Azərbaycanı yeni hədəflərə doğru aparan Lider

"Prezident İlham Əliyev Azərbaycan televiziyalarına müsahibəsində bütün məsələlərə aydınlıq gətirdi, eləcə də ölkəmizə qarşı düşmənçilik siyasəti həyata keçirən, təxribatlar törədən və qərəzli mövqe tutan dövlətlərə, xüsusən Ermənistan və ona havadarlıq edən Fransaya önəmli mesajlar ünvanladı. Hər ötən gün bir daha əmin oluruq ki, 2003-cü ildə xalqımız ölkəmizin gələcək inkişafı, müstəqil Azərbaycanın güclü dövlətə çevrilməsi üçün düzgün seçim edərək İlham Əliyevi Azərbaycan Respublikasının Prezidenti seçdi".

Bu sözləri "Azərbaycan" qəzetinə açıqlamasında Milli Məclisin deputatı Kamilə Əliyeva deyib. Deputat bildirib ki, Azərbaycan xalqı hər zaman Ümummilli Lider Heydər Əliyevin siyasi kursunun davam etdirilməsinə səs verib. Son 20 ildə Prezident İlham Əliyev Ulu Öndər Heydər Əliyevin siyasi və iqtisadi siyasətini inkişaf etdirərək Azərbaycanı dünyada güclü ölkələr sırasına yüksəldib. Dövlət başçısının 20 illik siyasəti Azərbaycanın 20 sentyabr qələbəsi, suverenliyimizin tam bərpa olunması ilə nəticələndi. Məhz sentyabrın 20-dən sonra müasir tariximizin yeni dövrü başladı.

Kamilə Əliyeva qeyd edib ki, ikili standartların hökm sürdüyü, beynəlxalq hüququn işləmədiyi müasir dünyada güclü dövlət yaratmaq və onu inkişaf etdirmək heç də asan deyil: "Prezident İlham Əliyevin qətiyyətli və güclü siyasi iradəsi, diplomatik bacarığı, müdrik siyasəti nəticəsində isə Azərbaycan qısa müddətdə qüdrətli dövlətə çevrildi. Otuz ilə yaxın işğal altında qalan torpaqlarımızı dünyanın güclü orduları sırasında yer alan Azərbaycan Silahlı Qüvvələri 44 günün içində işğaldan azad etdi. 2023-cü il aprelin 23-də Laçın sərhəd- buraxılış məntəqəsinin yaradılması, sentyabrın 19-da həyata keçirilmiş antiterror tədbirlərinin uğurla başa çatdırılması ilə Azərbaycanın ərazi bütövlüyü və suverenliyi tam bərpa olundu. Xocalıda Azərbaycan bayrağının ucaldılması, Xocalı qurbanlarının qisasının alındığı gün oldu. Prezident İlham Əliyevin Xankəndidə Azərbaycan bayrağını dalğalandırması Zəfərimizin zirvə nöqtəsi idi".

Deputatın sözlərinə görə, Prezident müsahibəsində Azərbaycanla Ermənistan arasında sülh müqaviləsinin bağlanması istiqamətində görülən işlər barədə də məlumat verdi: "Vətən müharibəsində Azərbaycanın qələbəsindən sonra dövlət başçısı Ermənistan rəhbərliyinə sülh müqaviləsinin bağlanması üçün beynəlxalq hüquqa əsaslanan 5 baza prinsipdən ibarət təklif ünvanladı. Ermənistan rəhbərliyi isə əsassız bəhanələr gətirərək sülh sazişinin imzalanmasına maneələr törədir. Qərbdəki bəzi dövlətlərin, xüsusən də Fransanın təsiri altında olan Paşinyan özündə cürət tapıb sərbəst siyasət yürüdə bilmir. Dövlətimizin başçısı dəfələrlə bəyan edib ki, sülh müqaviləsinin bağlanması istiqamətində danışıqların iki ölkə arasında aparılması sülhün bərpasını tezləşdirə bilər".

Kamilə Əliyeva onu da deyib ki, sərhədlərin delimitasiyası prosesində və iki ölkə arasında nəqliyyatın, kommunikasiyaların açılmasında Ermənistan üzərinə düşən öhdəlikləri yerinə yetirmir: "Artıq 3 ildir Ermənistan Orta dəhlizin bir hissəsi olan Zəngəzur dəhlizinin açılmasına mane olur. Zəngəzur dəhlizi Azərbaycanın əsas hissəsini Naxçıvanla birləşdirən yol olmaqla yanaşı, Avropa ilə Asiya arasında iqtisadi cəhətdən ən səmərəli və qısa marşrut xəttidir. Əslində, bu, Azərbaycandan çox Ermənistan üçün həyati əhəmiyyətli marşrutdur.

