Xalq doğru və müdrik seçimini edəcək

7 fevral Prezident seçkiləri günüdür

"Fevralın 7-də ölkəmizin ictimai-siyasi həyatında çox əlamətdar hadisəyə şahidlik edəcəyik. Azərbaycan vətəndaşları səbirsizliklə gözlədikləri tarixi gündə fəal iştirak edəcək, öz layiqli namizədlərinə səs verəcəklər. Növbədənkənar prezident seçkilərinin keçirilməsi qərarı sanki çoxdan gözlənilmiş xəbər kimi xalqımızı razı saldı. Bunun nəticəsidir ki, müvafiq sərəncamdan sonra mediada çox böyük minnətdarlıq hissi ilə yazılmış şərhlər oxuyuruq. Budəfəki seçkilərin Zəfər seçkisi olması da bu baxımdan xüsusi əhəmiyyət kəsb edir".

Bu fikirləri "Azərbaycan" qəzetinə açıqlamasında Milli Məclisin deputatı Məlahət İbrahimqızı deyib. Deputat bildirib ki, seçkilərin ilk dəfə ölkəmizin bütün ərazilərində keçirilməsi barədə qərar xalqımızın hər bir nümayəndəsini sevindirir. Son 200 illik dünya tarixində hələ heç bir dövlət uzun illər düşmən tapdağında qalmış torpaqlarını işğaldan azad edə bilməyib. Bu, dövlətimizin uğurlu xarici siyasəti, düşünülmüş siyasi gedişləri hesabına baş verib. Ona görə də seçkilərdə fəal iştirak edərək layiqli namizədə səs vermək hər birimizin mənəvi vətəndaşlıq borcudur.

Məlahət İbrahimqızı deyib ki, növbədənkənar prezident seçkiləri Zəfər seçkisi olmaqla, dünyanın müxtəlif ölkələrində baş tutmuş hansısa seçkilərlə müqayisə oluna bilməz: "Azərbaycan demokratik seçkilər keçirməyə qadirdir. Elə ilkin prosedurlardan da görünür ki, bütün proses demokratik və şəffaf aparılır. Ümumiyyətlə, bütün dünyaya məlumdur ki, Azərbaycan demokratik dəyərlərə, humanizm və ədalətlilik prinsiplərinə hər zaman sadiqdir. Bunu həm daxili, həm də xarici siyasəti ilə bağlı atdığı bütün addımlarında sübuta yetirir".

Deputatın sözlərinə görə, bu seçkilərdə 7 namizədin hər birinə bərabər imkanlar yaradılacaq: "Seçkidə iştirak etmək hüququna sahib olan Azərbaycan vətəndaşı siyasi iradəsini sərbəst formada ifadə edərək, öz namizədinə səs vermək imkanına malik olacaq. Ümid edirik, xalqımızın doğru seçimi bizi daha işıqlı sabahlara aparacaq. Fevralın 7-dən sonra hələ çox uğurlu addımlar atacağıq, qazandığımız zəfərlərin bizə bəxş etdiyi üstünlükləri daha çox dadacağıq".

Məlahət İbrahimqızı seçki prosesi barədə də məlumat verib. Deyib ki, Konstitusiyanın müvafiq maddələrinə müvafiq olaraq, vətəndaşlarımızın cəmiyyətin və dövlətin siyasi həyatında maneəsiz iştirak, dövlətin idarə olunmasında iştirak və dövlət orqanlarına seçmək və seçilmək hüququna təminat verilir. Konstitusiyada təsbit edilmiş bu hüquqları gözləmək və qorumaq üçün bütün aidiyyəti orqanlar səfərbər edilib. Yəni növbədənkənar prezident seçkilərinin hazırlanması və keçirilməsi, səslərin hesablanması, səsvermənin yekunlarının, seçkilərin nəticələrinin müəyyən edilməsinin açıq və aşkar həyata keçirilməsi üçün heç bir maneə yoxdur.

Deputat yekunda qeyd edib ki, Azərbaycan xalqı müdrik, qətiyyətli və cəsarətlidir. Hər zaman seçim məqamı yetişəndə doğru qərar verməyi bacarıb. İnanırıq ki, xalqımızın taleyi yenə etibarlı əllərə həvalə olunacaq".

Nəzrin QAFARZADƏ,

Azərbaycan.-2024.- 19 yanvar, № 11.- S.10.