“Diplomatic World Sweden” saytı Cənub Qaz Dəhlizi Məşvərət Şurası çərçivəsində nazirlərin 11-ci iclası barədə məqalə dərc edib

Aprelin 4-də Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclasları keçirilib. Tədbirdə 24 ölkədən nümayəndələr Azərbaycan və Avropa arasında enerji əməkdaşlığının perspektivlərini müzakirə etmək üçün bir araya gəliblər.

AZƏRTAC xəbər verir ki, siyasətçilər və diplomatlar üçün nəzərdə tutulmuş “Diplomatic World Sweden” saytında bu görüşə həsr olunmuş məqalə dərc edilib.

Məqalədə vurğulanır ki, Azərbaycan Avropanın əsas enerji tərəfdaşlarından biri kimi mövqeyini möhkəmləndirir. 2021-ci ildən ölkə qaz ixracını 8 milyard kubmetrdən 13 milyard kubmetrə qədər artırıb. Tədarüklər 12 ölkəni, o cümlədən 10 Avropa ölkəsini əhatə edir, onlardan 8-i Aİ-nin tərkibinə daxildir.

İsveç saytı qeyd edir ki, Prezident İlham Əliyev tədarük coğrafiyasını genişləndirmək və Avropanın qaz infrastrukturuna sərmayə qoymaq niyyətini bəyan edib ki, bu da Aİ ilə münasibətlərə strateji xarakter verə bilər.

Bundan əlavə, Azərbaycan bərpaolunan enerjinin inkişafı planlarını təqdim edib. Ölkə 2030-cu ilə qədər günəş və külək enerjisi üzrə gücün 6 giqavata çatacağını gözləyir ki, bu da daxili istehlakı azaltmaqla yanaşı, qaz ixracını artıracaq.

Məqalədə Xəzər regionunu Avropa ilə birləşdirən 3500 kilometr uzunluğunda Cənub Qaz Dəhlizinə xüsusi diqqət yetirilir. Marşrut tam gücü ilə işləyir, amma dövlət başçısı İlham Əliyevin qeyd etdiyi kimi, onun daha da genişləndirilməsi tələb olunur. Eyni zamanda, bu cür layihələrin maliyyələşdirilməsi getdikcə çətinləşir, çünki bir çox beynəlxalq maliyyə institutları mədən yanacaqları ilə bağlı təşəbbüsləri dəstəkləməkdən imtina edir.

Qeyd olunur ki, Cənubi Qafqaz ilə Avropa arasında yaşıl enerji dəhlizinin yaradılması təşəbbüsü də müzakirə olunub. Layihə ilkin araşdırma mərhələsindədir və gələcəkdə dayanıqlı enerji tərəfdaşlığının mühüm komponentinə çevrilə bilər.

Müəllifin fikrincə, Bakıda keçirilən görüş Azərbaycanla Avropa İttifaqı arasında enerji əlaqələrinin möhkəmləndirilməsi istiqamətində mühüm addım olub

Azərbaycan.-2025.- 9 aprel (№ 68).- S.7.