Bayden Trampa məğlub olacağını anlayır

"Deyəsən, Donald Tramp Ayova ştatında qalib gəlib. Hazırda o, müxalifətin aşkar favoritidir. Ancaq burada bir şey var: bu seçkilərdə həmişə siz və mən ifrat respublikaçıların əleyhinə olmuşuq. Bu mövqe dünən də doğru idi, sabah da doğru olacaq."

ABŞ Prezidenti Co Bayden Ağ Evin sabiq rəhbəri Donald Trampın Ayovadakı qələbəsindən sonra "X" sosial şəbəkəsində bu paylaşımı edərək onu respublikaçılar arasında aşkar favorit adlandırıb.

Xatırladaq ki, ABŞ-nin keçmiş prezidenti Donald Tramp respublikaçıların Ayova ştatında keçirilən kokusunda səslərin çoxunu qazanıb. Bu, Respublikaçılar Partiyasından prezidentliyə namizəd seçmək üçün ilk səsvermə idi.

Səslər hesablandıqdan sonra Tramp onların 51 faizini, Florida ştatının qubernatoru Ron Desantis 21,2 faizini, ABŞ-nin BMT-dəki keçmiş səfiri Nikki Heyli 19,1 faizini toplayıb. Səslərin təxminən 7 faizini Vivek Ramasvami qazanıb və bundan sonra yarışı tərk etdiyini açıqlayıb. Prezident seçkilərində respublikaçıları təmsil etmək üçün mübarizə aparan digər üç namizədin hər biri 1 faizdən az səs toplayıb.

Tramp Ayova ştatında səsvermənin nəticələri ilə fəxr etdiyini bildirib: "Layiqli rəqiblərə qalib gəlməyim böyük şərəfdir". Tramp həmçinin prezidentlik yarışından çəkildiyini elan edən iş adamı Vivek Ramasvami ilə işləmək niyyətində olduğunu bildirib. Nyu-Hempşirdə tərəfdarları qarşısında çıxışı zamanı o, Ramasvamini fantastik və "çox ağıllı oğlan" adlandırıb: "Onun böyük ideyaları var və parlaq gələcəyi olan gəncdir. O, bizimlə işləyəcək".

Ramasvami də çıxış edərək tərəfdarlarını Trampa səs verməyə çağırıb. O, digər namizədləri - Ron Desantisi və Nikki Heylini də seçkidən imtina etməyə və Donald Trampın vahid namizədliyini dəstəkləməyə çağırıb.

Sabiq prezident Nyu-Hempşirdə tərəfdarlarına deyib ki, ABŞ-ni axmaqlar idarə edir. Bundan əvvəl Tramp Rusiya və Çin liderləri Vladimir Putini və Si Cinpini çox ağıllı insanlar adlandırıb. O, həmçinin bildirib ki, Co Bayden prezident seçkilərindən əvvəl ABŞ-ni məhv edə bilər.

Tramp Rusiya Prezidenti Vladimir Putinlə yaxşı yola getdiyini və Ağ Evə rəhbərlik edəcəyi təqdirdə Ukraynadakı münaqişənin tezliklə həllinə çalışacağını bildirib.

O, Putinlə anlaşdığını və Ukraynadakı münaqişəyə son qoya biləcəyini deyib: "Biz Putinlə yaxşı anlaşırıq, bu pis deyil, yaxşıdır. Rusiya hücum etməzdi, İsrailə hücum olmazdı. Ukraynada vəziyyət dəhşətlidir, İsraildə baş verənlər dəhşətlidir... Mən Putini yaxşı tanıyıram, Zelenskini də yaxşı tanıyıram. Onları əlaqələndirəcəyik. Biz bunu çox tez həll edəcəyik. Bu, baş verməməli idi və olmayacaqdı, amma indi insanların düşündüyündən də böyük miqyasda baş verib. Biz müharibəni dayandıracağıq, çünki bu, kədərlidir, heç başlamamalı idi".

Siyasətçi Ayovada çıxışı zamanı ABŞ-dəki problemlərə də toxunub və onların 90 faizinə görə ölkədə saxta xəbərləri yayanları günahlandırıb.

Bu arada, almaniyalı siyasətçi Fridrix Merts Almaniyanı və digər Aİ ölkələrini Donald Trampın yenidən ABŞ prezidenti seçilməsi ehtimalına diqqətsiz və hazırlıqsız olduqlarına görə tənqid edib. N-TV telekanalı Fridrix Mertsdən sitat gətirib: "Aİ-nin və xüsusilə onun ən böyük üzv dövlətinin bu potensial problemə nə qədər diqqətsiz yanaşmasından narahatam".

Onun fikrincə, avropalıların mümkün qədər qısa bir zamanda Amerika ilə A, Amerikasız B planı hazır olmalıdır. Merts öz ölkəsindən və Aİ-dən təhlükəsizlik siyasəti haqqında yenidən strateji düşünməyi tələb edir.

Son məlumara görə, ABŞ-nin keçmiş prezidenti Donald Tramp Manhettendə məhkəmə qarşısına çıxmaq üçün seçki kampaniyasına qısa fasilə verib. Orada ona qarşı böhtan ittihamı ilə bağlı işə baxılır. Mülki iddia, Trampın keçən il zorlama cəhdinə görə məhkəməyə verildiyi yazıçı və jurnalist Cin Kerroll tərəfindən açılıb.

Bu, 1996-cı ildə baş verən hadisələrə əsaslanan ikinci məhkəmədir. Kerrollun sözlərinə görə, o, həmin il Trampla Nyu-York univermağında tanış olub. İddialara əsasən, Tramp ondan başqa qadına hədiyyə olaraq seçdiyi paltarı geyinməyi xahiş edib. Qadın razılaşıb və bundan sonra, dediyinə görə, Tramp paltardəyişmə otağında ona hücum edib. 2023-cü ilin mayında münsiflər heyəti Trampı yazıçıya təcavüz cəhdində təqsirli bilib. Daha sonra andlılar heyəti Trampın Kerrolla cinsi təcavüz etdiyi, lakin onu zorlamadığı barədə qərar çıxarıb və məhkəmə Trampı yazıçıya 5 milyon dollar təzminat ödəməyə məcbur edən hökm çıxarıb.

Eks-prezident bunları yalan, hökmü isə biabırçılıq və ən böyük "əcinnə ovu" adlandırıb. O, apellyasiya şikayətində bu hökmü ləğv etdirəcəyinə ümid edir.

Rizvan CƏFƏROV,

Azərbaycan.-2024.- 18 yanvar, № 10.- S.15.