Vaxt gələcək ermənilər Fransaya qarşı da iddia qaldıracaqlar

"Fransa ölkəmizə qarşı qərəzli münasibətini riyakar şəkildə davam etdirir. Azərbaycan Vətən müharibəsində və antiterror tədbirlərində qazandığı zəfərlər nəticəsində öz suverenliyini və ərazi bütövlüyünü tam bərpa etdikdən sonra Paris bizə davamlı böhtanlar yağdırır, barəmizdə mənfi imic formalaşdırmağa çalışır. Qarabağın Azərbaycan torpağı olmasını Ermənistan özü də etiraf etdiyi halda, sanki Fransa bununla barışa bilmir, ermənidən daha çox ermənilik edir. Görünür, bunun əsas səbəbi də elə Fransa senatında çoxluq təşkil edən ermənilər, ümumiyyətlə, bu ölkəni öz çənginə alan erməni lobbisi və diasporudur".

Bu fikirləri qəzetimizə açıqlamasında Milli Məclisin deputatı Anar İsgəndərov deyib. Deputat bildirib ki, vaxt gələcək Fransada at oynadan ermənilər iddia qaldıracaqlar ki, Marsel birmənalı olaraq onlarındır. Fransızlar buna hazır olmalıdırlar.

"Təəssüflər olsun ki, Azərbaycanla Ermənistan arasında vəziyyətin normallaşması üçün əlverişli tarixi şəraitin yarandığı bir vaxtda Fransa riyakarlığından əl çəkmir. Azərbaycan-Ermənistan şərti sərhədində bir neçə aydır ki, silah səsi eşidilməməsindən Paris narahatdır. Ermənilərə yardım adı altında özünün Cənubi Qafqazda mövqelərini möhkəmləndirməyə çalışan Fransa Hayastanı gecə-gündüz silahla təchiz edir. Bircə o qalıb ki, iddia etsin ki, Ermənistanın Azərbaycanla olan şərti sərhədini Fransa qorusun. Bu ölkə Ermənistanın Azərbaycanla sülh müqaviləsi bağlamaq istəyinə qarşı çıxaraq, nəyin bahasına olursa-olsun, bu ərazidə sülhün təminatını, sülh müqaviləsinin imzalanmasını əngəlləməyə çalışır", - deyə deputat qeyd edib.

Anar İsgəndərov bildirdi ki, Fransa AŞPA-da da əlindən gələni əsirgəmədi, lakin etdikləri boşa çıxdı, iflasa uğradı. Bunun əsas səbəbi odur ki, Azərbaycan öz haqq işindəki mübarizəsində qalib gəlib. Güclü və yenilməz dövlətə, dayanıqlı iqtisadiyyata sahib olan Azərbaycana qarşı ucuz manevrlər etmək nəticəsiz qalmağa məhkumdur. Deputatın sözlərinə görə, bu gün erməni Azərbaycan torpaqlarında yaşamaq istəməyib çıxıb gedirsə, bunun Fransaya nə dəxli var?! Sual yaranır ki, erməniləri müdafiə etmək Fransaya nə qazandırır?! Əslində Fransanın Azərbaycana qarşı yürütdüyü düşmənçilik siyasətidir. Lakin bu siyasət Fransaya heç nə qazandırmayacaq.

Müsahibimiz onu da bildirdi ki, Fransanın AŞPA-da çıxardığı oyunlar hər kəsə bəllidir: "Azərbaycanın səsinin dondurulması təklifi həm də Fransaya aiddir. Bu oyunda Almaniya ilə əlbir hərəkət edən Fransa qalib gələcəyini düşünsə də, yenə məğlubiyyətə düçar oldu. Azərbaycan nümayəndə heyətinin təşkilatdakı fəaliyyətinin qeyri-müəyyən müddətə dayandırılması ən doğru qərar idi. İndi Fransa nə qədər bağırırsa bağırsın, nə qədər ədalətsiz və sərsəm qərarlar çıxarırsa çıxarsın, bizi maraqlandırmır. Belə əsassız davranışlar Azərbaycanı öz haqq yolundan döndərə bilməz".

Nəzrin QAFARZADƏ,

Azərbaycan.-2024.- 30 yanvar, № 19.- S.6.