Bütün uğurlarımızın təməlində iqtisadi gücümüz dayanır

Ötən hər il ölkəmizin və xalqımızın həyat salnaməsində öz dəst-xəti ilə qalır. Hər yeni il isə yeni arzularla gəlir, növbəti məqsəd və vəzifələri gətirir. Bu baxımdan yanaşdıqda 2023-cü il haqqında ürəkdolusu, iftixarla söz aça bilərik. Qazanılan uğurların davamı kimi 2024-cü ildə də görüləcək işlər, keçiriləcək tədbirlər, gerçəkləşdiriləcək layihələr çoxdur. O cümlədən iqtisadi sahədə də.

Prezident İlham Əliyevin Dünya Azərbaycanlılarının Həmrəyliyi Günü və Yeni il münasibətilə müraciətində bütün bu məsələlər öz dolğun əksini tapıb. Dövlətimizin başçısı iqtisadi sahədə siyasətimizin uğurla aparıldığını vurğulayaraq deyib: "Müstəqil iqtisadiyyat bizə imkan verir ki, heç kimdən asılı olmayaq, heç bir beynəlxalq maliyyə institutundan asılı olmayaq və asılı deyilik".

Uğurların mərkəzində dayanan da məhz bu iqtisadi müstəqillikdir. İqtisadi gücü Azərbaycan dövlətinə imkan verir ki, özü müstəqil surətdə, heç kəsdən kömək istəmədən Qarabağda və Şərqi Zəngəzurda misli görünməyən bərpa-quruculuq işlərinə vüsət versin. Nəticədə mənfur düşmənin üç onillik boyu yerlə yeksan etdiyi şəhər və kəndlərimiz cənnətə çevrilməkdədir. Artıq o yerlərə böyük köç başlanıb, yüzlərlə ailə öz doğma yurdunda yenidən çırağını yandırıb.

Azərbaycanın dünyadakı nüfuzunun getdikcə artmasının da mühüm səbəblərindən biri güclü, müstəqil iqtisadiyyata malik olmasıdır. Bu, ölkəmizin bir çox beynəlxalq tədbirə evsahibliyi etməsində də özünü aydın göstərir. Son illərin mötəbər idman yarışlarını, musiqi festivallarını, iqtisadiyyatın müxtəlif sahələrini əhatə edən forumları, konfransları və s. xatırlatmaq kifayətdir. "Cənub Qaz Dəhlizi" Məşvərət Şurasının hər il Bakıda keçirilən toplantıları, uzun illərdir ünvanını dəyişməyən və getdikcə genişlənərək artıq "Enerji həftəsi"nə çevrilmiş beynəlxalq neft-qaz sərgisi də deyilənlərə əyani misaldır.

Bu il isə Azərbaycan COP29-a evsahibliyi edəcək. Dövlətimizin başçısı sözügedən müraciətində bu barədə demişdir: "Bizim beynəlxalq nüfuzumuz gündən-günə artır. Dekabr ayında dünyanın ən böyük beynəlxalq konfransının Azərbaycanda keçirilməsi haqqında bütün dünya ölkələri yekdil qərar qəbul etmişlər - COP29 gələn il Azərbaycanda keçiriləcək. Bu, bizə dünya ictimaiyyəti tərəfindən göstərilən böyük hörmət və rəğbətdir, eyni zamanda bizim "yaşıl enerji"yə keçidimizə olan böyük qiymətdir. "Yaşıl enerji" keçidi bizim prioritet məsələmizdir və bu il Azərbaycanda bölgənin ən böyük bərpaolunan elektrik enerjisi stansiyası istifadəyə verilmişdir - 230 meqavat gücündə günəş-elektrik stansiyası artıq bizim enerji sistemimizə tam inteqrasiya edilmişdir. İmzalanmış kontraktlar və anlaşma memorandumları əsasında yaxın bir neçə il ərzində Azərbaycanda 10 min meqavat bərpaolunan enerji növləri, enerji mənbələri yaradılacaq və bu sahədə də Azərbaycan dünyada liderlər sırasında olacaqdır. Əlbəttə ki, COP29 - iqlim dəyişikliyinə həsr edilmiş bu beynəlxalq konfransın Azərbaycanda keçirilməsi bir daha bu sahədə bizim uğurlarımızı əyani şəkildə göstərir".

