Düşmən Azərbaycan əsgərinin gücünü gördü

Torpaq yolunda şəhid olanlar heç vaxt unudulmur, heç vaxt yaddan çıxmır. Xalq belə cəsur oğul və qızlarını daim hörmətlə anır, ehtiramla xatırlayır. Əsgər Kərimli Orxan Akif oğlu da 19 yaşında torpaqlarımızın azadlığı uğrunda gedən döyüşlərdə şəhid olub. Ürəyi Vətən eşqi ilə döyünən Orxan lap gənc yaşlarından yurdunun müdafiəsinə atılıb.

27 sentyabr 2020-ci ildə erməni təxribatı nəticəsində Vətən müharibəsi başlayanda Orxan Kərimli əsgər idi. "N" hərbi hissəsində xidmət edir, Vətən qarşısındakı övladlıq borcunu ləyaqətlə yerinə yetirirdi. Keçirilən təlim-məşqlərdə fəal iştirak edir, hərbi bilik və döyüş vərdişlərini böyük həvəslə öyrənirdi. Sentyabr ayının son günlərində erməni işğalçıları yeni ərazilərimizi zəbt etmək üçün qəflətən mövqelərimiz üzərinə hücuma keçdilər. Orxanın xidmət etdiyi hərbi hissənin şəxsi heyətini də döyüşlərə cəlb etdilər...

Kərimli Orxan Akif oğlu 6 oktyabr 2001-ci ildə Göyçay rayonunda anadan olmuşdu. 2007-ci ilin sentyabrında şəhərdəki 7 nömrəli məktəbdə oxumağa başlamışdı. 2018-ci ildə Naxçıvan Dövlət Universitetinin Sosial idarəetmə və hüquq fakültəsinə qəbul olunmuşdu.

Birinci kursu bitirdikdən sonra Orxan Kərimli hərbi xidmətə çağırılmışdı. "N" hərbi hissəsində xidmətə başlamışdı. Üç ay təlim keçib, hərbi biliklərə və silahların sirlərinə yiyələnmişdi. Artilleriya qurğularının sirlərini dərindən öyrənmişdi. Bir müddətdən sonra Tovuz döyüşləri başlamışdı. Hərbi hissələrinə "həyəcan" çağırışı verilsə də, şəxsi heyət döyüşə cəlb olunmamışdı.

Orxangili döyüşlərə 44 günlük Vətən müharibəsi başlayanda cəlb etdilər. Onların hərbi hissələrinin zabit və əsgərləri Kəlbəcər istiqamətində, Murovdağ uğrunda vuruşurdular. Müharibə başlayan gündən Orxan artilleriya qurğusundan düşmənlərin başına od ələyirdi, qəsbkarlara qan uddururdu. Hərbi vəzifəsi baş tuşlayıcı olan O.Kərimli düşmən hədəflərini dəqiq atəş zərbələri ilə məhv edirdi. Əsgər yoldaşları ilə bərabər dəfələrlə ölümlə üzləşsələr də, mövqelərindən bir addım da olsun geri çəkilmədilər.

Müharibənin 12 günü arxada qalmışdı. Təəssüflər olsun ki, qəsbkarların atdığı mərmilərdən biri oktyabrın 9-da Orxangilin atəş mövqeyinin yaxınlığına düşdü. Əsgər O.Kərimli aldığı qəlpə yarasından şəhid oldu.

Həmin gün onun evinin qapısını acı xəbər döydü. Əsgər Orxan Kərimli 19 yaşında torpaqlarımızın azadlığı uğrunda gedən döyüşlərdə canından keçmişdi. Yaxınları, doğmaları onu Göyçay şəhərinin Şəhidlər xiyabanında dəfn etdilər. Orxan həmin gündən yaddaşlara köçüb əbədilik qazandı.

Döyüşlərdə göstərdiyi igidliyə və cəsarətə görə ölümündən sonra əsgər Kərimli Orxan Akif oğlu Azərbaycan Respublikasının Prezidenti İlham Əliyevin sərəncamları ilə "Cəsur döyüşçü", "Vətən uğrunda", "Kəlbəcərin azad olunmasına görə", "Qubadlının azad olunmasına görə" medallarına layiq görüldü.

V.MƏHƏRRƏMOV,

Azərbaycan.-2024.- 12 yanvar, № 5.- S.7.