Fransa kimi ölkələrin oyuncağına çevrilmiş mənasız qurum

"Azərbaycanın AŞPA-da fəaliyyətini qeyri-müəyyən müddətdə dayandırması reallıqlara əsaslanır və ölkəmizə qarşı qərəzli mövqedən irəli gəlir. Uzun illərdir ki, AŞPA Azərbaycan həqiqətlərinin dərk edilməsində, ölkəmizin haqlı mövqeyinin müdafiəsində heç bir təşəbbüs göstərmir".

Bu sözləri "Azərbaycan" qəzetinə açıqlamasında Milli Məclisin Aqrar siyasət komitəsinin sədri Tahir Rzayev deyib. Deputat bildirib ki, otuz ildən çox torpaqlarımız işğal altında olduğu bir dövrdə bəzi beynəlxalq təşkilatlar kimi, AŞPA da susmuş, Azərbaycan həqiqətlərini, onun haqq-ədalət mübarizəsini dəstəkləmək əvəzinə ermənipərəst mövqeyi ilə fərqlənib. Bu gün də bu yolu tutub. AŞPA-da ölkəmizə qarşı ardıcıl olaraq qərəzli, reallıqları əks etdirməyən qətnamələr qəbul edilir, yalan, saxta məlumatlar yayılır. Belə olan halda AŞPA-da fəaliyyətini dayandırmaq Azərbaycanın haqqıdır, çünki biz uzun illər bu təşkilatdan müsbət heç nə görmədik, əksinə, yaramazlıqlarının, AŞPA deputatlarının qərəzli fikirlərinin, düşüncələrinin, qətnamələrinin şahidi olduq. Azərbaycan nümayəndə heyətinin bu qurumla bağlı bəyanat verməsi, AŞPA-nın qərəzli mövqeyini ortaya qoyması və bu təşkilatda öz fəaliyyətini dayandırması obyektiv faktlara əsaslanır.

T.Rzayev bildirib ki, Azərbaycanın beynəlxalq təşkilatlarla münasibətləri daim yüksək səviyyədə olub və dünyanın ən böyük qurumları ilə bu əlaqələri yaxşılaşdırmağa səy göstərib. Ölkədə keçirilmiş bir çox beynəlxalq əhəmiyyətli tədbir də bunu sübut edir: "Azərbaycanın BMT-nin Təhlükəsizlik Şurasının qeyri-daimi üzvü kimi fəaliyyəti Qoşulmama Hərəkatına sədrliyi dövründə göstərdiyi təşəbbüslər, eləcə də bir çox beynəlxalq tədbirə evsahibliyi etməsi göstərir ki, ölkəmiz beynəlxalq təşkilatlarla əlaqələrin genişləndirilməsində maraqlıdır. Eləcə də dövlətimiz daim AŞPA ilə yaxşı münasibətdə olmuş, bu təşkilatın fəaliyyətində yaxından iştirak etmişdir. Ancaq təəssüflər olsun ki, özünün ermənipərəst mövqeyi ilə gündəmdə olan və Azərbaycan əleyhinə təbliğat aparan bu təşkilat öz yolundan dönməmiş və bu gün də mənfur niyyətlərini göstərməkdə davam etməkdədir".

AŞPA-nın bu gün Fransanın oyuncaq mexanizminə çevrildiyini vurğulayan komitə sədri deyib ki, bu qurum Almaniyanın və Fransanın diktəsi ilə işləyir və hər hansı eybəcər qətnamənin qəbul edilməsinə rəvac verir: "Azərbaycan nümayəndə heyətinin AŞPA-da öz fəaliyyətini qeyri-müəyyən müddətə dayandırması hər bir Azərbaycan vətəndaşı tərəfindən rəğbətlə qarşılanır. Çünki biz haqqı, ədaləti tələb edirik. Dünyaya verdiyimiz töhfələrin, digər xalqlara göstərdiyimiz qayğının nəticələrini görmək arzusundayıq. AŞPA kimi bir təşkilatdan belə yaramazlıq görəndə təbii ki, onun fəaliyyətində iştirak etmək olmaz. Bu baxımdan nümayəndə heyətinin verdiyi bəyanat çox düzgündür".

Əsmər QARDAŞXANOVA,

Azərbaycan.-2024.- 26 yanvar, № 16.- S.9.