Dünyanın ən böyük və mühüm dövlətlərarası tədbirlərindən biri olan COP29-a 2024-cü ildə Azərbaycanın evsahibliyi etməsi Prezident İlham Əliyevin və ölkəmizin növbəti qələbəsidir. Bu, son zamanlar ölkəmizə qarşı çirkin kampaniya aparan bəzi dairələrə tutarlı cavabdır.

Məlum olduğu kimi, Azərbaycan BMT-nin İqlim Dəyişmələri üzrə Çərçivə Konvensiyasına tərəf olmaqla qlobal iqlim dəyişmələrinə qarşı mübarizəyə qoşulub və 1990-cı illə müqayisədə 2030-cu ilə qədər istixana qazlarının miqdarının 35 faiz azaldılmasını hədəfləyir. Daha bir hədəf 2030-cu ildən sonra 2050-ci ilə qədər istixana qazlarının miqdarının 40 faiz azaldılmasından ibarətdir. Prezidentimiz işğaldan azad edilmiş torpaqları "yaşıl enerji" zonası elan edib. Bu ərazilərin 2050-ci ilədək "Netto sıfır emissiya" zonasına çevrilməsi nəzərdə tutulur. Eləcə da bərpaolunan enerji sahəsinin inkişafı üçün böyük potensialı olan Naxçıvan Muxtar Respublikası "yaşıl enerji" zonası elan olunub.

Təsadüfi deyil ki, 2024-cü il Azərbaycanda "Yaşıl dünya naminə həmrəylik ili"dir. Dövlətimizin yaratdığı möhkəm əməkdaşlıq və tərəfdaşlıq platforması bu il çərçivəsində qazanılacaq nailiyyətlərin başlıca səbəblərindən olacaq. Belə ki, indi Azərbaycan dünyada etibarlı tərəfdaş kimi böyük hörmət və etimad qazanıb. Bir neçə ay əvvəl Birləşmiş Ərəb Əmirliklərinin "Masdar" şirkəti ilə tikilən "Qaradağ" Günəş-Elektrik Stansiyası istifadəyə verilib. Bu, Xəzər regionunda və MDB məkanında ən böyük günəş-elektrik stansiyasıdır. Hazırda Bakıda Səudiyyə Ərəbistanının "ACWA Power" şirkəti ilə "Xızı-Abşeron" Külək-Eletrik Stansiyasının tikintisi davam edir. Cəbrayılda bp şirkəti ilə 240 MVt gücündə "Şəfəq" Günəş-Elektrik Stansiyasının tikintisi nəzərdə tutulur. Bu və digər şirkətlərlə növbəti yeni layihələrin reallaşması üçün bir sıra sənədlər imzalanıb, danışıqlar gedir.

Beləliklə, Azərbaycan "yaşıl enerji" istehsal edərək onun ixracatçısı da olacaq. Xatırladaq ki, 2022-ci il dekabrın 17-də Rumıniyanın paytaxtı Buxarestdə "Azərbaycan Respublikası, Gürcüstan, Rumıniya və Macarıstan hökumətləri arasında "yaşıl enerji"nin inkişafı və ötürülməsi sahəsində strateji tərəfdaşlıq haqqında Saziş" imzalanıb. Keçən il noyabrın 21-də isə Macarıstanın paytaxtı Budapeşt şəhərində "Azərbaycan, Gürcüstan, Macarıstan və Rumıniya arasında "yaşıl enerji"nin inkişafı və ötürülməsi sahəsində strateji tərəfdaşlıq haqqında Saziş"in icrası məqsədilə nazirlərin beşinci iclası keçirilib.

Bir sözlə, Azərbaycan Avropaya "yaşıl enerji" körpüləri də salacaq. "Yaşıl dünya naminə həmrəylik ili" gələcəyə istiqamətlənən bu yeni layihələr üçün bir körpü olaraq onları uğurlu yollara qovuşduracaq.

Flora SADIQLI,

Azərbaycan.-2024.- 8 yanvar, № 1.- S.11.