Bütün
namizədlər üçün
bərabər imkanlar təmin edilib
7
fevral Prezident seçkiləri günüdür
Fevralın
7-nə təyin olunmuş prezident seçkilərinin təbliğat-təşviqat
mərhələsi başlayıb. Yeddi namizədin mübarizə
apardığı bu seçkidə hər bir siyasi partiyaya,
namizədə, seçiciyə və seçki
kampaniyasının digər iştirakçılarına ədalətli
və bərabər imkanlar yaradılıb.
Mövzu ilə
bağlı "Azərbaycan" qəzetinə
danışan Milli Məclisin deputatı Bəhruz Məhərrəmov
deyib ki, 2023-cü il dekabrın 7-də müvafiq sərəncamla
ölkədə növbədənkənar prezident seçkiləri
elan edildi və proses 2024-cü il fevralın 7-nə təyin
olundu. Müharibədə qələbəmiz və suveren
haqlarımızın tam bərpası qarşıya qoyulan
missiyaların ləyaqətlə tamamlandığını
göstərdi. Eyni zamanda hazırkı reallıq məhz bu
uğurlara əsaslanan nəticələrin
davamlılığını diktə edən yeni şərtləri
meydana çıxardı. Bu mənada fevralın 7-də
prezident seçkilərinin keçirilməsi inkişafın
yeni hədəflərə uyğun tempdə
davamlılığını təmin etmək
üçün tarixi zərurətdir.
Deputatın
sözlərinə görə, artıq Seçki Məcəlləsinin
tələblərinə müvafiq olaraq, prezidentliyə namizədin
irəli sürülməsi, onun müdafiəsi
üçün imza toplanması və qeydə alınma
prosesləri uğurla realizə olunub: "Proseslərin
gedişi bir daha sübut edir ki, Azərbaycanda qanun çərçivəsində
namizədlərə bərabər münasibət təmin
edilir. Həmçinin qanun əsasında seçicilərə,
seçki hərəkətlərinin həyata keçirilməsində
iştirak etmək hüququ olan şəxslərə sənədlərlə
və məlumatlarla tanış olmaq üçün hər
bir şərait yaradılıb, birmənalı və
aydın anlaşılmaqla müntəzəm xarakterli
kommunikasiya imkanı təmin olunub".
Bəhruz Məhərrəmov
əlavə edib ki, seçicilərin seçkilərdə
iştirakı üçün imkan dairəsində
bütün tədbirlər öncədən
görülüb və görülməkdədir. Eyni
zamanda inklüzivliyin təminatı
üçün həssas təbəqədən olan şəxslərin,
habelə uzaq və ya yolu çətin keçilən yerlərdə
yaşayan seçicilərin seçkilərdə
iştirakı üçün bütün imkanlar
yaradılıb. Seçicilər, namizədlər, qeydə
alınmış namizədlər, siyasi partiyalar və
müşahidəçilər üçün
Konstitusiyanın 57-ci maddəsinə və Seçki Məcəlləsinin
16-cı fəslinə müvafiq olaraq, istənilən pozuntu
ilə bağlı işlək, aşkar, səmərəli və
əlçatan şikayət mexanizmləri mövcuddur.
Deputat
vurğulayıb ki, Azərbaycan vətəndaşı
seçimində sərbəstdir: "Vətəndaşların
sərbəst iradə ifadəsi üçün
siyasi-hüquqi bazis, o cümlədən faktiki şərait
mövcuddur. İndi yeganə vəzifə vətəndaşlıq
öhdəliyinə sadiq qalaraq seçki aktivliyini təmin etməkdir.
Unutmamalıyıq ki, hazırkı situasiyada seçkidə
aktivlik milli maraqlar, dövlətçilik məfkurəsi
fonunda qiymətləndirilməlidir. Çünki cəmi 30 il
əvvəl parçalanmaqda olan Azərbaycan bu gün
işğala, təcavüzə, separatizmə son qoymuş və
faktiki olaraq Orta Asiyanın, Şərqi və Cənubi
Avropanın, Balkanların enerji təhlükəsizliyinin, həm
də milli təhlükəsizliyinin qarantına
çevrilmişdir. Eyni zamanda Qərb neoimperializmini regionda
aciz duruma düşürmüş hərbi-siyasi
gücdür".
Bəhruz Məhərrəmov
yekunda qeyd edib ki, Zəfərin davamlılığı,
inkişafın dayanıqlılığı naminə
xalqımızın səsi və iradəsi layiqli təmsilçinin
seçilməsinə gətirib çıxaracaq.
N.QAFARZADƏ,
Azərbaycan.-2024.-
19 yanvar, № 11.- S.10.