Azərbaycan seçicisi iradəsini ifadə etməkdə sərbəstdir

Prezident seçkilərindən sonra ölkəmizi daha parlaq gələcək gözləyir

"Bu il fevralın 7-də keçiriləcək növbədənkənar prezident seçkilərində bir ilk yaşanacaq. Müstəqil Azərbaycan tarixində seçkilər ilk dəfə olaraq ölkəmizin bütün ərazilərində keçiriləcək. Səsvermə prosesinin həm də işğaldan azad edilmiş ərazilərdə təşkil edilməsi bu seçkini əlamətdar edən hadisələrdəndir. Ona görə də növbədənkənar prezident seçkiləri böyük ictimai-siyasi məna kəsb edir".

Bu sözləri "Azərbaycan" qəzetinə açıqlamasında Milli Məclisin deputatı Müşfiq Cəfərov deyib. Deputat bildirib ki, seçkiləri daha erkən vaxta təyin etmək xalqa etimadın ən ali göstəricisidir: "Bu, həm də xalqın seçdiyi layiqli namizədə səs verməsi üçün bir fürsətdir. Mən tam əminliklə deyirəm ki, xalq ən doğru qərarı verəcək. Fevralın 7-də Azərbaycan xalqının müdrik olduğu bir daha sübuta yetiriləcək".

Deputat söyləyib ki, bu gün ölkəmizdə suverenliyimiz möhkəmlənib, iqtisadi müstəqilliyə nail olunub, ərazi bütövlüyü, sərhəd toxunulmazlığı, beynəlxalq hüquqla tanınan bütün ərazilərimizdə konstitusiya quruluşu bərqərar olunub. Artıq güclü təməllər üzərində müasir, suveren, bütöv və yeni Azərbaycan qurulub. Təbii ki, bu zəfərlərin davamlılığı növbəti seçkilərin nəticəsindən əhəmiyyətli dərəcədə asılıdır.

Müşfiq Cəfərov onu da qeyd edib ki, Azərbaycanı prezident seçkilərindən sonra daha parlaq gələcək gözləyir. Xalqın doğru seçimi ölkəmizin daha güclü dövlət kimi beynəlxalq arenada öz mövqelərini möhkəmləndirməsinə zəmin yaradacaq. Davamlı inkişafa yönəlmiş siyasət Azərbaycana bundan sonra da böyük uğurlar, yeni zəfərlər, zirvələr bəxş edəcək.

"Hazırkı mürəkkəb beynəlxalq münasibətlər şəraitində gənc və müstəqil Azərbaycanın təhlükəsizliyini təmin etmək, mövqeyimizi daha da möhkəmləndirmək vacib şərtlərdəndir. Ümumiyyətlə, indiki halda ölkələrin hərtərəfli inkişafını təmin etmək böyük siyasi təcrübə tələb edir. Ona görə də xalq öz səsini güclü təməllər üzərində qurulmuş siyasi kursa, aydın və qəti mövqeyə sahib namizədə verməlidir", - deyə müsahibim bildirib.

Müşfiq Cəfərovun fikrincə, hər zaman olduğu kimi, növbəti dəfə də ölkəmizdə prezident seçkiləri tam şəffaf və demokratik keçiriləcək: "Bu zamana qədərki müşahidələr də bu baxımdan əminlik yaradır. Azərbaycan seçicisi seçimində hər zaman sərbəstdir. Vətəndaşların öz namizədlərini dəstəkləmələri üçün siyasi-hüquqi bazis mövcuddur və bunun üçün lazımi şərait yaradılıb. Burada vətəndaşların üzərinə düşən məsuliyyət isə seçki aktivliyini təmin etməkdir".

Nəzrin QAFARZADƏ,

Azərbaycan.-2024.- 23 yanvar, № 13.- S.9.