Bakı bir gözəllik tablosuna bənzəyir

Bakı insan zəkası ilə təbiətin yaratdığı bir gözəllik harmoniyasıdır... Bu şəhərin ecazkar dəniz panoraması, füsunkar təbiəti bütün zamanlarda səyyahları, turistləri təəccübləndirməyi bacarıb. Bir görəni bir könüldən min könülə özünə valeh edib.

Qədimliyin və müasirliyin vəhdət şəhəri olan Bakı həm də sevgi və səmimiyyət şəhəridir. Bu şəhərdə insanların üzündən nur, gözündən təbəssüm, ürəyindən hərarət süzülür. Avropa və Şərq memarlığının ən gözəl inciləri sayıla biləcək qədər yaraşıqlı binalarını görən turistlər Bakını möcüzələr adasına bənzədirlər... Paytaxtımızı əvvəllər görüb, sonradan bir də görənlər gündən-günə gözəlləşən bu şəhərdə möcüzə baş verdiyini zənn edirlər. Bu bir həqiqətdir ki, insanların xoş güzəranını, rahatlığını və qayğısız həyat tərzini təmin etmək məqsədilə şəhərin gözəlliyinə gözəllik qatan, yeni memarlıq abidələrinin vaxtaşırı tikilib sakinlərin istifadəsinə verilməsinə artıq bakılılar vərdiş ediblər. Bu gün Bakı yaşıllıqlar adasına bənzəyir desək, mübaliğə olmaz. Bütün bu işlər dövlətin vətəndaşlara olan qayğısı, qəbul olunmuş xüsusi dövlət proqramı ilə planlı surətdə həyata keçirilir. Dövlətimizin Azərbaycanın sosial inkişafı ilə bağlı müəyyənləşdirdiyi strategiyanın nəticəsi olaraq Bakının dünyanın ən baxımlı, gözəl şəhərlərindən birinə çevrilməsi istiqamətində görülən işlərin miqyası ilbəil daha da artır.

Vaxtilə 3,5 kilometr olan tarixi bulvarımızın uzunluğu indi 16 kilometrə çatıb və hər yer abadlaşıb, gözəlləşib. Bu, dünya miqyasında nadir istirahət və gəzinti zonasıdır. Yeni yollar, parklar, xiyabanlar salınır. Bakı bu gün parklar, bağlar şəhəridir.

Hazırda paytaxtın bütün rayonlarında yaşıllaşdırma, abadlıq-quruculuq işləri aparılır. Qeyd etməliyik ki, bu həm də təməli Ulu Öndər Heydər Əliyev tərəfindən qoyulan gözəl tarixi ənənənin davamıdır. Tarixə nəzər salsaq, görərik ki 1970-ci ilədək Bakı şəhərində cəmi 3 min hektara qədər yaşıllıq sahəsi mövcud olub. Ulu Öndər Heydər Əliyevin Azərbaycana rəhbərlik etdiyi illərdə Bakıda yaşıllıqların sahəsi 17 min hektara qədər artıb. Bu dövrdə ətraf mühitin mühafizəsi, təbii sərvətlərdən səmərəli istifadə olunmasına dair 8 qanun qəbul edilib, hökumət səviyyəsində 30-dan artıq qərar verilib.

Son illər paytaxtda və regionlarda yaşıllaşdırma, abadlaşdırma, parksalma işlərinə nəzər salsaq, qarşımızda geniş bir panorama açılar. Suraxanıda, Sabunçuda, Pirallahı, Nizami, Binəqədi, Səbail rayonlarında görülən işlər şəhər mənzərəsini gözəlləşdirərək onun əsrarəngiz görünüşünə yeni rəng qatıb. Bakı və ətraf qəsəbələrdə 70-dən çox yeni mədəniyyət və istirahət parkı salınıb. 100-dən çox park əsaslı təmir olunub. Dənizkənarı Milli Park, Filarmoniya bağı, Fəvvarələr meydanı, Zabitlər parkı, Sahil bağı, Xaqani bağı, Səməd Vurğun bağı, Zorge parkı, "Koala Park" əyləncə mərkəzi, Dədə Qorqud parkı, Qış parkı, Ümummilli Lider Heydər Əliyevin adını daşıyan çoxsaylı parklar, akademik Zərifə Əliyeva adına park, paytaxtın Xətai rayonunda salınan "Gənclik", Səbail rayonundakı "Çəmbərəkənd" parkları, Yasamal rayonu ərazisində salınmış "Yeni Yasamal" parkı ölkədə həyata keçirilən sosial-iqtisadi inkişaf strategiyasının tərkib hissəsi olmaqla paytaxtımızın estetik görünüşünü daha da artırır.

Artıq insanlar istirahət günlərini qayğısız, şən keçirmək üçün vaxt itirib uzaqlarda təbii mənzərə, gözəl, səfalı yerlər görmək üçün Bakıdan kənarda yerlər axtarmırlar. Elə şəhərin mərkəzində, yaşadıqları evlərin yaxınlığında istirahətlərini təşkil etmək üçün yaradılan şəraitdən məmnunluqla istifadə edirlər.

Elşən QƏNİYEV,

Azərbaycan.-2024.- 25 yanvar, № 15.- S.7.