Senat topun-tüfəngin bacarmadığını
kağız parçası
ilə etmək istəyir
Məlum olduğu
kimi, erməni lobbisinin güclü olduğu ölkələr
vaxtaşırı Azərbaycanın
əleyhinə bəyanatlar
verir, bizim üçün lazımsız
kağız dəyərində
olan sənədlər
qəbul edir və bununla guya haqqın-ədalətin
müdafiəçisi olduqlarını
gözə soxmaq istəyirlər. Ancaq onların bu yalançı erməni sevgi və təəssübkeşliyinin
bir həddi olur. Hətta arada Azərbaycanın ərazi bütövlüyünü
dəstəklədiklərini də bildirirlər.
Amma Fransa istisnadır. Bu ölkə Emmanuel Makronun timsalında bütün beynəlxalq hüquq prinsiplərini pozur və diplomatik
etik qaydalarına məhəl qoymur. Hətta o dərəcədə
ki, BMT Təhlükəsizlik
Şurasının 5 daimi
üzvündən biri
kimi özünün də erməni işğalına son qoyulması barədə səs verdiyi qətnamələri görməzdən
gəlir. Bəli, keçmiş Dağlıq
Qarabağ münaqişəsinin
həlli istiqamətində
30 il aparılan danışıqlarda Fransa
vasitəçi ölkə
olaraq Azərbaycanın
ərazi bütövlüyünü
formal olsa da, tanıyırdı. Elə ki, 44 günlük Vətən müharibəsində tarixi
zəfərlə ərazi
bütövlüyümüzü bərpa etdik, Fransanın maskası yırtıldı. Hətta
müharibə vaxtı
şəhər, qəsəbə
və kəndlərimizi
bir-bir düşmən
işğalından azad
edərkən Fransa prezidenti absurd "biz imkan verməyəcəyik
ki, Azərbaycan Dağlıq Qarabağı
ikinci dəfə işğal etsin" bəyanatını verməkdən
də çəkinmədi.
Əslində, Fransa prezidenti erməni sevgisindən vəcdə gəlib belə bir bəyanat verdikdən sonra səhv etdiyini başa düşüb üzr istəməli idi. Ancaq günü
bu günəcən bunun əksini görürük - ərazilərimiz
işğaldan tam azad olunduqdan sonra belə sərsəm bəyanatların
sayı da artıb. Bu azmış kimi, Makron ölkəsinin Senatını da ardınca aparıb ədalətsiz mövqeyinə
ortaq edir.
Nədənsə 30 il Ermənistan tərəfindən Azərbaycanın
tarixi və qanuni ərazisi işğal ediləndə
Fransanın yadına düşmədi ki, "kiçik bacı"sı
özgə torpaqlarını
zəbt edib, qoşunları qonşu ölkənin ərazisindədir
və 1 milyona yaxın insanı doğma yurdlarından didərgin salıb. Ancaq biz Hayastanın
ərazisini işğal
etmədiyimiz və orada bircə əsgərimiz olmadığı
halda, Fransa Senatı "Azərbaycan
və onun müttəfiqini öz qoşunlarını Ermənistan
ərazisindən çıxarmağa"
çağırış edir. Birincisi, təkrar edirik, Azərbaycanın hərbi
qüvvələri Ermənistan
ərazisində yoxdur.
İkincisi, hansı müttəfiqdən söhbət
gedir? Əlinizdə sübut varsa, açıq deyin. Deyə bilmirsinizsə (və yəqin ki, bu belədir),
deməli, yoxdur. İkincisi də, Azərbaycan hərbi cəhətdən elə zəif deyil ki, Ermənistan kimi zəif ölkə ilə sərhədini qorumaq üçün müttəfiqə
ehtiyacı olsun.
Ümumiyyətlə, Senatın qətnaməsini
oxuyanda heyrət etməmək mümkün
deyil. Bu kağız parçasında
"Qarabağ ermənilərinin
öz müqəddəratını
təyin etmək hüququ", "Dağlıq
Qarabağ Respublikası",
"Dağlıq Qarabağın
demokratik surətdə
seçilmiş liderləri",
"Dağlıq Qarabağ
Respublikasının siyasi
liderləri" kimi beynəlxalq hüquqazidd və reallıqdan uzaq ifadələr işlədilir. Əvvəla,
Fransa xalqların öz müqəddəratını
təyin etmək hüququna belə hörmət edirsə, qoy hələ də müstəmləkə
kimi saxladığı
Korsikaya, Yeni Kaledoniyaya müstəqillik
verib nümunə göstərsin. İkincisi,
nə vaxtdan Qarabağda bir ovuc quldurun silah
altında keçirdiyi
"seçkilər" demokratik
olub? O ki qaldı "Qarabağın
siyasi liderləri"nə,
onların harada olduqları məlumdur. Daha doğrusu, separatçılar, dinc sakinlərin qətlinə
əmr verənlər
və bunu "qəhrəmanlıq" kimi
öyünüb bəyan
edənlər harada olmalıdırlarsa, oradadırlar.
Ona görə də əli dinc əhalinin qanına batanlar "siyasi məhbus" yox, qatildirlər və layiq olduqları
cəzanı da alacaqlar.
Buna baxmayaraq, Fransa Senatının bütün beynəlxalq qanunlara tərs gələn qətnaməsi
Ermənistanda əsl
"bayram ovqatı"
yaradıb. Hamı - məmurlar, siyasətçilər,
politoloqlar, jurnalistlər
bayram edir, bunu Azərbaycanın məğlubiyyəti kimi qələmə verirlər.
Guya Azərbaycan dövləti bu qətnamədən qorxub ermənilərin Qarabağa
gəlmələri üçün
ayaqlarının altına
qırmızı xalı
sərəcək, üstəlik,
onlara yenidən "öz müqəddəratını
təyin etmək hüququ" verəcək
və s. və i.a. Belə yerdə deyiblər, karın könlündəki.
Əgər kar
deyillərsə, bir daha xatırladırıq:
yerli dinc ermənilərin Qarabağdan
getməməsi barədə
çağırışı edən Azərbaycan dövləti olub. İndi də Azərbaycanın onların
geri qayıtması üçün beynəlxalq
qanunlara uyğun bir tələbi var - Azərbaycan vətəndaşlığını və Konstitusiyasını
qəbul etmək. İstəyirlərsə və
əllərinin qana batmadığına əmindirlərsə,
buyursunlar. Dövlət
onlara Konstitusiyada Azərbaycan dövlətinin
bütün vətəndaşlarına
və xalqlarına verilən hüquqlardan istifadə etmək imkanı yaratmaq barədə təminat verir. Həm də onu bəyan
edir ki, Azərbaycan Fransada qəbul edilən absurd bir qətnaməyə
görə öz prinsiplərindən və
milli maraqlarından geri çəkilən deyil. Ölkəmizin mövqeyi qətidir - kimin nə deməsindən,
hansı qətnamə
qəbul etməsindən
asılı olmayaraq, tutduğu doğru yola davam etmək.
Rüstəm KAMAL,
Azərbaycan.-2024.-
23 yanvar, № 13.- S.11.