Fiziki məhdudiyyətli uşaqlar üçün "Əngəlsiz dünya"

Hər bir dövlətin gələcəyini uşaqlar və gənclər müəyyən edir. Buna görə də onların düzgün tərbiyə olunması, fiziki və mənəvi cəhətdən inkişaf etməsi, cəmiyyətdə bir şəxsiyyət kimi formalaşması vacib amillərdən biridir. Bu səbəbdən onların tərbiyəsi çox önəmlidir.

Bu fonda əlilliyi olan şəxslərə, xüsusilə də uşaqlara diqqət və qayğı cəmiyyətimizin hər bir üzvünün borcudur. Bu günlərdə keçirilən "Əngəlsiz dünya" adlı layihə də hər uşaq üçün ümid, hər gülümsəmə üçün səbəbdir. "QOLAT Sport Service"nin təşkilatçılığı, SOCAR-ın sponsorluğu ilə təşkil edilən layihənin məqsədi həssas qrupa aid olan uşaqların fiziki və psixoloji inkişafına dəstək olmaq, onların sosiallaşmasını təmin etmək, idman vasitəsilə sağlam həyat tərzini təşviq etməkdir.

"QOLAT Sport Service"nin direktoru Səid Bağırov deyib ki, layihə sosial çətinliklərlə üzləşən, uşaq evlərində böyüyən və xüsusi qayğıya ehtiyacı olan uşaqlara idmanın gücü ilə həyat sevinci bəxş etməyi qarşısına məqsəd qoyub: "Fiziki qüsurlu, əlil uşaqlarla söhbət etdikdə içimizdə ruh yüksəkliyi yaranır. Ona görə ki, onlar həyatı, yaşamağı bizdən daha çox sevirlər. Özlərinə qapanmırlar, əylənməyin və şənlənməyin müxtəlif üsullarını tapırlar. Burada əsas məqsəd yalnız idman oyunları təşkil etmək deyil. Onların qəlbinə toxunmaq, inam yaratmaq və birlikdə güclü ola biləcəyimizi göstərməkdir. Fiziki və psixoloji inkişaf, sosiallaşma və özünəinamın gücləndirilməsi sağlam həyat tərzinə təşviq - bu layihənin əsas sütunlarını təşkil edir".

Azərbaycan .- 2025.- 7 avqust (№163).- S.8.