Revanşistlərin son çırpıntıları...

Ermənistanda revanşist qüvvələr sülh müqaviləsinin imzalanması prosesinin baş tutmaması üçün məkrli niyyətlərini aşkarda nümayiş etdirirlər. Amma buna əngəl olmaq üçün nə daxili, nə də xarici dəstəyə malik olduqlarını da çox yaxşı başa düşürlər. Ancaq bütün bunlara baxmayaraq yeni-yeni təxribatçı bəyanat və populist çıxışları ilə gündəmə gəlməkdə davam edirlər. Onlar Azərbaycanla şərti sərhəddə təxribatlar törətməklə yanaşı, sülh prosesinə əngəl ola biləcək fikirlər, hətta terrora çağırış, yeni müharibə hədələri ilə də çıxış edirlər.

Ermənistan Xüsusi Təyinatlı Polis Dəstəsi Veteranlar İttifaqının sədri polkovnik Qrişa Sarkisyan bildirib ki, Ermənistan Azərbaycanın strateji obyektlərinə - xüsusilə, Bakı-Tbilisi-Ceyhan neft kəmərinə və Mingəçevir Su-Elektrik Stansiyasına raket zərbəsi endirməlidir: "O zaman Azərbaycan özü Ermənistandan sülh diləyəcək".

Sarkisyan bu bəyanatlarla Ermənistanın aktiv media resurslarından biri - 214 min abunəçisi olan və müxtəlif erməni analitiklər üçün platforma rolunu oynayan "Noyan Tapan" telekanalının efirində çıxış edib. Müsahibə zamanı o, həmçinin Ermənistan konstitusiyasına görə, "Qarabağın Ermənistana məxsus olduğunu" bildirib və müharibəyə hazır olmağın vacibliyini vurğulayıb: "Müharibədən qorxmaq lazım deyil. Əgər düşmənin bizdən çəkinməsini istəyiriksə, istənilən anda döyüşməyə hazır olduğumuzu göstərməliyik. Biz o ölkəni daim qorxu içində saxlamalıyıq".

Bu arada erməni hüquq müdafiəçisi, ictimai xadim Nare Simonyan deyib ki, Qarabağdan Ermənistana köç etmiş şəxslərə qarşı nifrət nitqi yayılır ki, bu da qısa müddətdə Qarabağdan Ermənistana köç etmiş şəxslərin mübarizə aparmamasına, siyasi hüquqlarından əl çəkməsinə, uzunmüddətli perspektivdə isə bu təzyiqləri daim hiss etməsinə, özünü təcrid etməsinə və bəlkə də digər məsələləri nəzərə alaraq, onların ölkəni tərk etməsinə imkan yaratmağa yönəlib.

Onun sözlərinə görə, Nikol Paşinyan, Anna Hakopyan, Alen Simonyan və Arsen Torosyan Qarabağdan Ermənistana köç etmiş şəxslərə qarşı nifrəti təbliğ edirlər: "Siyahını çox uzun şəkildə sadalaya bilərəm. Bu təzahürlərin real həyatda ifadəsi çox böyükdür, Qarabağdan Ermənistana köç etmiş şəxslərin sosial-psixoloji durumuna təsiri çox güclüdür".

Göründüyü kimi, hər iki ölkə arasında sülh müqaviləsinin imzalanmasının aktual olduğu bir dönəmdə hərbi xuntanın və ona bənzər digər ara qızışdıranların bu cür sərsəm bəyanatlar verməsi, erməni xalqını növbəti dəfə fəlakətə sürükləmək cəhdidir. Qeyd edək ki, Azərbaycanla müharibədəki məğlubiyyət Hayastanı elə bir uçuruma yuvarladıb ki, xilası mümkün deyil. Bütün bunlar, o cümlədən Koçaryan və Sarkisyan kimi müharibə cinayətkarlarının hakimiyyətləri dövründən yığılıb qalmış ağır problemlər hazırki hakimiyyəti çətin vəziyyətdə qoyub. Əslində, revanşist qüvvələr çox yaxşı başa düşürlər ki, böyük siyasətə qayıtmaq üçün heç bir şansları yoxdur - xalq hələ onların hakimiyyət dövründəki acınacaqlı vəziyyəti unutmayıb. Ancaq yenə də özləri belə inanmayacağı qədər populist çıxışlarla gündəmi zəbt erməyə çalışırlar.

Elçin CƏFƏROV,

Azərbaycan.-2025.- 16 aprel (№ 74).- S.11.