AŞPA-da qəbul olunmuş qərar əsassızdır və böhtandır

Ədalət prinsiplərinə zidd addımlar atmaq Avropa Şurasını nüfuzdan salır

"Azərbaycan bir sıra Avropa təsisatlarının ikili standartları ilə üzləşir. Avropa Şurası Parlament Assambleyasının ölkəmizlə bağlı qəbul etdiyi qərar da bunun göstəricisidir. Əslində, Azərbaycan üzv olduğu beynəlxalq təşkilatlarla fəal əməkdaşlıq siyasəti həyata keçirir, hər zaman onlarla əlaqələri yüksək səviyyədə qurmağa üstünlük verib. Bu baxımdan, AŞPA da istisna deyil".

Bu sözləri "Azərbaycan" qəzetinə açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib. O bildirib ki, təşkilat öz fəaliyyətində Avropa dəyərlərinə deyil, müəyyən dairələrin maraqlarına üstünlük verir. AŞPA-da qəbul olunmuş qərarın heç bir əsası yoxdur. Həqiqəti əks etdirməyən iddialara görə, guya Azərbaycan təşkilat qarşısında götürdüyü öhdəliklərini yerinə yetirmir, təşkilatla əməkdaşlıq xəttinə sadiq deyil. Buna səbəb olaraq da bildirirlər ki, 2023-cü il aprelin 23-də Azərbaycan Laçın-Xankəndi yolunun başlanğıcında sərhəd-buraxılış məntəqəsi qurulandan sonra Qərb təsisatları, habelə AŞPA dəfələrlə Azərbaycandan həmin sərhəd-buraxılış məntəqəsinin ləğv edilməsini tələb edib. Əslində isə Azərbaycan dövləti həm Vətən müharibəsində, həm də ötən ilin 19-20 sentyabr tarixlərində keçirdiyi lokal antiterror tədbirləri sayəsində ərazi bütövlüyünü, suverenliyini tam təmin etdiyi halda AŞPA Azərbaycanın Qarabağdakı antiterror tədbirlərini pisləyən qərəzli qətnamə qəbul edib. Bu cür sənədlərin qəbulu AŞPA-nın timsalında bəzi beynəlxalq təşkilatların siyasi məsələlərə selektiv yanaşmasının və işğalçı dövləti dəstəkləməsinin əyani sübutudur.

Deputat qeyd edib ki, 44 günlük müharibədəki qələbə bir çox Avropa dövlətləri, siyasi dairələr üçün gözlənilməz olub, onlar və yeni reallığı bu günə qədər qəbul edə bilmirlər. "Nəzərə almaq lazımdır ki, AŞPA-da Azərbaycanın əleyhinə səs verən ölkələr regionumuzdan çox uzaqdadır və bölgənin problemlərini, reallıqlarını anlamırlar. 2023-cü ilin sentyabrından sonra bölgədə vəziyyət yenə də dəyişdi, lakin bu da Avropadakı məlum dairələrin təfəkkürünü dəyişmədi. Əslində, AŞPA-nın mövqeyi əvvəlki vəziyyətin geri qaytarılmasını nəzərdə tutur, Azərbaycana qarşı tamamilə əsassız və absurd tələblər irəli sürür. Bu da qəbulolunmazdır", - deyə o əlavə edib.

Sevinc Fətəliyeva deyib ki, AŞPA ilə böhranın əsasında bu gərginliyin səbəbkarı kimi bəzi Qərb dövlətlərinin Azərbaycana olan qərəzli münasibəti dayanır. Fransa bu prosesdə xüsusilə "fəal"dır. Fransızlar və onlarla eyni mövqedən çıxış edən alman deputatlar bu məsələdə fəallıq göstərir və başqa ölkələrdən olan həmkarlarına təsir edirlər. Avropa Şurasını həqiqətən insan hüquqları narahat edirsə, niyə 30 il ərzində Azərbaycan torpaqlarının Ermənistan tərəfindən işğalına səssiz qalırdı, bir milyon qaçqın, köçkünümüzün vəziyyətindən narahat olmurdu? Nə üçün Azərbaycan ərazilərini işğaldan azad etdikdən sonra Ermənistan tərəfindən viran edilmiş torpaqlarımıza səfər etmək üçün müraciət etmədilər? Bütün bunlar göstərir ki, onları beynəlxalq hüquq, insan haqları və ədalət maraqlandırmır. Bu kimi təşkilatlar yalnız və yalnız müəyyən dairələrin tapşırıqlarını yerinə yetirərək belə bir mövqedə dayanırlar.

S.Fətəliyeva vurğulayıb ki, bu amillərin fonunda AŞPA-nın Azərbaycana qarşı məlum mövqeyinin heç bir əsası yoxdur: "Demokratik inkişaf yolu seçmiş, öz ərazi bütövlüyünü və suverenliyini bərpa etmiş Azərbaycana qarşı qərəzli addımların və irəli sürülən ittihamların heç bir əsası yoxdur. Bütün bunlar birbaşa ikili standartların, erməni təəssübkeşliyinin ifadəsidir. Lakin Azərbaycan güclü dövlətdir, heç kim bizimlə təhdid dilində danışa bilməz. Beynəlxalq hüquqa və ədalət prinsiplərinə zidd qərarlar vermək ilk növbədə Avropa Şurasının ziyanınadır".

Əsmər QARDAŞXANOVA,

Azərbaycan.-2024.- 30 yanvar, № 19.- S.5.