"Zəfər xəbərini eşidəndə sevincdən gözlərim yaşardı"

Getdikcə iqtisadi və siyasi gücünü artıran Azərbaycan dövlətinin qayğısı sayəsində cəmiyyətimizdə bilikli, bacarıqlı, vətənpərvər müasir gənc nəsil yetişməkdədir. Bu gənclər dövlətimizin, xalqımızın mənəvi sərvətidir.

Belə bacarıqlı gənclərdən biri də Tağızadə Solmaz Ruhin qızıdır. O, 13 oktyabr 2000-ci ildə Bakı şəhərində anadan olub. S.Məmmədov adına 301 saylı məktəbdə oxuyub. 2017-ci ildə orta təhsilini bitirdikdən sonra Bakı Dövlət Universitetinin Şərqşünaslıq fakültəsinin Regionşünaslıq (İran üzrə) ixtisasına qəbul olub. 2021-ci ildə Bakı Dövlət Universitetini yüksək nəticə ilə (bakalavr) başa vurub. Elə həmin il universitetin Beynəlxalq münasibətlər və iqtisadiyyat fakültəsinin "Beynəlxalq münasibətlər və diplomatiya" ixtisaslaşması üzrə magistratura pilləsinə qəbul olmağın sevincini yaşayıb. 2023-cü ildə təhsilini fərqlənmə diplomu ilə başa vurub. Hazırda müstəqil şəkildə fars dilinin tədrisi ilə məşğuldur.

Solmaz Tağızadə bacarığı və biliyi sayəsində başqa sahələrdə də uğurlar qazanıb. 2017-ci ildə Səfərbərlik və Hərbi Xidmətə Çağırış üzrə Dövlət Xidmətinin keçirdiyi "Sabahın əsgəri" yazı müsabiqəsinin diplomuna layiq görülüb. 2020-ci ildə isə S.Tağızadə İslam Əməkdaşlıq Təşkilatının Avrasiya Regional Mərkəzi ilə Azərbaycan İdman və Gənclər Nazirliyi tərəfindən birgə təşkil olunan "Beynəlxalq Münasibətlər Akademiyası" onlayn proqramında göstərdiyi bacarığa görə sertifikatla mükafatlandırılıb. 2020-ci ildə Dövlət İdarəçilik Akademiyası tərəfindən təşkil olunan "Ermənistan-Azərbaycan Dağlıq Qarabağ" münaqişəsi adlı simulyasiya oyununda "Ən yaxşı deleqat" nominasiyasına layiq görülüb və diplomla təltif olunub. Bakalavr illərində Tələbə Gənclər Təşkilatının Şərqşünaslıq fakültəsi üzrə sədr müavini, həmçinin "Tələbə problemləri ilə iş" departamentinin sədri vəzifələrində çalışıb.

Söhbət zamanı daha çox dövlətin gənclərə qayğısından, təhsildən, vətəndaşlıq borcundan, vətənpərvərlik hissindən danışan Solmaz Tağızadə dedi ki, ölkəmizin yürütdüyü uğurlu gənclər siyasəti qarşımızda geniş imkanlar açır: "Biz də bu imkanlardan bacarıqla istifadə edərək ölkəmizin layiqli vətəndaşı olmağa çalışırıq. Arzu və istəklərimizə təhsil almaqla çatırıq. Çətin olsa da, sonunda bizi uğurlar gözlədiyini yaxşı bilirik. Təhsil gənclərdə vətəndaşlıq hissinin formalaşmasında da mühüm rol oynayır. Vətəndaşlıq hissi sözlə çətin ifadə olunan qürurlu bir hissdir. Bu, doğma yurdu, torpağı sevmək, onun uğrunda canından keçmək, yorulmadan çalışmaq deməkdir. Azərbaycan vətəndaşı olmağımla fəxr edirəm".

Gənc mütəxəssis hərbçi ailəsində dünyaya göz açıb. Atası Ruhin Tağıyev, anası Günay Tağıyeva hazırda zabit kimi ordumuzun sıralarında xidmət edirlər. Solmaz xanım hərbçi ailəsində böyüdüyündən qürur duyduğunu dedi. Bildirdi ki, hərbçi ailəsində hər şeydən əvvəl ciddi nizam-intizam hökm sürür. Bu nizam-intizam övladın məsuliyyət hissini artırır: "Vətən müharibəsi başlayanda orduya getməyə can atırdım. Ön sıralarda vuruşmasam da, arxa cəbhədəki işlərə kömək etmək istəyirdim. Bunun üçün hətta Ali Baş Komandanın elektron poçtuna məktub yazmışdım.

Şükürlər ki, Azərbaycan Ordusu 44 günlük Vətən müharibəsində erməni qəsbkarlarına qalib gəldi, 30 ilə yaxın davam edən işğala son qoyuldu. Azərbaycanın vətənpərvər bir gənci kimi ordumuzun düşmən üzərində Zəfər çaldığını eşidəndə sevincdən gözlərim yaşardı. Artıq Qarabağımız azaddır".

Solmaz xanım fars və ingilis dillərində də yazıb-oxumağı, eləcə də səlis danışmağı bacarır. Azərbaycanın böyük şairi Nizami Gəncəvinin əsərlərini fars dilində, Şekspirin əsərlərini isə ingilis dilində oxuyur.

Solmaz Tağızadə hələ gəncdir, inanırıq ki, onun uğurları davamlı olacaq.

Vahid MƏHƏRRƏMOV,

Azərbaycan.-2024.- 27 yanvar, № 17.- S.15.