Seçkilərin şəffaf və ədalətli keçirilməsi üçün bütün tədbirlər görülür

Ümummilli Lider 1993-cü ildə hakimiyyətə qayıtdıqdan sonra dünyada qəbul edilmiş demokratik siyasi sistemə uyğun milli dövlət quruculuğu istiqamətində islahatlar həyata keçirilməyə başladı.

Ulu Öndər Heydər Əliyevin əsasını qoyduğu bu yenidənqurma işləri sonrakı illərdə də uğurla davam etdirildi. Dərin və çoxşaxəli islahatlar Cənubi Qafqaz regionunun hərtərəfli inkişafının qarşısında böyük əngələ çevrilmiş Qarabağ probleminin həll olunmasına gətirib çıxarmaqla yanaşı, həm də Azərbaycanın dünya birliyində mövqeyinin daha da möhkəmlənməsində mühüm rol oynadı. Fevralın

7-də keçiriləcək növbədənkənar prezident seçkiləri də ölkəmizin beynəlxalq aləmdəki artan nüfuzunu daha da gücləndirəcək.

Bu günə qədər Azərbaycanda keçirilən seçkilər bütün ölkəni əhatə etməmişdi. 1988-ci ilin sonlarından erməni separatçılarının Qarabağa başlayan hücumları sonrakı zamanlarda torpaqlarımızın 20 faizinin işğal olunması ilə nəticələndi. Güclü, qüdrətli Azərbaycan Ordusu 2020-ci ildə 30 ilə yaxın davam edən işğala son qoydu. Xalqımız Zəfər qazandı. Ona görə də 7 fevral 2024-cü ildə keçiriləcək növbədənkənar prezident seçkiləri Zəfər seçkisi də adlandırılır.

Fevralın 7-də keçiriləcək növbədənkənar prezident seçkiləri xalqımız üçün əlamətdar hadisə olacaq. Çünki müstəqil Azərbaycanın tarixində ilk dəfə olaraq prezident seçkiləri keçiriləcək. Artıq ölkəmizin bütün ərazilərində, o cümlədən işğaldan azad edilmiş Xankəndidə, Şuşada, Xocalıda, Laçında, Kəlbəcərdə, Cəbrayılda, Zəngilanda, Füzulidə və digər rayonlarda seçicilər öz iradələrini ifadə edəcəklər. Bu, Azərbaycan xalqının son illərdə əldə etdiyi ən böyük tarixi nailiyyətdir.

Növbədənkənar prezident seçkiləri mahiyyət etibarilə ərazi bütövlüyümüzün və suverenliyimizin təsdiqidir və suverenliyimizin təntənəsi kimi yadda qalacaq.

Bu gün demokratik seçkilərin keçirilməsi üçün ölkədə əlverişli siyasi mühit hökm sürür. 2024-cü il fevralın 7-nə təyin edilmiş növbədənkənar prezident seçkilərinin yüksək səviyyədə, azad, ədalətli və şəffaf keçirilməsi üçün Mərkəzi Seçki Komissiyası tərəfindən dairə və məntəqələrdə zəruri işlər aparılır. Səsvermə keçiriləcək bütün dairə məntəqələri seçki prosesinin tam şəffaf və demokratik şəraitdə təşkili üçün əlverişli avadanlıq və texniki vasitələrlə təmin olunub. Vətəndaşların seçki günü rahat səs vermələri üçün hər cür şərait yaradılıb.

Mərkəzi Seçki Komissiyasının "Seçki-2024" Müstəqil Media Mərkəzi də yaradılıb. Mərkəzin yaradılmasında başlıca məqsəd seçkilərdə aşkarlığın və şəffaflığın yüksək səviyyədə təmin edilməsində mühüm rolu olan yerli və beynəlxalq media nümayəndələrinə daha geniş imkanlar təmin etməkdir. Mərkəz seçkiləri hərtərəfli, operativ və obyektiv işıqlandırmaqda, habelə məlumatları almaqda və dərhal ictimailəşdirməkdə onlara yardımçı olacaq. Media nümayəndələri müasir informasiya-kommunikasiya texnologiyaları və zəruri texniki avadanlıqlarla tam təchiz olunan mərkəzdəki kompüterlər, telefon və faks aparatlarından, o cümlədən ödənişsiz internetdən sərbəst istifadə edə biləcəklər.

