Azərbaycançılıq ruhundan doğan vətənpərvərlik əzmi

Bu gün üzərinə düşən vətəndaşlıq borcunu şərəf və ləyaqətlə yerinə yetirən Azərbaycan gəncliyi dövlətimizin, dövlətçiliyimizin daha da möhkəmlənməsində böyük əzm və qətiyyət nümayiş etdirir. Belə fəallıq Azərbaycan gəncliyinin vətənpərvərliyindən, yurda olan tükənməz sevgisindən və mübarizlik əzmindən qaynaqlanır.

Vətənpərvərlik insanın daxili aləmindən, ölməz ruhundan gələn ülvi və müqəddəs bir hissdir. Bu, onun dövlətinə, xalqının ulu tarixi keçmişinə, vətəndaşı olduğu ölkəsinə sıx bağlılığından xəbər verir. Vətənpərvərlik qoynunda dünyaya göz açdığın torpağa tükənməz məhəbbət və sevgi, Vətənin azadlığı uğrunda əzmkarlıqla vuruşmaq deməkdir. Bu ali hiss insan qəlbində bir günün, bir anın içində yaranmır. Bu ülvi hiss zaman-zaman formalaşmır. Vətənpərvərliyin tarixi kökündə min illər boyu yaşanmış, möhkəmlənmiş, ana torpağına, dilinə və başqa mənəvi amillərə bağlanmış dövlətçilik ənənələri dayanır. Vətənpərvərlik hər şeydən əvvəl düşmən təcavüzü zamanı doğulduğu və yaşadığı ölkəsinin müdafiəsinə qalxmaq, onun müstəqilliyini göz bəbəyi kimi qorumaq, inkişafına kömək və qayğı göstərməkdir.

Azərbaycanlı kimi doğma torpağı sevmək, onun adını hər şeydən uca tutmaq, bu yolda mübarizəyə hazır olmaq hər bir vətəndaşın müqəddəs borcudur. Zaman-zaman xalqımızın içindən çıxmış böyük şəxsiyyətlər, vətənpərvər insanlar gələcək nəsillərə nümunə olmuşlar. Böyük tarixi şəxsiyyət, Ulu Öndər Heydər Əliyevin hələ sovet dönəmində doğma xalqı, vətəni üçün gördüyü böyük işlər gənclər üçün əvəzsiz və çox qiymətli bir örnəkdir.

Ümummilli Lider Heydər Əliyev Azərbaycana rəhbərlik etdiyi zamanlarda dövlətçilik və vətənpərvərliyi özündə birləşdirən azərbaycançılıq məfkurəsini milli ideologiya səviyyəsinə qaldırdı. Bundan sonra gənclərin vətənpərvərlik əzmi daha da yüksəldi. Ulu Öndər çıxışlarında bu vacib məqamı tez-tez vurğulayaraq deyirdi: "Milli ideologiya nədən ibarətdir? Birinci, dövlətçilik. Dövlətçilik Azərbaycanın müstəqilliyini, ərazi bütövlüyünü qoruyub saxlamaqdır, Azərbaycanın müstəqilliyini möhkəmləndirməkdir. Dövlətçilik hər bir vətəndaşın qəlbində olmalıdır. Ona görə hər bir vətəndaş vətənpərvərlik hisslərilə yaşamalıdır".

Ulu Öndər Heydər Əliyevin böyük vətənpərvər kimi tarixdə qalacaq xidmətlərindən biri də azərbaycançılıq məfkurəsini daim inkişaf etdirməsində, onu milli ideologiyaya çevirməsində və etnik müxtəlifliyi bu ideologiya ətrafında sıx birləşdirməsindədir. Bu məfkurənin başqa bir mühüm missiyası da dünyanın müxtəlif ölkələrində yaşayan həmvətənlərimizin birlik və həmrəyliyini təmin etməsindədir. Əsasını Ulu Öndərin qoyduğu azərbaycançılıq məfkurəsi gələcəyimiz olan gənclərin də vətənpərvərlik hisslərinin formalaşmasında zaman-zaman çox mühüm rol oynadı. Azərbaycançılıq ideologiyası gəncliyimizin vətənpərvərlik hisslərini daha da sürətlə formalaşdırdı, əzmkarlığını, mübarizliyini durmadan artırdı.

Bu gün gənclərimizin azərbaycançılıq ideologiyası ruhunda tərbiyə olunması istiqamətində mühüm addımlar atılır. Təbiidir ki, belə yüksək dəyərli ideologiya ilə tərbiyə olunan gənclərimiz çalışdıqları bütün sahələrdə uğurlar qazanır, dövlətimizin, dövlətçiliyimizin möhkəmlənməsində böyük səylər nümayiş etdirirlər. Vətənpərvərlik əzmindən doğan azərbaycançılıq ruhu daim gənclərimizə güc, qüvvət verəcək. Onları uğurlara, zəfərlərə qovuşduracaq.

Vahid MƏHƏRRƏMOV,

Azərbaycan.-2024.- 19 yanvar, № 11.- S.15.