Aprel şəhidi Röyal Nəsirovun ailəsi ziyarət olunub

Cəlilabad rayon rəhbərliyi, hüquq-mühafizə orqanlarının əməkdaşları Aprel şəhidi Nəsirov Röyal İmran oğlunun ailəsini ziyarət etmişlər.

Ziyarət zamanı şəhidin şərəfli həyat yolundan danışılıb. RİH-in başçısı Rafiq Cəlilov ailənin qayğı və ehtiyacları ilə maraqlanıb. Sonra Prezident, Müzəffər Ali Baş Komandan İlham Əliyev və Birinci vitse-prezident Mehriban xanım Əliyeva tərəfindən Azərbaycanın ərazi bütövlüyü uğrunda canlarından keçmiş şəhid ailələrinə hər zaman diqqət göstərildiyi qeyd olunub. Şəhidin ailəsi dövlətimizin şəhid ailələrinə verdiyi dəstəkdən razılığını bildirib.

Nəsirov Röyal İmran oğlu 16 mart 1997-ci ildə Cəlilabad rayonunun Məlikqasımlı kəndində anadan olmuşdur. 2015-ci ilin iyul ayında həqiqi hərbi xidmətə çağırılmışdır. 2016-cı ilin aprel ayında Tərtər ərazisində cəbhənin təmas xəttində gedən döyüş zamanı qəhrəmancasına şəhid olmuşdur. Məlikqasımlı kənd qəbiristanlığında dəfn edilən şəhid ölümündən sonra "Hərbi xidmətdə fərqlənməyə görə" III dərəcəli medalı ilə təltif olunmuşdur.

Azərbaycan.-2025.- 11 aprel (№70).- S.11.