"Azərbaycanın Avropa Şurası Parlament Assambleyasındakı
nümayəndə heyətinin
səsvermə hüququnun
dondurulması ilə bağlı təklif ölkəmizə qarşı
riyakar davranışın
göstəricisi idi. Buna görə nümayəndə heyətimizin
AŞPA ilə əməkdaşlığı
və təşkilatda
iştirakını qeyri-müəyyən
müddətə dayandırması
barədə qərar
verməsini təqdirəlayiq
hesab edirəm".
Bu fikirləri
"Azərbaycan" qəzetinə
açıqlamasında Milli
Məclisin deputatı
Kamilə Əliyeva deyib. Onun sözlərinə
görə, ölkəmiz
üçün ümumiyyətlə
heç bir əhəmiyyət kəsb
etməyən AŞPA-nın
əleyhimizə qərəzli
qərarlar qəbul etməsinin dəfələrlə
şahidi olmuşuq:
"Müxtəlif vaxtlarda
bu qurum Azərbaycanla bağlı
qərəzli, həqiqəti
əks etdirməyən
hesabatlar hazırlayıb. Son qərəzli davranışları
ilə AŞPA Azərbaycanı
guya insan hüquqlarını pozmaqda
ittiham edirdi. Lakin Azərbaycanın nümayəndə heyətinin
səsvermə hüququnun
dondurulması barədə
təşəbbüsün insan hüquqları ilə heç bir əlaqəsinin olmadığı gün kimi aydındır. Sadəcə olaraq,
AŞPA suverenliyini və
ərazi bütövlüyünü
bərpa etmiş Azərbaycanın zəfərlərini
həzm edə bilmədiyindən Azərbaycana
qarşı riyakar mövqe tutmuşdu".
Deputat bildirib ki, Ermənistan torpaqlarımızı işğal
altında saxlayanda, 1 milyona yaxın azərbaycanlı öz doğma evlərindən qovulanda, onlara qarşı soyqırımı
törədiləndə, 100 minlərlə azərbaycanlı
Ermənistandan deportasiya
olunanda AŞPA bir dəfə olsun belə səsini çıxarmayıb. Ermənistanın
törətdiyi bu vəhşiliklərə görə
bu ölkəyə qarşı heç bir qərar qəbul etməyib. 44 günlük müharibədə
isə Azərbaycan Ermənistanın işğal
siyasətinə son qoyub və bütün
bunların fonunda Azərbaycanı ittiham etmək qərəzdən
başqa heç nə deyil.
Kamilə Əliyevanın
sözlərinə görə, Fransa, Almaniya və digər bir sıra Qərb
dövlətlərində insanlar
hər zaman polis zorakılıqlarına
məruz qalır, döyülür, həbs
olunurlar: "AŞPA nədənsə
bunları görmək
istəmir. Necə olur ki, Fransa
Afrikada və digər yerlərdə neokolonializm siyasəti həyata keçirir, amma AŞPA Fransaya "gözün üstə qaşın var" deməyi lüzum görmür. Bu gün Fransa Avropanın özündə
Korsikada milli azadlıq hərəkatını
boğur, onun üzvlərini təqib edir, onları həbsə atır. Lakin AŞPA Korsikada insan hüquqlarının
pozulmasına görə
Fransaya irad belə bildirmir.
Deputat qeyd edib ki, Azərbaycan
BMT Təhlükəsizlik Şurasının
qəbul etdiyi qətnamələrə, beynəlxalq
hüquq normalarına
əsaslanaraq işğalda
olan torpaqlarını
azad edib. Bununla Azərbaycan həm də dünyada beynəlxalq hüququn və ədalətin bərpa olunmasına yardımçı
olub. Lakin AŞPA Fransa kimi erməni
təəssübkeşlərinin məkrli siyasətinə dəstək verərək
Azərbaycana qarşı
qərəzli mövqe
nümayiş etdirir.
Azərbaycanın 2001-ci ildə AŞPA-ya üzv olarkən bu təşkilatın ədalətin yanında olacağını düşündüyünü
deyən Kamilə Əliyevanın sözlərinə
görə, ötən
illər ərzində
AŞPA ona bəslənən
ümidləri nəinki
doğrultmayıb, həm
də daim ölkəmizə qarşı
qərəzli olub:
"Ona görə Azərbaycana qarşı qərəzli olan, onun səsini dondurmaq istəyən bir təşkilatın layiqli cavabı verilməli idi. Bu baxımdan nümayəndə heyətimizin
bu qurumla əməkdaşlığı dayandırması vaxtında
və yerində verilən doğru qərardır. Bu AŞPA-ya tərs şillə
oldu. Azərbaycan öz yolu, qətiyyətli
siyasəti olan dövlətdir və beynəlxalq aləmdə heç bir nüfuzu, çəkisi olmayan AŞPA ilə əməkdaşlığa da
ehtiyacımız yoxdur".
Nəzrin QAFARZADƏ,
Azərbaycan.-2024.-
25 yanvar, № 15.- S.3.