AŞPA Azərbaycana qarşı məkrli ssenaridə rol alıb

"Avropa Şurası Parlament Assambleyasının (AŞPA) ölkəmizə qarşı qərəzli davranışı ilk belə hadisə deyil. Azərbaycan 2001-ci ildə bu quruma üzv olduğundan bəri daim ermənipərəst münasibətlə üz-üzə qalıb. Son hadisələr də sübut edir ki, bu təşkilatdan ədalətli davranış gözləməkdə yanılmışıq. AŞPA-nın Azərbaycanı insan hüquqlarının pozulmasına görə günahlandırması riyakarlığın son həddidir. Əslində isə demokratiyadan və insan haqlarından ağızdolusu danışan bu təşkilat elə özü bütün bu dəyərlərdən məhrumdur".

Bu fikirləri qəzetimizə açıqlamasında Milli Məclisin deputatı Aydın Hüseynov deyib. Deputat bildirib ki, Avropa Şurasına üzv olduğumuz 23 il ərzində keçirilən iclaslarda, qəbul edilən qərarlarda Ermənistanın işğalçı siyasətini pisləyən bir cümlə də səslənməyib. Bu azmış kimi, indi Azərbaycanı hədəfə alır, bizə qara yaxmağa çalışırlar. Belə olan halda Azərbaycan nümayəndə heyətinin korrupsiyalaşmış, islamofob düşüncəli qüvvələrlə dolmuş bir təşkilatda fəaliyyətini dayandırması məntiqlidir.

Deputat qeyd edib ki, AŞPA heç zaman ölkəmizin ərazi bütövlüyünün, vətəndaşlarımızın Ermənistan tərəfindən pozulmuş hüquqlarının bərpasının müdafiəsinə qalxmayıb. Müsahibimizin sözlərinə görə, Azərbaycanın dünya birliyi tərəfindən tanınan ərazilərinin 20 faizi Ermənistan tərəfindən işğal olunsa da, AŞPA hələ indiyə qədər İrəvan əleyhinə bir dənə də olsun sənəd qəbul etməyib. Əksinə, separatçıları daim himayə edib. AŞPA-da məsələlərə ikili standartlardan yanaşıldığını vurğulayan deputat əlavə edib ki, halbuki bir quruma üzv olan iki ölkədən birinin digərinin ərazisini işğal etməsi faktına görə ən azından işğalçının səs hüququ əlindən alınmalıydı.

"AŞPA bunun əvəzində 2023-cü il oktyabrın 23-də "Dağlıq Qarabağda humanitar vəziyyət" adlı qətnamə qəbul edib. Həmin qətnamənin 23-cü bəndində Azərbaycan açıq-aşkar təhdid edilib, 19-20 sentyabrda baş tutan lokal xarakterli anti-terror tədbirlərini hərbi əməliyyatlar kimi qiymətləndirib və Azərbaycan nümayəndə heyətinin etimadnaməsinin 2024-cü ilin ilk iclasında tanınmayacağı ilə bağlı hədə göstərib. AŞPA Azərbaycana qarşı məkrli ssenaridə rol alıb və ittihamlarımız əsassız deyil. Ona görə də nümayəndə heyətimizin AŞPA ilə əməkdaşlığı və bu təşkilatda iştirakını qeyri-müəyyən formada dayandırması düzgün qərardır", - deyə A.Hüseynov söyləyib.

Nəzrin QAFARZADƏ,

Azərbaycan.-2024.- 26 yanvar, № 16.- S.9.