Azərbaycanın qələbəsi AŞPA-nı sarsıdıb

Azərbaycanın Ermənistan ordusu üzərində qələbəsi keçmiş münaqişədən öz qlobal maraqları üçün istifadə edən dövlətləri yaman sarsıdıb. Hələ müharibənin gedişi zamanı Fransa prezidenti Emmanuel Makron baş verən hadisələrin Ermənistanın xeyrinə olmadığını anlayıb ölkəmizin əleyhinə əsassız ittihamlara start verdi.

Yalan, saxta məlumatlarla məsələni BMT-nin Təhlükəsizlik Şurasının müzakirəsinə çıxararaq bu nüfuzlu beynəlxalq təşkilatın imkanlarından istifadə edib Azərbaycana təzyiq göstərməyə cəhd etdi. Faktiki olaraq Azərbaycan öz düşmənləri ilə iki cəbhədə - Qarabağda Ermənistan ordusu ilə, diplomatik cəbhədə isə Fransanın üstümüzə saldığı islamofob dövlətlərlə vuruşurdu... Məlum olduğu kimi, hər iki cəbhənin qalibi Azərbaycan oldu.

2020-ci il noyabrın 10-da Rusiyanın vasitəçiliyi ilə imzalanan üçtərəfli Bəyanat ölkəmizə qarşı "diplomatik hücum"ları təşkil edən dövlətlərin əlini soyutsa da, ölkəmizə qarşı etmək istədikləri pisliklərdən qalmadılar. Ermənistan üzərindən Cənubi Qafqaz siyasətində "söz sahibi" olan, uzunmüddətli münaqişə dövründə "vasitəçilik" edən Fransanın planlarının uğursuz nəticələrini anlayan Makron hər vasitə ilə sülh danışıqları prosesinə mane olmağa çalışır. İstədiyinə nail ola bilməyən Fransa prezidenti hər cür oyuna əl atır. Səbəbi də bəllidir. Nə qədər ki Qarabağ problemi var idi, bu ölkə problemdən Ermənistan vasitəsilə öz məqsədi üçün istifadə edə bilirdi... Problemin olmaması Fransanın Cənubi Qafqaz siyasətində yoxluğu deməkdir. Fransa prezidenti Azərbaycana qarşı qurduğu planlarda təkbaşına bir nəticə hasil edə bilməyəcəyini dərk edib anti-Azərbaycan koalisiyası yaradaraq ölkəmizə qarşı mübarizəyə başlayıb. İlk dövrlərdə ermənipərəst, Aİ-nin xarici işlər və təhlükəsizlik siyasəti üzrə ali nümayəndəsi Cozef Borel Azərbaycana qarşı qərəzli və əsassız bəyanatları ilə diplomata yaraşmayan hərəkətləri etdi. Borel azərbaycanlı diplomatların Fransadan çıxarılması ilə bağlı Fransa ilə həmrəy olduğunu bildirdi.

Azərbaycan-Ermənistan münasibətlərinin normallaşması prosesində Aİ-nin rolunu heçə endirməyə çalışan Borel Qarabağdan köçən ermənilərin də sayını utanıb-qızarmadan təhrif edərək "150 min"ə qədər qaldırdı...

Hər şey əvvəlcədən düşünülmüş plan əsasında aparılır. Məqsəd sülh danışıqlarına mane olmaqdır. Fransa öz çirkin niyyətinə çatmaq üçün ölkəmizə qarşı birmənalı olaraq həmişə qərəzi və fitnəkarlığı ilə seçilən AŞPA-nı da özünə yedək edib. Almaniyalı deputat Frank Şvabeni də öz oyunlarına alət edən Fransa Avropa Şurası Parlament Assambleyasının qış sessiyasının ilk iclasında Azərbaycan nümayəndə heyətinin səsvermə hüququnun dondurulması təşəbbüsünü irəli sürüb. Heç şübhəsiz ki, Fransa prezidenti Emmanuel Makronun anti-Azərbaycan kampaniyasını Almaniyanın vasitəsilə genişləndirməyə çalışır. Görünən odur ki, Fransa və Avropadakı erməni lobbisi AŞPA-nı anti-Azərbaycan platformasına, Frank Şvabenin timsalında isə Almaniyanı muzdlu icraçıya çevirə bilib.

Aİ Azərbaycanı əsasən ermənilərin hüquqlarını pozmaqda ittiham edirdisə, AŞPA "fərqli" olaraq guya ölkəmizdə insan hüquqlarının pozulmasından narahat olub. Yalandır. Əgər 2020-ci il sentyabrın 27-də Ermənistan təcavüzkar niyyətlə başladığı müharibədə yeni ərazilər işğal edə bilsəydi, Fransadan da, Aİ-dən bu gün insan hüquqlarını maska əvəzi üzünə taxan almaniyalı deputat Frank Şvabedən də, onun təklifi ilə ölkəmizin əleyhinə qətnamə çıxaran AŞPA-dan da səs çıxmayacaqdı. İnsan hüquqlarının pozulması adı altında öz abırsızlıqlarını ört-basdır etməyə çalışan AŞPA əleyhimizə qəbul etdiyi qətnamədə əsl niyyətini gizlədə bilməyib. "Dağlıq Qarabağdakı vəziyyətlə bağlı assambleya özünün "Laçın dəhlizi ilə sərbəst və təhlükəsiz gediş-gəlişin təmin edilməsi" adlı 2508 (2023) saylı qətnaməsində guya Laçın dəhlizi boyunca azad və təhlükəsiz hərəkətin olmamasını müəyyən edib. Bundan başqa, assambleya özünün "Dağlıq Qarabağda humanitar vəziyyət" adlı 2517 (2023) saylı qətnaməsində və 2260 (2023) saylı tövsiyələrində Azərbaycan Ordusunun 2023-cü ilin sentyabrında Dağlıq Qarabağın bütün erməni əhalisinin Ermənistana qaçması və "etnik təmizləmə" iddialarının ortaya çıxmasına səbəb olan hərbi əməliyyatını pisləyib".

Məsələnin kökündə də elə bu durur. Əslində nə Aİ-ni, nə AŞPA-nı Azərbaycan xalqı düşündürmür. Necə ki 200 min azərbaycanlını öz dədə-baba yurdlarından Ermənistan tərəfindən zorla, vəhşicəsinə çıxarılmasına görə, yaxud həmin insanlara münasibətdə indiyə kimi laqeydlik, biganəlik göstərən Aİ və AŞPA səsini çıxarmayıb. İndi bu təşkilatdan ədalətli qərar gözləmək olarmı?!

Erməni lobbisinin pulu ilə tələyə düşmüş Fransanın sifarişlərini kor-koranə yerinə yetirən muzdlu deputatların, özfəaliyyət dərnəyinə bənzər bir qurumun qəbul etdiyi qətnamələr kağız parçalarından başqa bir şey deyil. Ədalətli mövqeyi, haqlı olması ilə Azərbaycan həmişə bütün mübarizələrin qalibi olub. Sirkə nə qədər tünd olsa, öz qabına ziyan verər. AŞPA da əleyhimizə qəbul etdiyi qətnamə ilə özünə balta vurmuş oldu.

Elşən QƏNİYEV,

Azərbaycan.-2024.- 27 yanvar, № 17.- S.4.