Azərbaycan həm də COP29-a hazırlaşır

Məlumdur ki, BMT-nin İqlim Dəyişikliyi üzrə Çərçivə Konvensiyasının Tərəflər Konfransı (COP) dünyanın ən mötəbər beynəlxalq qurumlarından biridir və ölkələrin təmsilçiliyi baxımından BMT Baş Assambleyasından heç də geri qalmır. O səbəbdən COP-un sessiyalarına ənənəvi olaraq hər il bir ölkə başçılıq edir.

Bu ilin noyabrında isə Azərbaycan bu mötəbər tədbirin ev sahibi olacaq. COP29-un yüksək səviyyədə keçirilməsi üçün Azərbaycan artıq hazırlıqlara başlayıb. Yeri gəlmişkən qeyd edək ki, COP29 ölkəmizdə elan olunmuş "Yaşıl dünya naminə həmrəylik ili"ndə keçiriləcək. Bununla Azərbaycan yaxın bir neçə onilliyə hesablanmış "yaşıl siyasəti"ni nümayiş etdirmək üçün əlverişli imkan qazanacaq. Ona görə də deyə bilərik ki, COP29-a evsahibliyi Azərbaycanın ekologiya sahəsində qazandığı uğurların dünyaya çatdırılması baxımından əlverişli bir fürsətdir. Çünki "yaşıl enerji" növlərinin yaradılması və onun dünya bazarlarına nəqli hazırda ölkəmizin enerji siyasətinin prioritet istiqamətidir.

Xəbər verildiyi kimi, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29), Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının keçirilməsi ilə əlaqədar Təşkilat Komitəsinin ilk iclası keçirilib. İclası Azərbaycan Respublikası Prezidentinin Administrasiyasının rəhbəri, Təşkilat Komitəsinin sədri Samir Nuriyev açaraq, ölkəmizin 2030-cu ilə qədər sosial-iqtisadi inkişafa dair milli prioritetlərindən birinin "Təmiz ətraf mühit və yaşıl artım ölkəsi" kimi müəyyən edildiyini bildirib.

Xatırladaq ki, "Təmiz ətraf mühit və yaşıl artım ölkəsi" prioritetində qarşıya qoyulmuş tapşırıqların icrası məqsədi ilə son illər iqtisadiyyatın dekarbonizasiyasına yönəlmiş siyasi, iqtisadi və qanunvericilik islahatları həyata keçirilir. Bu məqsədlə hazırlanmış qanun layihəsində biznes subyektləri ilə fikir mübadiləsinin aparılması üçün ictimai müzakirələr nəzərdə tutulur. "Yaşıl enerji" sahəsində dövlət tərəfindən son zamanlar reallaşmış layihələr hesabına enerji səmərəliyi və alternativ enerji mənbələrindən istifadə göstəriciləri artıb. Bu məsələlərə də toxunan Samir Nuriyev Azərbaycanın 2030-cu ilə qədər istixana qazlarının miqdarının 35 faiz azaldılması öhdəliyini götürdüyünü, işğaldan azad edilmiş Qarabağ və Şərqi Zəngəzur iqtisadi rayonlarının, habelə Naxçıvan Muxtar Respublikasının "yaşıl enerji" zonası elan edildiyini xatırladıb. Bildirib ki, "Yaşıl dünya naminə həmrəylik ili"nin elan olunması ölkəmizin ətraf mühitin mühafizəsi sahəsində apardığı məqsədyönlü və ardıcıl dövlət siyasətinin tərkib hissəsi olduğundan xəbər verir.

Sudan səmərəli istifadə, təkrar emal, bu sahələrdə innovativ texnologiyaların tətbiqi, ətraf mühitə buraxılan zərərli qazların udulması və sağlam ekoloji mühitin yaradılması məqsədi ilə həyata keçirilən yaşıllaşdırma işləri, işğaldan azad edilmiş ərazilərin "yaşıl enerji" zonasına çevrilməsi istiqamətində görülən tədbirlər bütövlükdə COP29-un Azərbaycanda keçirilməsinə zəmin yaradan amillərdəndir. Azərbaycanın bərpaolunan enerji mənbələrindən geniş istifadə etmək planları ölkəmizin müasirləşdirilməsi strategiyasına tam uyğundur. Enerji mənbələrinin bu şəkildə şaxələndirilməsi ilə daha davamlı və ekoloji cəhətdən təmiz kənd təsərrüfatı təcrübələrinə nail olmaq mümkündür. Bununla yanaşı, Qarabağın "sıfır netto emissiya" prinsipləri əsasında yenidən qurulması layihəsi və su idarəçiliyində "yaşıl enerji"dən istifadə etməklə Azərbaycan regionun inkişafına liderlik edə bilər. Çünki bizim suvarma üçün günəş və külək enerjisindən istifadə etmək, ənənəvi enerji mənbələrindən asılılığımızı minimuma endirmək, ətraf mühitə təsiri azaltmaqda dünyada qabaqcıl olmaq imkanımız var.

Qeyd edək ki, bununla bağlı BMT-nin İqlim Dəyişmələri üzrə Çərçivə Konvensiyası özünün nəzərdə tutulan milli səviyyədə müəyyən olunmuş töhfələrində qlobal iqlim dəyişmələrinin qarşısının alınması təşəbbüslərinə dəstək kimi 1990-cı baza ili ilə müqayisədə 2030-cu ilə istilik effekti yaradan qazların emissiyalarının səviyyəsində 35 faiz azalmanı hədəf kimi götürmüşdür. Bu barədə də də danışan Samir Nuriyev Azərbaycanın ətraf mühitin qorunması və qlobal iqlim dəyişmələri sahəsində beynəlxalq səyləri daim dəstəklədiyini və bu prosesə töhfələr verdiyini vurğulayıb. Administrasiya rəhbərinin fikirlərinə əsasən deyə bilərik ki, Azərbaycanda iqlim dəyişmələrinə qarşı həyata keçirilən fəaliyyətin beynəlxalq aləmdə təqdir edilməsi, dünyada irimiqyaslı və mötəbər tədbirlərdən biri hesab olunan COP29-un Bakıda keçirilməsi ölkəmizə beynəlxalq səviyyədə olan hörmət və etimadın daha bir göstəricisidir.

Züleyxa ƏLİYEVA,

Azərbaycan.-2024.- 30 yanvar, № 19.- S.11.