Masallıda və Neftçalada Aprel şəhidlərinin xatirələri anılıb

Masallıda şəhidlər, şəhid ailələri, müharibə əlilləri və iştirakçıları daim diqqətdə saxlanılır, onların üzləşdikləri çətinliklərin aradan qaldırılması istiqamətində tədbirlər görülür.

Bu günlər rayonun Viləş kəndində 2016-cı ilin Aprel döyüşləri zamanı qəhrəmancasına şəhid olmuş Nurlan Bayram oğlu Əsgərlinin xatirəsi anılmışdır. Mərasimdə rayon icra hakimiyyəti başçısının müavini Adəm Məhərrəmov, RİH-in Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Nurlan Muradov, Ərazi idarəetmə və yerli özünüidarəetmə orqanları ilə iş şöbəsinin böyük məsləhətçisi Sənan Sadıqov, Qafqaz Müsəlmanları İdarəsinin Masallı rayonu üzrə qazısı Rəşid Talıbov, Viləş kənd inzibati ərazi dairəsi üzrə nümayəndəliyin, bələdiyyənin əməkdaşları, şəhid ailələri, müharibə iştirakçıları və ictimaiyyət nümayəndələri iştirak etmişlər.

Tədbir iştirakçıları şəhidin məzarını ziyarət etmiş, qəbirüstü abidəsinə tər qərənfillər düzərək ruhuna dualar oxumuşlar.

Neftçalada da şəhidlərin xatirəsinə dərin ehtiram var. Bu günlər Aprel döyüşlərinin ildönümü ilə bağlı anım tədbiri keçirilmişdir. Anım mərasimində rayon icra hakimiyyətinin, hüquq-mühafizə orqanlarının, YAP Neftçala rayon təşkilatının, idarə, müəssisə, təşkilatların rəhbərləri, din xadimləri, şəhid ailələri, qazilər, qonaqlar və ictimaiyyət nümayəndələri iştirak etmişlər.

Neftçala şəhərinin mərkəzindəki Şəhidlər xiyabanında Aprel döyüşləri zamanı şəhid olan Milli Qəhrəman mayor Samid İmanovun, Aşağı Qaramanlı kəndində şəhid gizir Elimdar Səfərovun və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan digər hərbi qulluqçuların məzarları ziyarət olunmuş, önlərinə çiçəklər düzülərək ruhlarına dualar oxunmuşdur.

Seyran CAVADOV,

Azərbaycan.-2025.- 11 aprel (№70).- S.11.