il yanvarın 5-dən Qobustan şəhər Rəşid Behbudov adına Uşaq İncəsənət Məktəbində başlayıb.

Azərbaycan xalqı şəhadət şərbətini 1990-cı ilin 20 Yanvarında içdi və imperiya qandallarını qıraraq əbədi dövlət müstəqilliyi qazandı. Lakin düşmənlərin təcavüzkar siyasətinin bir hissəsinin acı nəticəsi olan Qarabağ münaqişəsi 30 il idi ki, ərazilərimizin iyirmi faizində bu suverenliyin bərpası və Əsas Qanunumuzun işləməsinin qarşısını alırdı.

Nəhayət, Prezident İlham Əliyevin qətiyyəti və xalqımızın şəhidpərvərliyindən qaynaqlanan 2020-ci ilin 27 sentyabr - 10 noyabr təntənəli Zəfər yürüşü erməni işğalına birdəfəlik son qoydu. Hələ bu tarixə qədər də - 2016-cı ilin aprelində Lələtəpə-Cocuq Mərcanlıda, 2020-ci ilin iyununda Tovuzda - dəfələrlə xain hücuma keçən yağı düşmən geri oturduldu. Artıq Birinci Qarabağ savaşından xeyli vaxt keçmişdi, igid övladlar böyüyüb şəhid atalarının qisasını alırdılar. Əlavə olaraq, yeni bir müqəddəs ənənə də formalaşmışdı: gənclər şəhid Mübarizi, Fəridi, Raqufu, Poladı həyat amalı seçərək onların yolu ilə gedir, müqəddəs cihadın başlanacağı günü səbirsizliklə gözləyir, fürsət düşəndə düşmənə divan tuturdular.

Bu barədə anası Səbinə xanım danışır: "21 sentyabr 2020-ci il tarixdə Silahlı Qüvvələrin hərbi təlim, yoxlama və xüsusi toplanışına çağırılmışdı. Qapıdan çıxanda qarşısını kəsdim, dedim, ay oğul, 3 ildir nişanlısan, toyun yubanır, görüləsi başqa işlərimiz də var, bəlkə getməyəsən... Cavab verdi ki, ana, nə danışırsan, toy gözləyər, Vətən dardadır, Polad Həşimov kimi generalımız şəhid oldu, biz kimik?.."

Yeganə oğul itkisinin ailəyə, xüsusən valideynlərə hansı zərbəni vurduğunu anlamaq çətin deyil. Atası İlyas dayının beli bükülüb, səhhətində müxtəlif problemlər yaranıb, geniş dünyagörüşə malik, dərin adam olsa da, çox danışmağı sevmir, dünyanın ən ağır yükünü ürəyində daşıyır...

Rauf Milli Ordu sıralarında, cəbhə bölgəsində - Ağdamın Yusifcanlı kəndindəki "N" saylı hərbi hissədə xidmət keçir. Bacarıqlı əsgər kimi bölükdə 2012-ci ilin oktyabrında baş atıcı, 2013-cü ilin yanvarında heyət nəfəri, aprelin 2-də məsafə ölçən, oktyabrın 10-da isə manqa komandiri vəzifələrinə təyin olunur. Kəşfiyyatçı koordinator olan çavuş Rauf Əliyev 2013-cü ilin noyabr ayında düşmənin törətdiyi təxribat zamanı öz əsgərlərini qoruyaraq ayağından və kürəyindən yaralanır. Həqiqi hərbi xidmətini 2014-cü il aprelin 3-də təltiflərlə başa vuraraq tərxis edilir...

Uşaqlıq dostu Kamran Kərimov, cəbhə yoldaşları Kamil Vahabov, Abuzər Əliyev və Əhəd Şahverdiyev də şəhidimiz barədə ürək yanğısı, amma qürurla söhbət açdılar: "Vətən müharibəsinin ilk günlərində birlikdə döyüşmüşük. Rauf öndə hərəkət edən kəşfiyyat qrupuna könüllü qatılaraq Tərtər-Ağdərə istiqamətində gedən döyüşlərdə fəal iştirak etdi. Talış yüksəkliyi və Suqovuşanın azad olunmasında böyük qəhrəmanlıq, şücaət göstərmişdir. İgid döyüşçü, sədaqətli dost idi... Ərazidə "Ağ uçuq" deyilən meşə sahəsi vardı, orada düşmənin minamyot atəşinə düşdü... Bir təsəllimiz var ki, işğaldan azad olunmuş Vətənin səmasında azad dolaşan ruhu şaddır!"

Rauf Əliyev 2020-ci il sentyabrın 30-da günorta saatlarında şəhidlik zirvəsinə ucalaraq, oktyabrın 1-də Şamaxı Şəhidlər xiyabanında torpağa tapşırıldı. Azərbaycan Respublikası Prezidentinin 15 dekabr 2020-ci il tarixli sərəncamı ilə ölümündən sonra "Vətən uğrunda" medalı ilə təltif olundu.

Qurban MƏMMƏDOV

Azərbaycan.-2024.- 12 yanvar, № 5.- S.7.