Qubadlının ilk dəfə səs verəcək gənci deyir ki...

"Yaşımla bağlı Vətən savaşında iştirak edə bilmədiyimə görə əvəzini seçkidə çıxacağam - Zəfərin davamına səs verəcəyəm"

1993-cü ildə Qubadlının işğalından sonra rayon sakinləri ölkənin müxtəlif regionlarında, o cümlədən Sumqayıtda məskunlaşıblar. İndi isə qubadlılılar yenidən köç ovqatındadırlar. Amma bu ovqat tam fərqlidir - yurda dönüşdən doğan sevinc ovqatıdır.

Hələlik isə 125 saylı Zəngilan-Qubadlı Seçki Dairəsinin 36 saylı seçki məntəqəsi Sumqayıtın İnşaatçılar qəsəbəsində yerləşən İşıqlı kənd tam orta məktəbin binasında təşkil edilib. Məntəqənin sədri Fərhad Yusifov bildirdi ki, rayonun bir neçə kəndini əhatə edən məntəqədə 1180 seçici qeydə alınıb. Seçkilərə start veriləndən bəri məntəqədə aparılan işlər qaydalar çərçivəsində görülüb. Məntəqənin katibləri Şəkər Quliyeva, Vəfa Behbudova, üzvləri Sabit Bağırov, Əliyar Məmmədov və Səməd Qasımov seçki siyahılarının hazırlanması, səsvermə kabinələrinin quraşdırılması işlərinə nəzarət edirlər.

Məntəqə üzrə ilk dəfə səsverənlər hələlik 4 nəfərdir. F.Yusifov dedi ki, əvvəlki seçkilərdən fərqli olaraq ilk dəfə səs verənlərin sayı azdır, çünki gənclərin çoxu həqiqi hərbi xidmətdədir.

Nihad Qənbərov ilk dəfə səs verəcək. Onunla məntəqənin girişində görüşdük. Bildirdi ki, 44 günlük Vətən müharibəsi və antiterror tədbirləri nəticəsində ölkəmiz erməni separatçılarından təmizlənib, ərazi bütövlüyümüz bərpa olunub: "Təəssüf edirik ki, bir gənc olaraq mən və dostlarıma döyüşlərdə iştirak etmək nəsib olmadı, yaşımız imkan vermədi. Amma əvəzini seçkidə çıxıb Zəfərin davamına səs verəcəyik".

Fərhad Yusifov dedi ki, gənclərimizin belə mövqe sərgiləmələri alqışlanmalıdır. Onlar seçkinin məsuliyyətini dərk edir və bu demokratik prosesdən kənarda qalmaq istəmirlər.

Sonda onu da bildirək ki, məntəqə texniki avadanlıqlarla tam təmin edilib - telefonlaşdırılıb, generator quraşdırılıb, seçki günü müxtəlif istiqamətlərə getmək üçün ayrıca maşın ayrılıb və digər işlər görülüb.

Məntəqə sədri dedi ki, qubadlılıların növbədənkənar prezident seçkilərində fəal iştirak edəcəklərinə və ölkəmizin daha işıqlı gələcəyinə səs verəcəklərinə şübhə etmir.

Akif ƏLİYEV,

Azərbaycan.-2024.- 25 yanvar, № 15.- S.6.