Azərbaycan qlobal ekoloji tədbiri əliboş qarşılamayacaq

"Yaşıl dünya naminə həmrəylik" ili ölkə ərazisində 5 milyon ağac əkiləcək

Söz yox ki, bu ilin noyabrında Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransı (COP29) dünyanın ən mötəbər beynəlxalq tədbirlərindən olacaq. Dövlətlərin təmçilçiliyi baxımından BMT Baş Assambleyasından heç də geri qalmayan bu tədbirə evsahibliyi etmək üçün Azərbaycanın namizədliyinin yekdilliklə dəstəklənməsi isə növbəti dəfə ölkəmizə göstərilən yüksək etimad və hörmətdir.

Bu həm də xüsusilə Böyük Zəfərdən sonra yaranmış reallığı həzm etməyən bəzi Qərb dövlətlərinin Azərbaycanın əleyhinə apardıqları hər cür qaralama kampaniylarına qarşı beynəlxalq müstəvidə verilmiş tutarlı cavabdır. Əslində Azərbaycan hələ işğal illərində də ən müxtəlif beynəlxalq tədbirlərə evsahibliyi etmişdir. Özü də bu zaman təşkilat işləri cəhətdən elə bir standartlar qoymuşdur ki, digər ölkələr onunla ayaqlaşmağa çətinlik çəkdiklərini özləri etiraf etmişlər.

Beynəlxalq iqlim məsələlərinin, ekoloji problemlərin müzakirə olunacağı COP29-un ünvanı olan Azərbaycanda 2024-cü ilin "Yaşıl dünya naminə həmrəylik" ili elan edilməsi ölkəmizin qlobal tədbirlərə necə ciddi yanaşdığının növbəti sübutudur. Bu il çərçivəsində Qarabağ və Şərqi Zəngəzurda böyük layihələr həyata keçiriləcəyini deyən ekologiya və təbii sərvətlər nazirinin müavini Vüqar Kərimov işçi qrupunun Zəngilanda keçirilən iclasında fikirlərini belə səsləndirib: "Növbəti əlamətdar hadisə bu ilin ölkə başçısının müvafiq sərəncamı ilə "Yaşıl dünya naminə həmrəylik ili" elan edilməsidir. Bu da bizim üzərimizə böyük məsuliyyət qoyur. Ekologiya və Təbii Sərvətlər Nazirliyi bir çox aidiyyəti qurumlarla birgə bununla bağlı tədbirlər planı hazırlayıb. Həmin tədbirlər planında ölkə miqyasında, eləcə də Qarabağ və Şərqi Zəngəzurda həyata keçiriləcək böyük layihələr yer alıb".

Vüqar Kərimov onu da nəzərə çatdırıb ki, planda nəzərdə tutulan layihələrdən biri "Yaşıl dünya naminə həmrəylik" ilində 5 milyon ağacın əkilməsidir. Nazir müavini həmin ağacların 3 milyondan çoxunun Ekologiya və Təbii Sərvətlər Nazirliyi tərəfindən əkiləcəyini, qalan 2 milyonunu isə müxtəlif dövlət qurumlarının, icra hakimiyyətlərinin həyata keçirəcəyini deyib.

Bu gün Qarabağ və Şərqi Zəngəzur yenidənqurma və bərpa işlərindən dolayı geniş tikinti meydançasına çevrilib. Təkcə ötən il Cəbrayıl, Qubadlı, Zəngilanda 9 kənd, 1 qəsəbə, 3 şəhər mərkəzində müxtəlif yaşayış məhəllələrinin, məktəb və xəstəxanaların təməli qoyulub. Ümumilikdə isə Böyük Qayıdışa dair I Dövlət Proqramına əsasən, ilkin mərhələdə 100 yaşayış məntəqəsinin (8 şəhər, 8 qəsəbə və 84 kənd) bərpa edilməsi nəzərdə tutulub. İndiyə qədər işğaldan azad edilmiş 8 şəhərin baş planı hazırlanıb. 2022-ci ilin 19 iyul tarixindən bugünədək 2 şəhərə (Laçın və Füzuli şəhərləri) və 3 kəndə (Zəngilan rayonunun Ağalı, Tərtər rayonunun Talış və Laçın rayonunun Zabux kəndləri) 1134 ailə (4516 nəfər) qayıdıb. Sadalanan işlər həyata keçirilərkən Qarabağ və Şərqi Zəngəzurun "yaşıl zona" elan edilməsi də diqqətdən kənarda qalmır. İstər yeni tikililər, istərsə də bərpa işləri ilə yanaşı, yeni yaşıllıqlar salınır, meşələr genişləndirilir. Bunlardan əlavə, məlum olduğu kimi, bu ərazilər "yaşıl enerji" zonası elan olunub və həmin istiqamətdə intensiv işlər görülür. İşçi qrupun adıçəkilən iclasında iştirak edən Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev bu barədə bildirib: "Bu istiqamətdə böyük layihələr həyata keçirilməkdədir. Cəbrayılda günəş stansiyaları tikiləcək. Biz tikintidən danışırıqsa, bütün inzibati binalarımız növbəti kəndlərin tikintisində "yaşıl enerji"dən istifadə edəcək. Ağalı kəndinin enerji təminatı bərpaolunan enerji vasitəsilə aparılır. Ümumilikdə "ağıllı şəhər", "ağıllı kənd" konsepsiyasına innovativ yanaşmalar tətbiq olunacaq".

Züleyxa ƏLİYEVA,

Azərbaycan.-2024.- 30 yanvar, № 19.- S.11.