Seçicilərin fəallığı seçki məntəqələrinin fəaliyyətindən də asılıdır

39 saylı Gəncə 2-ci Seçki Dairəsinin məntəqələrində seçkilərə hazırlıq cədvəl üzrə gedir

Fevralın 7-də keçiriləcək növbədənkənar prezident seçkiləri mühüm mərhələyə qədəm qoymuşdur - namizədlərin təbliğat kampaniyasına start verilmişdir.

Bunacan isə seçicilərin sərbəst, şəffaf şəraitdə səs vermələri, müşahidələrin aparılması üçün məntəqələrdə hər cür şərait yaradılmışdır. Gəncədəki 39 saylı Gəncə II Seçki Dairəsində olarkən bunun bir daha şahidi olduq. Dairənin sədri Zakir Hüseynovdan öyrəndik ki, dairə üzrə 36 məntəqə fəaliyyət göstərir. Bir məntəqə isə seçkilərə 5 gün qalmış yaradılacaq. Ümumilikdə dairəni əhatə edən məntəqələrdə 50 min 132 seçici qeydə alınmışdır. Bütün seçki məntəqələri təmir olunmuş, lazımi avadanlıqlarla, rabitə və digər texniki vasitələrlə, MSK tərəfindən göndərilən təşviqat plakatları, seçkilərin keçirilməsi üçün təlimatlarla təmin edilmişlər. Səsvermənin gedişini izləmək üçün 11 seçki məntəqəsində veb-kamera quraşdırılmışdır. Dairə üzrə 280 nəfər yerli, 2 nəfər xarici müşahidəçi qeydə alınmışdır. Seçkiqabağı təşviqatın aparılması, habelə təşviqat materiallarının lövhələrdə yerləşdirilməsi üçün seçki məntəqələrinin ərazisində müvafiq yerlər ayrılmışdır.

Dairə sədri onu da qeyd etdi ki, əvvəlkilərdən fərqli olaraq bu seçkilərdə həm ilk dəfə səs verənlərin, həm də yaşı 70-i keçmiş seçicilərin sayında artım vardır. Belə ki, fevralın 7-də keçiriləcək prezident seçkilərində 690 nəfər ilk dəfə səs verəcək. Yaşlı seçicilər də az deyil. 3775 seçicinin yaşı 70-dən, 82 nəfərin isə 90-dan yuxarıdır.

Seçkiyə hazırlıqla bağlı görülən işlərlə yerində tanış olmaq üçün 24, 25 və 31 saylı seçki məntəqələrində olduq. Hər üç məntəqə yenicə inşası başa çatdırılmış 29 nömrəli tam orta məktəbdə yerləşir. Qeyd edək ki, 44 günlük Vətən müharibəsi zamanı erməni vandallarının Gəncəyə raket hücumu bu məktəbi də qəzalı vəziyyətə salmışdı. Məktəb sökülərək yerində müasir təhsil ocağı inşa edilmişdir.

Məktəbdə yerləşən 24 saylı seçki məntəqəsinin sədri Günel Qəmbərova, 25 saylı seçki məntəqəsinin sədri Sevinc Nəbiyeva və 31 saylı seçki məntəqəsinin sədri Saida Tağızadə görülən hazırlıq işləri barədə ətraflı məlumat verdilər. Bildirdilər ki, 24 saylı məntəqədə 1151, 25 saylı məntəqədə 1388, 31 saylı məntəqədə 1480 seçici qeydə alınıb. Məntəqələrdə hər cür şərait yaradılmışdır, onlar zəruri avadanlıq və texniki vasitələrlə təchiz olunmuşdur.

Sabir ƏLİYEV,

Azərbaycan.-2024.- 16 yanvar, № 8.- S.8.