Deputat əlavə edib ki, Azərbaycan İranla bu ölkənin ərazisindən keçməklə Naxçıvana dəmir və avtomobil yollarının çəkilməsi barədə razılığa gəlib, artıq bu istiqamətdə işlərə başlanılıb. Bu yol həm də "Şimal-Cənub" marşrut xəttinin inkişaf etməsinə səbəb olacaq. Ermənistan yenə də dalanda qalacaq. Ermənistan rəhbərliyi anlamalıdır ki, gələcəkdə siyasi və iqtisadi cəhətdən inkişaf etmələri üçün Azərbaycanla səmimi qonşuluq əlaqələri qurmalı, nəqliyyat dəhlizlərinin açılması üçün işlər görməlidirlər. Azərbaycanın irəli sürdüyü təkliflər beynəlxalq hüquqa əsaslanır və bölgədə sülhün, ədalətin bərpasına xidmət edir. Ermənistan rəhbərliyi isə bəzi ölkələr, xüsusən Fransanın diktəsi ilə hərəkət edir.

Fransanın tarixboyu müstəmləkəçilik siyasəti həyata keçirdiyini bildirən deputat qeyd edib: "Fransa illərboyu Afrika və Şərqi Asiya dövlətlərinə, dənizaşırı bölgədə yerləşən xalqlara qarşı talançılıq və soyqırımı siyasəti yürüdüb. Ermənistan torpaqlarımızı işğal altında saxlayan zaman Fransa hər zaman bu dövlətə və onun işğalçılıq siyasətinə dəstək verib. Vətən müharibəsində şanlı qələbəmizdən sonra ölkəmizə qarşı düşmənçilik siyasətini daha da genişləndirib. Makron administrasiyası və Fransa Senatı ölkəmizə qarşı təxribat və qərəz dolu bəyanatlar səsləndirməyə başlayıblar. Bəzi hallarda Azərbaycana qarşı hədələrlə dolu bəyanatlar səsləndirirlər. Fransa düşünürdü ki, zəif, gücsüz dövlətlərə qarşı həyata keçirdiyi bu siyasəti Azərbaycanda da həyata keçirə biləcək və ölkəmiz onların diktəsi ilə hərəkət edəcək. Makron anlamadı ki, qarşısındakı qüdrətli Azərbaycan dövlətidir və bu dövlətin İlham Əliyev kimi güclü lideri, mahir diplomatı, beynəlxalq hüququ mükəmməl bilən, milli və dövlət maraqlarını uca tutan Prezidenti var".

Kamilə Əliyeva vurğulayıb ki, Prezident İlham Əliyev bütün beynəlxalq tədbirlərdə Fransanın müstəmləkəçi siyasəti aparan dövlət olmasını açıq şəkildə dünyaya bəyan edir. Halbuki Prezidentimizdən başqa, heç bir dövlət başçısı Fransanın müstəmləkə siyasəti həyata keçirməsi barədə həqiqəti heç vaxt səsləndirməmişdi. Prezident

İlham Əliyev tərəfindən yaradılmış Bakı Təşəbbüs Qrupu dünyada özünü demokratiyanın beşiyi adlandıran Fransanın əsl simasını bütün dünyaya nümayiş etdirir. Təşəbbüs qrupuna üzv ölkələrdə Fransaya qarşı böyük etirazlar baş qaldırıb. Bütün sahələrdə Azərbaycana uduzan Makron hakimiyyəti mədəni irsimizə qarşı cılız və iyrənc siyasət həyata keçirir. Fransanın Evian-Le-Ben şəhərində Natəvanın heykəlinə qırmızı boya atılması və onun üzərinin örtülməsi Makron hakimiyyətinin nə qədər cılız və aciz olduğunun göstəricisidir".

Növbədənkənar prezident seçkiləri ilə bağlı Kamilə Əliyeva qeyd edib ki, budəfəki seçkilər Azərbaycanın bütün ərazilərində keçiriləcəyinə görə xüsusi əhəmiyyət kəsb edir. Digər tərəfdən, torpaqlarımız artıq işğaldan azad edilib, ərazi bütövlüyümüz və suverenliyimiz tam bərpa edilib. Artıq yeni hədəflərə doğru irəliləmək zamanıdır.

Nəzrin QAFARZADƏ,

Azərbaycan.-2024.- 14 yanvar, № 7.- S.3.