Müstəqil Media Mərkəzində Azərbaycan, ingilis və rus dillərində müntəzəm olaraq seçkilərə dair ən son məlumatlar təqdim ediləcək. Seçki prosesi ilə bağlı müxtəlif məsələlər barədə səlahiyyətli şəxslərin və ekspertlərin rəyləri, habelə açıqlama və bəyanatlar dərhal ictimailəşdiriləcək, foto və videogörüntülər yayılacaq.

Fevralın 7-nə təyin olunmuş növbədənkənar prezident seçkiləri ilə bağlı işğaldan azad olunmuş ərazilərdə də təşkil edilmiş məntəqələrdə "exit-poll" keçiriləcək. Bu barədə Mərkəzi Seçki Komissiyasının sədrinin müavini Rövzət Qasımov məlumat verib. Onun sözlərinə görə, Vətəndaşların Əmək Hüquqlarını Müdafiə Liqası ABŞ-nin "Oracle Advisory Group" təşkilatı ilə birgə 40 seçki dairəsi üzrə 500 seçki məntəqəsində "exit-poll" keçirəcək: "Bu seçki məntəqələrindən 6-sı işğaldan azad edilmiş ərazilərdədir. Bunlar 84 saylı Füzuli Seçki Dairəsinin 75 saylı, 97 saylı, Tərtər-Naftalan-Goranboy Seçki Dairəsinin Suqovuşanda yerləşən 58 saylı Seçki Məntəqəsi, 118 saylı Ağdam şəhər Seçki Dairəsinin 57 saylı Seçki Məntəqəsi, 122 saylı Xankəndi Seçki Dairəsinin Xankəndi şəhərində yerləşən 14 saylı seçki məntəqəsi, 124 saylı Şuşa-Ağdam-Xocalı-Xocavənd Seçki Dairəsinin Şuşada yerləşən 105 saylı Seçki Məntəqəsi və 125 saylı Zəngilan-Qubadlı Seçki Dairəsinin Ağalı kəndində yerləşən 33 saylı seçki məntəqəsidir".

Amerikalı ekspert, Avrasiyada beynəlxalq münasibətlər və geosiyasət üzrə tədqiqatçı Piter Teys seçki ilə bağlı fikrini açıqlayaraq deyib ki, prezident seçkiləri Azərbaycan xalqının gələcək inkişafı və rifahı üçün mühüm fürsətdir. Bu seçkiləri Azərbaycanın müasir tarixində ən mühüm məqam adlandıran ekspert əlavə edib ki, ölkəmizdə seçki ənənəsi demokratiyanın mütərəqqi vəziyyətini mükəmməl şəkildə nümayiş etdirir. Budəfəki prezident seçkiləri ilk dəfə suveren Azərbaycan ərazisinin hər bir guşəsində baş tutacaq. Bu, əslində, Azərbaycanın müasir tarixində şanlı səhifədir.

Beləliklə, Azərbaycan xalqı 2024-cü ilin 7 fevral seçkilərinə tariximizin ən möhtəşəm Zəfərinin yaratdığı reallıqlar fonunda ortaya çıxan siyasi, iqtisadi, hüquqi, ən əsası, qlobal zərurətlər kontekstində gedir. Xalqımız sabaha, davamlı tərəqqiyə, yüksələn rifaha etimad mandatı verəcək. Bu dəfə ən layiqli namizədə ərazi bütövlüyü və suverenliyi tam bərpa edilən bütün Azərbaycan səs verəcək.

Əminik ki, seçicilər 7 fevral növbədənkənar prezident seçkilərində xalqımızın inandığı, güvəndiyi liderə etimad göstərəcəklər. Əlbəttə ki, bu inam və etimad Azərbaycanın davamlı yüksəlişinə, möhtəşəm quruculuğuna və daha böyük zəfərlərə doğru addımlamasına hesablanacaq.

Vahid MƏHƏRRƏMOV,

Azərbaycan.-2024.- 28 yanvar, № 18.- S.7.