Bayrağa sarılmağı çox sevirdi...

"Ata, biz tanklardayıq, gedirik. Özünüzdən muğayat olun! Mamagilə heç nə demə. Haqqını halal et..!"

Bu sözlər Vətən müharibəsinin ilk şəhidlərindən sayılan İlqar Vüqar oğlu Bürcəliyevin son mesajıdır. Qəhrəman gəncimiz sentyabrın 28-də Tərtərin Talış kəndi və Talış yüksəkliyi uğrunda gedən döyüşlərdə müqəddəs şəhadət məqamına yüksəlib. "Zirə" klubunun futbolçusu olan İlqar artıq 1 il 3 aydır ki, həqiqi hərbi xidmətdə idi. Növbəti ilin yanvar ayında xidmətini başa vurub qayıdacaq, həsrətlə yolunu gözləyən valideynlərinin arzularını reallaşdıracaq, neçə mötəbər yarışda doğma komandanın şərəfini qoruyacaqdı... Lakin sentyabrın 27-də işğalçıların növbəti təxribatının dəf edilməsi zəminində başlanan haqq savaşının müsəlləh əsgəri kimi canından, qanından çəkinmədən silaha sarıldı, ölümün gözünə dik baxdı, ən uca şəhidlik zirvəsini seçdi. Ruhu ana yurdun səmalarına, vücudu qanla yoğrulan torpağımıza qovuşdu.

O həm də görkəmli sənətkarlarımız, Xalq artistləri Məhəmməd Bürcəliyev və Sədayə Mustafayevanın nəticəsi, tanınmış teatrşünas-tənqidçi Anar Bürcəliyevin qardaşı oğludur. Anar müəllim igid şəhidimiz haqqında kövrək xatirələrini bölüşür: "İlqardan geriyə xoş xatirələri qaldı... Fotoları ən böyük təsəllimizdir. Hər gün dostları, sinif yoldaşları gəlirlər. İlqar əla futbolçu idi. Hər bir oyunu xatirimizdədir. Modelliyə də həvəsi vardı. Bir neçə dəfə model olaraq sertifikat və diplomlara layiq görülmüşdü. Elə bil ki, hər şeyi öncədən bilirdi. Onu hərbi xidmətə yola salanda Biləcəri stansiyasında dedi ki, mən gedirəm, amma qayıtmayacam, şəhid olacam. Sizə deyim ki, çox mətin və qorxmaz idi. Həmişə əlinə və üzünə Azərbaycan bayrağı çəkirdi, dövlət bayrağına sarılmağı, çiyninə asmağı çox sevərdi. Elə sonda da şəhadət məqamına yüksələrək bayrağımıza sarıldı…"

İlqar 2001-ci il martın 11-də dünyaya göz açmışdı. Əvvəl Yasamal rayonu Ə.Əhmədov adına 308 nömrəli tam orta məktəbdə, daha sonra Gəncə şəhəri 38 nömrəli tam orta məktəbdə təhsil alıb. 2014-2016-cı illərdə "Vətən" Futbol Klubunda, 2016-cı ildə "Kəpəz" PFK-da, 2016-cı ildən isə "Zirə" PFK-da çıxış edirdi. 2017-ci ildən 18 yaşlılardan ibarət Azərbaycan yığmasının heyətinə dəvət olunmuşdu.

Atası Vüqar Bürcəliyev: "Onu milli komandaya çağırmışdılar, amma əsgərlik vaxtı gəldi, Vətənə xidmət borcunu hər şeydən üstün tutdu, dedi, gedirəm hərbi xidmətə… Geyindiyi hərbi formaya, manqa komandiri təyin olunduğuna görə çox sevinirdi, vətənpərvərlik duyğuları ilə aşıb-daşırdı. Çox ağır döyüş olub,

3 nəfər yaralı, bir şəhid yoldaşını güllə yağışı altından çıxarıb. Mən oğlumla fəxr edirəm, elə belə də olmalıydı, dostlarının nəinki yaralısını, heç ölüsünü də qoyub getməzdi. Ölüm ayağında başını dizinə qoyduğu Əvəzlə görüşdüm, döyüş meydanından kənarlaşdırmaq istəyiblər, amma onların tərpənməsinə imkan verməyib, əlini sıxaraq hamının birgə qayıdacağını söyləyib…"

Nənəsi Məleykə xanım: "Elə bil Vətən uğrunda qurban getməyi qarşısına məqsəd qoymuşdu. Deyirdi, içimdə bir hiss var ki, şəhadətə yetişəcəyəm. Axır vaxtlar məktubları üzə çıxdı, yazırdı ki, tərxis edilməsəm, cəbhəyə getsəm, mən də bir Mübariz olacam, Polad olacam… Cənab Prezident, Ali Baş Komandan İlham Əliyevə təşəkkürümü bildirirəm, onun uzaqgörənliyi, xalqımızın, ordumuzun rəşadəti sayəsində şəhidlərimizin qisası alındı, torpaqlarımız işğaldan qurtuldu!"

Ailənin digər övladı Tamerlan da futbolçudur, şəhid qardaşının yolunu - idman estafetini böyük məsuliyyətlə davam etdirir. İlqarın əziz xatirəsini yaşatmaqdan ötrü adını təxəllüs kimi götürüb. Elə futbol köynəyinin arxasına da belə yazdırıb: Tamerlan İlqar.

Şəhid İlqar Bürcəliyev 2020-ci il sentyabrın 29-da böyük izdihamla Gəncədə ata-baba yurdunda, Şəhidlər xiyabanında torpağa tapşırılıb. Azərbaycan Primer Liqasında "Zirə" və "Qarabağ" futbol komandaları arasında baş tutan oyunda İlqarın xatirəsi yad edilib, oyun meydançasında fotosu asılıb. Azərbaycan Prezidenti İlham Əliyevin sərəncamlarına əsasən "Vətən uğrunda" və "Laçının azad olunmasına görə" medalları ilə təltif edilib.

Qurban MƏMMƏDOV

Azərbaycan.-2024.- 20 yanvar, № 12.- S.15.