Ölkəmiz balanslı siyasəti uğurla davam etdirir

"Prezident İlham Əliyev aprelin 9-da ADA Universitetində təşkil edilən "Yeni dünya nizamına doğru" mövzusunda beynəlxalq forumda dünya düzənində ölkəmizin yeri, ikitərəfli və çoxtərəfli beynəlxalq gündəliyimizdə duran məsələlər, Azərbaycanla Ermənistan arasında normallaşma prosesi, habelə regional və qlobal miqyasda cərəyan edən son hadisələrlə bağlı əhəmiyyətli fikirlər səsləndirdi və mümkün proqnozları diqqətə çatdırdı. Artıq 7-ci dəfə təşkil edilən beynəlxalq foruma rekord sayda əcnəbi qonağın qatılması və onlardan 50 faizindən çoxunun tədbirdə ilk dəfə iştirak etməsi beynəlxalq miqyasda ölkəmizə marağın ilbəil artmasından, xüsusilə də dövlətimizin başçısı cənab İlham Əliyev tərəfindən bu kimi konfranslarda verilən mühüm mesajların və gerçəkliyə çevrilən siyasi proqnozların əhəmiyyətindən xəbər verir".

Bu fikirləri "Azərbaycan" qəzetinə açıqlamasında Milli Məclisin deputatı Zaur Şükürov deyib. O bildirib ki, dövlətimizin başçısının çoxsaylı suallara ətraflı və dəqiq cavabları bir çox məsələlərlə bağlı ölkəmizin mövqeyinə dair aydın təsəvvür formalaşdırır. Azərbaycanla türk dünyası, o cümlədən strateji müttəfiqimiz Türkiyə, habelə strateji tərəfdaşımız İsrail arasında münasibətlərin mövcud vəziyyəti və bu "siyasi üçbucaq"da ölkəmizin rolu barədə Prezidentimizin açıqlamaları xüsusilə diqqət çəkir. Azərbaycanın bu iki ölkə ilə əlaqələrinə dair Almaniya nümayəndəsinin sualını cavablandıran Prezident İlham Əliyev strateji müttəfiqimiz olan qardaş Türkiyə və uzun illər ərzində çətin zamanlarda qarşılıqlı dostluğumuzun davam etdiyi, strateji tərəfdaşımız İsrail arasında müşahidə edilən gərginliyin narahatlıq doğurduğunu bildirib. Prezident iki ölkə arasında əvvəllər müşahidə edilmiş gərginliyin aradan qaldırılmasında Azərbaycanın vasitəçi rol oynadığını qeyd edərək hazırkı problemin də həll edilməsi üçün Azərbaycanın öz mümkün səylərini davam etdirdiyini vurğulayıb. "İslam dünyasının fəal üzvlərindən olan dövlətimiz istər ikitərəfli, istərsə də İslam Əməkdaşlıq Təşkilatı çərçivəsində üzv dövlətlərlə səmərəli əməkdaşlığı davam etdirir. Eyni zamanda İsraillə mövcud dostluq münasibətləri ölkəmizin mövqeyinin balanslı şəkildə formalaşdırılmasını zəruri edir. Uzun illər ərzində milli maraqlarımıza əsaslanan, bütün xarici təsir və diktələri istisna edən, eyni zamanda məxsus olduğumuz islam dünyası ölkələrinin də mövqelərini nəzərə alan Azərbaycan bu balanslı siyasətini uğurla davam etdirə bilib. Xüsusi olaraq vurğulanmalıdır ki, ölkəmizin sərgilədiyi prinsipial və müstəqil xarici siyasət kursu miqyasından və nüfuzundan asılı olmayaraq dünya dövlətləri tərəfindən qəbul olunmaqdadır", - deyə deputat əlavə edib.

Z.Şükürov qeyd edib ki, cənab İlham Əliyevin siyasi-diplomatik bacarığı və böhran vəziyyətlərini dünya liderlərinə xas olan şəkildə, yüksək peşəkarlıqla idarə edə bilməsi ölkəmizin nüfuzunun davamlı olaraq artmasına imkan verir.

Əsmər QARDAŞXANOVA,

Azərbaycan.-2025.- 11 aprel (№70).- S.4.