Azərbaycan Bəstəkarlar İttifaqında görkəmli bəstəkarlar birgə xatırlanıb

Azərbaycan Bəstəkarlar İttifaqında vaxtaşırı olaraq dahi Üzeyir Hacıbəylinin əziz xatirəsi yad olunur. Belə ki, müxtəlif konsert proqramları və elmi seminarlarda dahi sənətkarın irsinə müraciət edilərək onun əsərləri səslənir və yaradıcılığı haqqında tədqiqatçılar yeni araşdırmalar təqdim edirlər. Azərbaycan bəstəkarlıq məktəbində Üzeyir Hacıbəyli ilə yanaşı onun silahdaşı Müslüm Maqomayevin da mühüm xidmətləri var. Bəstəkarlar İttifaqının tədbirlərində bəzən bu görkəmli sənətkarlar birgə xatırlanır. Bu il onların hər ikisinin 140 illiyini nəzərə alınaraq “Üzeyir Hacıbəyli “Leyli və Məcnun”dan “Koroğlu”ya. Müslüm Maqomayev “Şah İsmayıl”dan “Nərgiz”ə” mövzusunda elmi konfrans təşkil olunub.

Bu barədə AZƏRTAC-a Bəstəkarlar İttifaqından məlumat verilib.

Bildirilib ki, konfransı giriş sözü ilə açan Azərbaycan Bəstəkarlar İttifaqının sədri, dünyanın “Sülh artisti”, AMEA-nın müxbir üzvü, Xalq artisti, professor Firəngiz Əlizadə Üzeyir Hacıbəyli irsinin Azərbaycan mədəniyyətində rolunu qeyd edib. Firəngiz Əlizadə Üzeyir bəyin bəstəkarlıq məktəbinin yaranmasında müstəsna xidmətlərini xüsusi vurğulayıb, bəstəkarın dostu, silahdaşı Müslüm Maqomayevin yaratdığı səhnə əsərləri barədə ətraflı söhbət açıb.

Azərbaycan.-2025.- 20 aprel (№ 78).- S.10.